Deteronom 12 - Maktub Ta Kumkajir

Dɨngɨr kadkari a i kɨɗabedo

¹ Ĩgɨn ten la in mberkɨndag kɨ tagkɨgang'n a i ngomɨn go na a i hɔn ɗagoot kam dɔningt'n Bɨraɓe Luwah lo bɔwsɨg ndɨ adsɨ nyakagɓet ndɔg tube kɨ i a ndɨn ne kɨ dɔsɨ dõ.

² A i nujɨn log tube'n girrdeg'n a i taan dɔning lod ɗan ɓer lo luwahg lod tit, ke dõ dɔ mbalbogt, ke dɔ doorlogt, ke girr kag kɨmɓool kɨɗen.

³ A i tɔn dɨngɨrg lod, a i tetɨn nyag lod kɨtɔsɨ ɓakumtanya, a i lan horr yo Aserag lod, a i tetɨn nya kɨtɔsɨ ɓakumta luwahg lod, a i tɔlɨn tɔd ko kam logt'n non.

⁴ A ɗan titbe kɨ Bɨraɓe Luwah losɨ al,

⁵ na a i sahn go Bɨraɓe Luwah losɨ kam londiat. Lon a i kɔt ku girrdegt losɨ kɨtakad ndah tɔn dɔt, lot'n non la a i awɨnt ye.

⁶ Lot'n non la a i ɗen kɨ kadkarig losɨ kɨlahorrt kɨ kadkarig losɨ kɨjakɔ kɨ gaj kɨɗa ku kɨkɨlahgt losɨ kɨ kadkarig losɨ kɨkun kɨ dõ kɨ kadkarig kɨgo kunkɔgt losɨ kɨ kadkari kamndig losɨ kɨ ngander dãg losɨ kɨbo kɨ kɨdu.

⁷ Nu la a i san nyat kɨnõ Bɨraɓe Luwaht losɨ na i ɗan ronel kɨta nyag tube'n jisɨ ɗen, in majkurr kokɨro Bɨraɓe Luwaht losɨ'n i ngahn.

⁸ Ot ɗan tit'n jĩ kɨ ndɨ kɨ ɗan labe ɓone: Dekɨɗen ndɨ ɗa nya'n oo maj takumɨnt,

⁹ kɨta 'nten lo taakòt kɨ kam nyakagɓet'n Bɨraɓe Luwah losɨ ndɨ adsɨ al ɓaitɔ.

¹⁰ Na lon i gangɨn bah Jurdẽ Israelag ɗa ton dɨngɨr lo ngéɗayog, ndɨn kam dɔningt'n Bɨraɓe Luwah losɨ ndɨ adsɨ nyakagɓet, Lon adsɨ taakò ji madngétasɨgt tube'n gugɨn dɔsɨ ad i ndɨn kɨ kam kɨsokɨber,

¹¹ kamla a i ɗen kɨ kadkarig losɨ kam lot'n Bɨraɓe Luwah losɨ a kɔt kad ndah tɔn dɔt, lot'n non a i ɗen kɨ nya kɨɗen'n m'ndasɨ mbera, ad i kadkarig kɨlahorrt losɨ kɨ kadkarig kɨjakɔ losɨ kɨ gaj kɨɗa ku kɨkɨlahgt losɨ kɨ kadkarig kɨkun kɨ dõ losɨ kɨ kadkarig tube kɨgo kunkɔgt losɨ, ĩgɨn i ndan ne yo adɨn Bɨraɓe.

¹² A i ɗan ronel kɨnõ Bɨraɓe Luwaht losɨ, ĩn kɨ ngansɨg kɨdɨngã kɨ kɨdẽ, ɓerg losɨ kɨ dɨngã kɨ kɨdẽ kɨ Lebia'n ndɨ kam ɓet kɨta gaj loa ke nyanduba loa goto kusɨt.

¹³ Oo go roi maj kad i la kadkarig loi kɨlahorrt kam logt tube'n a oo nõ al,

¹⁴ na a i la kadkarig loi kɨ lahort kam lot'n Bɨraɓe a kɔt kam dɔningt lo kɨkɨɗa ku girrdegt loi. Nu la a i ɗa nya kɨɗen'n m'ndasɨ mbera ye.

