Deteronom 14 - Maktub Ta Kumkajir

Nyag'n Israelag a san al

¹ Ĩn ngan Bɨraɓe Luwah losɨ. A i jan rosɨ ke ngɨsen bisɨdɔsɨ kɨta ngekoi al.

² Kɨtɔ in girrdeg kɨjaɓat lo Bɨraɓe Luwah loi, na Bɨraɓe kɔt ku girrdegt tube'n ndɨn dɔningt ne kɨtakad in girrdeg loa kɨkɔsɨ dɔa.

Dã kɨtɔ sa kɨ dã'n Luwah ɔg dɔ kɨtɔ sa

³ A i sanya mad kɨyerr al bat.

⁴ Oon, dãg kɨ a i sand laten: Mang, bat, bĩã,

⁵ kal, wal, tow, bĩã kɨmut, jal, dɔg kɨ kɔl.

⁶ A i san dã kɨɗen'n kɨngotinjaa tɔ joo, na sanya na tel ɔsɨ sa gog.

⁷ Na ĩgɨn san nya na tel ɔsɨ san gog koon ke kɨngotinjad tɔ joo koon, a i san al. Titbe a i san lukum al, ke dɔgdɔgum, ke brangg'n a san nya na tel ɔsɨ san gog na kɨngotinjad tɔ joo al. A i oond tit nya kɨyerr.

⁸ A i san bɔrr al kɨ tɔ kɨngotinjaa ta joo na sanya ɔsɨ sa gog al. A oona tit nya kɨyerr. A i san dãd al, a i ɔdɨn nind al tɔ ho.

⁹ Nyag kɨ kam mant'n a i sand laten: A i san nya kɨɗen'n aw kɨ mbirɨn gidɨnt kɨ ngɔn.

¹⁰ Na nya'n aw kɨ ninga gidn kɨ ngon al, a i san al. A i oona tit nya kɨyerr.

¹¹ A i san yel kɨɗen'n i kɨkar

¹² na ĩgɨn a i sand al laten: Kurro, girra, kɨ kɔrko,

¹³ kɨsoli kɨ wara kɨ dang dang,

¹⁴ kagã kɨɗen,

¹⁵ bulum, kɔi, ndulogidɓe kɨ dang dang kɨɗen,

¹⁶ kɔiyamyo kɨ kɔibo, kɔiyeg,

¹⁷ ngadĩ, mal kɨ yelman

¹⁸ gõkɨmana kɨ gõkadndɔ kɨ dang dang kɨ lawdari.

¹⁹ Na nyakɔrrkɔd ber kɨɗen kɨ ɓai kɨbɔgɨn a i nya kɨyerr rosɨt, a i sand al.

²⁰ A i san nya kɨkar kɨɗen kɨ ɓai kɨbɔgɨn.

²¹ A i san dã mad kɨkoi al. A ad mbah kɨ ndɨ ɓe loi kad sa ke i ɗaw kɔ ro mbaht kɨta in girrdeg kɨjaɓat kɨta Bɨraɓe Luwah losɨ.

Ta dɔ gaj kɨɗa ku kɨkɨlaht

²² Ɓal kɨɗen a ɔrr gaj kɨɗa ku kɨkɨlaht kam kand nyakot loi kɨ tee kam ndɔɔt,

²³ nõ Bɨraɓe Luwaht loi, kam lot'n a kɔ ad ndah tɔ tit la, a i sa gaj kɨɗa ku kɨkɨlaht lo nyako loi kɨ man nduu loi kɨ yib loi kɨ ngander dãg loi kɨbo kɨ kɨdu, kɨtakad i ndoon ɓool Bɨraɓe Luwah loi kɨndɔgndɔg.

²⁴ Ĩla ɗob wo ngãi asɨ kad aw kɨ gaj kɨɗa ku kɨkɨlaht loi al, kɨta lon Bɨraɓe Luwah loi kɔt kad ndah tɔn tit i sãi sei a ne, lon Bɨraɓe Luwah loi ad maj urri

²⁵ a i ɗaw gaj kɨɗa ku kɨlaht loi nõ kɔ i taan, nar, ndɔm jii dɔt awɨn lot'n Bɨraɓe Luwah kɔt,

²⁶ a i ndugo nya kɨɗen kɨ kami ndig kɨ nar'n non, ke mang, ke bat, ke kasɨnduu, ke nyakãi kɨwong, nya kɨɗen kɨ kami ge, a i sa nu nõ Bɨraɓe Luwaht loi, a i ɗa ronel kɨ ngékɨɓe loi.

²⁷ Ot nya Lebia'n ndɨ kam ɓegt loi kɨnõbe, kɨta gaj loa ke nyanduba loa goto nat sei.

²⁸ Dɔboi ɓal kɨmita kɨɗen a i ɔrr gaj kɨɗa ku kɨkɨlaht lo ndanyat loi, i ndaa tadang kam ɓalt kɨkõmɨta'n non, na i ndaa ta ɓegt loi.

²⁹ Kamla Lebia in gaj loa kɨ nyanduba loa goto nat sei, ke mbah, ke ngonhal, ke ngengawkoi'n ndɨn kam ɓegt a san, a ndenɨn, kɨtakad Bɨraɓe Luwah loi ad maj urri kam kɨlagt tube kɨ jii ɗa.