Deteronom 13 - Maktub Ta Kumkajir

A tɔlɨn ngékelta kɨngom kɔ

¹ Oon maj kad i hɔn ɗago nyag tube'n m'ndasɨ mbera, ot lan nya mad dɔt ke ɔrrɨn nya mad kɔ.

² Ĩla ngekelta kɨta Luwaht ke ngekoonyakamndilt mad ɓai kusɨt adi nyakɔj mad ke nyakɨya.

Maj kad ngan Israelg ndulon go yog kɨ ngom al

³ Na tɔlɨn ta nyakɔj'n non ke nyakɨya'n eli taa kamla el an: ad j'awɨn go yogt, ĩgɨn i gerd al, ad kɨ ɗan kɨlaɓer lod.

⁴ Ot koo dɔ ta lo ngekelta kɨta luwaht'n ɗan ke ngekoonyakamndilt kɨta Bɨraɓe Luwah losɨ la ndɨ nãsɨ kɨ n'oo ke i tarɨn Bɨraɓe Luwah losɨ kɨ ngarkamsɨ tube kɨ rosɨ tube a?

⁵ A i ndulon go Bɨraɓe Luwah losɨ, a i ɓoolɨna, a i ngomɨn go mberkɨndag loa, a i oon dɔ ndia, a i ɗan ɓer adɨna, a i tĩnyana sia.

⁶ A i tɔlɨn ngekelta kɨta Luwaht ka nõ, ke ngekoonyakamndilt kɔ kɨta elsɨ kad i taan ɗɔɔ Bɨraɓe Luwah losɨ'n tee sesɨ kam dɔning Ejipt't kɨtɨga na badɔsɨ kam ɓe ɓert. De kɨ titbe ndig lai mut kad i nya ɗob'n Bɨraɓe Luwah loi ndai mbera kad i ndiat Titbe a i ɔrr majal roit kɔ.

⁷ Ĩla ngonkõi kɨdɨngã, ad i ngonkooj kõi, ke ngoni kɨ dɨngã ke kɨdẽ, ke nẽi'n to kadt, ke nami kɨ i tara tit roi be silai lo yarot an: Ad j'aw kɨ ɗa ɓer lo luwahg kɨɗang, luwahg'n ĩ ke bɔwig gerɨnd al.

⁸ Ku luwahgt lo deg'n ndɨn gugɨn dɔsɨ, nderbe sei ke sãi sei, ko dɔngoi dɔningt mbã kɨ dɔngoit mad,

⁹ ot ndig sia, ot koo dɔ ta loa, ot kookumtondo loa, ot kaja, ot ya dɔ ɗagootal loa.

¹⁰ Na i tɔla, a i nda jii dɔat dasabang kad i tɔlan, kamla ji deg tube ye.

¹¹ A i tɨla kɨ mbal kad oi kɨta sah kad i nya Bɨraɓe Luwah loi kɔ, ĩn tee sei dɔning Ejipt't kam ɓe ɓert.

¹² Israel kɨtaagbe a oon na ɓool a ɗad kad ɗan majal kɨ titbe kusɨt gog al. Ɓebo, londɨ ngeɗa nyakɨyerr, a tujɨna kɔ.

¹³ Ĩla i oo hoita dɔ ɓebot kɨɗa ku ɓebogt'n Bɨraɓe Luwah loi adi kɨ i ndɨt anan:

¹⁴ Deg kɨpapa ɓain kusɨt goolɨn deg kɨ ɓebo lod anan: Ad j'awɨn kɨ ɗan ɓer lo luwahg kɨɗen luwahg kɨ i gerd al,

¹⁵ a i sah kad i ger girra, a i ndɨje taa kɨ rotĩi. Ĩla ta 'nten i rota, i ta kɨjeje, ĩla ɗan nya kɨyerr kɨ titbe kusɨt a ne,

¹⁶ rota a i tɔl ngendɨ ɓebot'n ɗan kɨ kiyaɗɔɔ, a i nuj ɓebo'n non kɨ nyag kɨ kamt tube na i tɔl nya kulg kɨ kiyaɗɔɔ.

¹⁷ A i kaw nyag kɨ kamt tube kam natlot kɨ ɓebot, a i lahor ɓebo nõ kɨ nyag kɨ kamt tube tit kadkari kɨlahorrt nõ Bɨraɓe Luwaht loi, a tel gootɓe mbãkɨnõt, a ɗana gog al bat.

¹⁸ Ot kad nya kɨɗa ku nyagt kɨndɔl 'nten nãi jiit kɨtakad wong lo Bɨraɓe kɨtɨngabil nya tan kad ɔj kamkẽ kɨ kookumtondo, ad i bɨla kɨdɔt dɔt tit'n ndan yo ad bɔwig,

¹⁹ ĩla i tel roi go ndɨ Bɨraɓe Luwaht loi, i ngomgo mberkɨndag loa tube'n m'ndai mbera ɓone kad i ɗa nya kɨgoɗobat takum Bɨraɓe Luwaht loi.