Deteronom 10 - Maktub Ta Kumkajir

Luwah ad Moij bar mbalg jo ɓaitɔ

¹ Kaglot'n non Bɨraɓe elɨm an: I tɔsɨ bar mbal joo tit kɨkete nõ, na al kɨromt ne dɔ mbalbot. I ɗa sund kag tɔ.

² M'a m'ndang tag kɨ dɔ bargt kɨdasa'n i tɨla tɔ dɔt na a ũd kam sundt.

³ M'ɗa sund kag akasia, m'tɔsɨ bar mbalg joo tit kɨkete, na m'al dɔ mbalbot kɨ barg kɨjoo jimt.

⁴ Bɨraɓe ndang tag dɔ bargt kɨjoo tit'n jan dɔ bargt kɨkete, mberkɨndag kɨkɨlah'n elsɨ taa dɔ mbalbot ngawden horrt, ndɔ kawnat, na Bɨraɓe adɨm.

⁵ M'tel m'ɗisɨ dɔ mbalbot, m'ũ barg kam sundt'n m'ɗa na bargtont nõ tit'n Bɨraɓe ndamɨn mbera.

⁶ Israelag ɓain Beerot Bene Jaakan kɨta kaw Mosera. Nu la Aarõ oit ad duwɨna, na ngona Eleajar ɗa kɨlaɓer janyamosɨ gan goota.

⁷ Ɓain lot'n non, awɨn Gudgoda, ɓain Gudgoda awɨn Jotbata, dɔning'n bahg in kamt ngãi.

⁸ Kaglot'n non Bɨraɓe ɔrr girr Lebi ndaa tadang kad to sund kunkɔ nõ Bɨraɓet, kɨ ɗà nõ Bɨraɓet kad ɗa kɨlaɓer loa, kɨ njang dɔ deg kam tɔat, nya'n ndɨ ɗa mbã ɓone.

⁹ Kɨtɔ 'nten la Lebi ngahn gaj lon ke nyakagɓe lon nat kɨ ngankõng al ye. Bɨraɓe i nyakagɓe loa tit'n Bɨraɓe Luwah loi ela'n.

¹⁰ M'ndɨ dɔ mbalbot kàd dɔsɔɔ ndɔ dɔsɔɔ tit kɨkete nõ. Bɨraɓe oo dɔ ko lom kaglot'n non tɔ. Bɨraɓe ndig nuji al.

¹¹ Bɨraɓe elɨm an: I ɓai, aw, i ɔrr ta ɗob deg'n ɗan kad awɨn, taan dɔning nyakagɓet'n m'ndan yo mad bɔwdg kɨ m'ad'd.

Mberkɨnda kɨ dɔ telrogotat ho kɨ tar Luwah ho

¹² Tajigla, Israel, ɗi Bɨraɓe Luwah loi ndɨ sah roit a? Ge kad i ɓool Bɨraɓe Luwah loi, kɨ i ndulo go ɗobg loa tube, kad i tara na i ɗa kɨlaɓer ad Bɨraɓe Luwah loi kɨ ngarkami tube kɨ roi tube,

¹³ kad i ngomgo mberkɨndag lo Bɨraɓe, kɨ tagkɨgang loa'n m'ndai mbera ɓone kɨtakad maj urri.

¹⁴ Oo, dɔrãg kɨ dɔrã kɨ dõ dɔ dɔrãg lo Bɨraɓe Luwah loi, dɔning kɨ nyag kɨ kamt tube in loa.

¹⁵ Be kaa Bɨraɓe hɔ bɔwig sem, tard kɨ ngandg ngékutgod, tit'n i gerɨne ɓone, Bɨraɓe mbedsɨ ku girrdegt tube.

¹⁶ Maj kad i jan gaj ngarkamsɨ, na ot ngɨran kɨgosɨ.

¹⁷ Kɨtɔ Bɨraɓe Luwah losɨ i Luwah lo luwahg, i Bɨraɓe lo bɨraɓeg, i Luwah kɨbo kɨ kɨngang kɨ kɨkootɓool, i Ngekɔrr de dene al, a taa kadkari ji det al tɔ.

¹⁸ Bɨraɓe gangta lo nganhalg kɨ ngéngawkoig goɗobat, tar mbah na ada nyasa kɨ kub.

¹⁹ A i tarɨn mbah kɨta maɗi ĩn mbahg kam dɔning Ejipt't.

²⁰ A i ɓool Bɨraɓe Luwah loi, a i ɗa ɓer loa, a i tĩnyan na sia, na a i nda yo kam tɔat.

²¹ Ĩ la i nya ndub loi, ĩ la i Luwah loi, i Ngeɗa nyag kɨbobo, kɨ kɨkootɓool'n ood kɨ kumi.

²² Lon bɔwig awɨn Ejipt't ye, in deg dɔtanãimɨta, na tajigla Bɨraɓe Luwah loi teli koosɨg tit kɨmẽg kɨ dɔrãt.