¹⁵ Ke i titbe kaa kɨgo ndigt loi a i tɔl dã, a i sa dãã kam ɓebogt loi tube kɨgo majkurrt'n Bɨraɓe Luwah loi adi, de'n i kɨyerr ke de'n i kɨkar asɨ sa tit'n deg a san ne dã wal kɨ kal ye be.

¹⁶ Na a i san mosɨ al, a i mbela kɔ dɔningt tit man be.

¹⁷ Sumba kad i sa gaj kɨkɨɗa ku kɨ kɨlaht lo nyako loi kam londɨt al, ke man nduu loi kɨ yib loi, ke ngonderr dã loi kɨbo ke kɨdu, ke kɨɗa ku kadkarigt loi kɨgo kunkɔt, ke kadkari kamndig loi ke kadkari kand kɨdasa loi,

¹⁸ Na a i ɗa ronel kɨ nõ Bɨraɓe Luwaht loi kɨta nyag tube'n a i ngah jiit, kam lot'n Bɨraɓe Luwah loi a kɔt la a i sa tit, ĩ kɨ ngoni kɨdɨngã kɨ kɨdẽ, ɓer loi kɨdɨngã kɨ kɨdẽ kɨ Lebia'n ndɨ be loi.

¹⁹ Oo go roi maj kad i nya Lebia kɔ al, ndɔig tube'n i ndɨn kɨ dɔi dõ kam dɔningt loi.

²⁰ Lon Bɨraɓe Luwah loi ad ɗobnin dɔning loi teltat tit'n unɨn kɔn adi, ĩla nyur sa dã õi ad i el an: M'ndig sa dã a ne, a i sa kɨgo ndigt loi.

²¹ Ĩla lon Bɨraɓe Luwah loi a kɔt kɨta ndah tɔn dɔt i sãi sei a ne, a i tɔl dã loi, ke kɨbo ke kɨdu, tit'n m'ndai mbera na a i sa kɨgo ndigt loi kam ɓet loi.

²² A i sa tit'n a san ne wal ke kal, de'n i kɨkar al ke de kɨkar, tujoo a san.

²³ Ta kɨɗabe koon, oo maj kad i sa mosɨ al kɨta mosɨ la i kumkajir na a i sa kumkajir nat kɨ dã al.

²⁴ A i sa al na i mbela kɔ dɔningt tit man be.

²⁵ A i sa al kɨtakad maj urri, ĩn kɨ ngani kɨgoit kɨta i ndɨ i ɗa nya kɨgoɗobat takum Bɨraɓet.

²⁶ Na nyag kɨ i ndad tadang kɨ kadkarig kɨgo kunkɔt loi a awɨn lot'n Bɨraɓe kɔt.

²⁷ A i la kadkarig loi kɨlahorrt, ad i dãã kɨ mosa dɔ dɨngɨrt lo Bɨraɓe Luwah loi, na mosɨ kadkarig loi kɨɗang a i mbel dɔ dɨngɨrt lo Bɨraɓe Luwah loi na a i sa dãã.

²⁸ Oo maj kad i oo dɔ tag tube'n m'ndai mbera kɨtakad maj urri mbãkɨnõt, ĩ kɨ ngani kɨgoit, kɨta i ndɨ i ɗa nya kɨmaj kɨ kɨgoɗobat takum Bɨraɓe Luwaht loi.

Bɨraɓe gangta dɔ yogt Kana

²⁹ Lon Bɨraɓe Luwah loi nuj girrdeg'n a i tuɓad nõit, lon i tuɓad woi, na i ndɨ dɔningt lod a ne,

³⁰ oo go roi maj, na ɓeta gum hɔi, ad i ndulo go nyandaj lod got'n nujɨnd kɔ nõit. Oo maj kad i sah go yog lod al ke el an: Titbãi, girrdeg'n non ɗan ne kɨlaɓer adɨn yog lod a? Mĩ tɔ m'ndig ɗa titbe ho.

³¹ A i ɗa titbe kɨ Bɨraɓe Luwah loi al, kɨta nya kɨɗen'n i kɨyerr ro Bɨraɓet kɨ nya'n Bɨraɓe ɔsa ta, nyag'n non la ɗan kɨta yog lod mbã lan horr ngandg kɨdɨngã kɨ kɨdẽ adɨn yog lod.