Deteronom 2 - Maktub Ta Kumkajir

Israelag ndian kam dɨlalot

¹ Kamla kɨ tel j'un ɗob kam dɨlalot kɨ kaw bahbot kɨkɨre tit'n Bɨraɓe elmɨm, kɨ ndia gug dɔ mbalbo Seir ndɔg ngãibe.

Israel tɔi dɔning Edom, Moab kɨ Amon

² Na Bɨraɓe elɨm an:

³ I gugɨn dɔ mbalbo'n ɗan asɨ. I telɨn, awɨn ko ɓodo.

⁴ I ndamber Israelag an: A i gangɨn dɔning lo ngankõsɨ, ngan Esawg'n ndɨn Seirt, a ɓoolsɨn, oon go rosɨ maj,

⁵ ot ɗɔɔn sed kɨta m'a m'adsɨ dɔningt lod al, ke kɨ asɨ nda danja kaa goto. Mad Esaw mbalbo Seir nyakagɓet loa.

⁶ A i ndugon sed nyasa kɨ nar la a i san ye, a i ndugon sed man kãi kɨ nar la a ãin ye,

⁷ kɨta Bɨraɓe Luwah loi ad maj urri kam kɨlaɗa jiit tube na oo go ndia loi kam dɨlalot kɨbobe'n ɗan. Oo, ɓal dɔsɔɔ Bɨraɓe loi i nat sei, i nal nya mad al.

⁸ Jĩ tɔ kɨ tɔi sãi kad dɔningt lo ngankõjg, ngan Esawg'n ndɨn Seirt kɨ sãi ɗob kɨ kaw dɨlalot, Elat kɨ Esion Geber, kamla kɨ tel j'un ɗob kaw dɔ dɨlalot kɨ Moab.

⁹ Bɨraɓe elɨm an: Ot sɔkɨ Moab, ot ɗɔɔ sed kɨta m'a m'adi nya dɔningt lod nyakagɓet al kɨta mad Ar ngan Lot nyakagɓet.

¹⁰ (Emiag ndɨnt kete. I girrdeg kɨbo, ĩn koosɨg ngalɨn tit Anakiag be.

¹¹ Deg oond tit Repaiag, ad i sikɨm deg kɨ tit'n kɨ Anakiag, na Moabiag kunɨnd Emiag.

¹² Maɗi Horiag ndɨn Seirt, na ngan Esaw tuɓand, tɔlɨnd na ndɨn gotdt tit'n Israelag ɗan ne kɨ dɔning'n Bɨraɓe ad'd nyakagɓet).

¹³ Tajigla i ɓain, i gangɨn bah Yered, taa kɨ ɓai kɨ gang bah Yered.

¹⁴ Kaglo'n kɨ ɓain ko Kades Barnea mbã kɨ gangɨn bah Yered i ɓal dɔmɨta gidaijijoo mbã kad girr ngéɗɔɔg'n ɗan tube goton dan ngékawnat tit'n Bɨraɓe ndan yo ad'd.

¹⁵ Rota ji Bɨraɓe ndoord na nujd kɔ dan ngékawnat mbã goton tube.

¹⁶ Titbe, lon deg ngéɗɔɔ tube nujɨn, oin kɔ dan ngékawnat

¹⁷ Bɨraɓe elɨm an:

¹⁸ Ɓone a i tɔi ɗobnin dɔning Moabt lot kɨ Ar.

¹⁹ Lon i teen nderbe ro Amoniagt a ne, ot sokɨd, ot ɗɔɔ sed kɨta m'a m'adi nya dɔningt lo Amoniag nyakagɓet al, kɨta mad ngan Lot dɔning'n non nyakagɓet.

²⁰ (Deg oon dɔning i dɔning lo Rapayimg to kɨta Rapayimg ndɨnt maɗi na Amoniag kunɨnd Jamjumiag.

²¹ I girrdeg kɨbo, ĩn koosɨg na ngalɨn tit Anakiag be, Bɨraɓe nujd nõ Amoniagt ad tuɓand na ndɨn gotdt,

²² tit'n Bɨraɓe ɗan kɨ ngan Esawg'n ndɨn mbalbot kɨ Seir lon tɔlɨn Horiag nõdt ad taan dɔning lod na ndɨnt mbã ɓone.

²³ Ta lo girr Abiag ngendɨ kam ngan ɓegt mbã kɨ dɔning Gaja taa, deg'n ɓain Kaptort ɗe nujɨnd na ndɨn gotdt).

²⁴ I ɓain dõ, i gangɨn bah Arnõ. Oon, m'la Sihõ Amoria, ngar kɨ Hesbon kɨ dɔning loa jiit. I mbagɨr taa dɔning loa, i ɗɔɔ sia.

²⁵ Ɓone m'mbagirr la ɓooli kɨ rondad ku girrdegt kɨdangdang'n ndɨn girr dɔrãt. Lon a oon hoi a ne, rod a ndad, rod a atd kãrɨr kɨtatɔi.

Ngan Israelag taan dɔning kɨ Hesbon ji ngar Sihõt

²⁶ M'la kɨ ngombangkɨlag kam dɨlalot kɨ Kedemot't kɨ dɔ Sihõ ngar kɨ Hesbon kɨ ta lapia, m'ela m'an:

²⁷ I nya adɨm m'tɔi kɨ ɗob kɨ dɔningt loi, m'a m'un ɗob kɨbo kanj kad m'tɔ kokõ ke ko gel.

²⁸ M'a m'ndugo sei nyasa kɨ nar la m'sa ye, m'a m'ndugo sei mankãi kɨ nar tɔ la kad m'ãi ho ye, m'a m'tɔi kɨ njam dõ koon,

²⁹ tit'n ngan Esawg'n ndɨn Seirt kɨ Moabiag ngendɨ Ar ɗan ne sem, mbã m'gang bah Jurdẽ kad m'aw kam dɔningt'n Bɨraɓe Luwah loj ndɨ adj.

³⁰ Na Sihõ ngar kɨ Hesbon ndig kad kɨ tɔi ront al kɨta Bɨraɓe ad dɔa ngang, ad kama kongkong, kɨtakad n'laa jiit tit'n oo ne ɓone.

³¹ Bɨraɓe elɨm an: Oo, tajigla m'ndɨ m'la Sihõ kɨ dɔning loa jiit. Kɨtɔ 'nten aw, i mbagɨr taa dɔning loa kad i ndɨt.

³² Sihõ tee kɨ deg lon tube, ndɔdj kɨta ɗɔɔ sej ɓebot kɨ Jahas.

³³ Bɨraɓe Luwah loj laa jijt ad kɨ tetaɗɔɔ, ngana kɨ deg loa tube.

³⁴ Kaglot'n non kɨ taa ɓebog loa tube kɨ nuj ɓebo kɨɗen kɨ dekɨdɨngãg kɨ dekɨdẽg kɨ ngang kanj nya de kɨɗa kɨ dɔ dõ.

³⁵ Kɨ hɔ nyakulg kɨtɔj koon, na j'ɔi nyamajg'n hɔn taɗɔɔt kam ɓebogt'n kɨ taad tɔ.

³⁶ Ko Aroer'n i ta bah arnõt kɨ ɓebo'n i kam hollot mbã Galaad ɓebo mad kɨ tɔga tɔij goto. Bɨraɓe Luwah loj lad jijt tube.

³⁷ Na dɔning lo Amoniag la i aw nderbe kadt al, ke kad bah Jabokt, ke ɓebog kɨ kam dɔning mbalt, kɨ log tube'n Bɨraɓe Luwah ɔgj kad j'awt.