Deteronom 1 - Maktub Ta Kumkajir

Maktub ga kam dɔ mberkɨndat

¹ Tag 'nten Moij el Israelag tube gid bah Jurdẽt, kam dɨlambot kɨ sumba nõ Sup mbɨna Parã kɨ Topel, Laban, Haserot kɨ Di Jahab.

² Ndian ndɔ kɨlah gidaikɨɗa ko mbalbo Horebt kɨ ɗob kɨ mbalbo Seirt mbã Kades Barnea.

³ Kam ɓal kɨkõdɔsɔɔ kɨ nah kɨkɨlah gidaikɨɗa kɨ ndɔ kɨ dasa la Moij elɨn ta kɨ Israelag dɔ nyagt tube'n Bɨraɓe ndaa mbera kad eld,

⁴ got'n tetɗɔɔ Sihõ ngar lo Amoriag'n ndɨ Hesbon kɨ Og ngar kɨ Basan'n ndɨ Astarot kɨ Edrei.

⁵ Ko gid bah Jurdẽt Moij yaɓood kɔr girr mberkɨnda 'nten an:

Luwah ndamber tee ngan Israelg Ejipt't

⁶ Dɔ mbalbo Horebt nu la Bɨraɓe Luwah loj elj tat an: I ndɨn dɔ mbalbot'n ɗan kaglo asɨtat oi.

⁷ I ɓain, i son ɗobo awɨn kam dɔning mbalt lo Amoriag kɨ log tube kɨ gug dɔ, kɨ dɨlalo, kɨ dɔning mbal, kɨ hollo, kɨ dɔning kɨ ko dɔɔ, kɨ kad bahbot kam dɔningt lo Kananiag kɨ dɔning Libã mbã baht kɨbo, ad i bah Eprat,

⁸ Oon, m'nda dɔning'n ɗan nõsɨt. Awɨn, i taan dɔning nyakagɓet tit'n Bɨraɓe ndan yo kɨ n'ad bɔwsɨ Abraham kɨ Isaak kɨ Jakob kɨ kohd kɨgodt.

Moij kɔt deg kad gangɨn ta ku ngan Israelt

⁹ Kaglot'n non m'elsɨ m'an: Mĩ kɨ kɨɗambe m'asɨ tosɨ al.

¹⁰ Bɨraɓe Luwah losɨ ad i bɨlan kɨdɔtdɔt na oon, ɓone ĩn koosɨg tit kɨmẽg kɨdɔrãt be.

¹¹ Kɨ Bɨraɓe Luwah lo bɔwsɨg ad i bɨlan kɨdɔtdɔt nja dub na njang dɔsɨ tit'n unɨn kɔn adsɨ.

¹² Titbãi mĩ kɨ kɨɗam m'a m'tosɨ kɨ tag losɨ kɨ gaknag losɨ a?

¹³ I kɔtɨn deg madg kɨ ngéterr kɨ goosɨ ger girrnya'n i gerɨnd ku girrdegt losɨ kad m'ndad dɔsɨt.

¹⁴ I turmɨn anan: Nya'n elj taa kad kɨ ɗa i kɨmaj,

¹⁵ M'ɔi bɨradɔg ku girrdegt losɨ, in deg kɨ ngéterr'n i gerɨnd, m'ndad bɨradɔg dɔsɨt dɔ kɨdubgt kɨ kɨɓug kɨ kɨdɔmig kɨ kɨkɨlahg, bɨradɔg ku girrdegt losɨ.

¹⁶ Kaglot'n non m'nda mber ngégangtag losɨ m'an: Oon dɔ ta lo ngankõsɨ, na i gangɨn ta kɨgoɗobat ku degt, ke ngonkõ ke mbah kɨ ndɨ roat.

¹⁷ A ɔrrɨn de dene kam takɨgangt losɨ al, a oon dɔ ta lo ngon kɨ du tit'n a oon ne dɔ ta lo de kɨbo ye be. Ot ɓoolɨn kum de mad kɨta takɨgang i lo Luwah. Na lon i ngahn ta mad kɨngang tɔi tɔgsɨ a ne, i ɗen ne nomt kad m'oo.

¹⁸ Titbe la kaglot'n non m'ndasɨn mber dɔ nyat kɨɗen'n sumba kad i ɗan.

Ngan Israelag taan ɗɔɔ Luwah Kades Barneat

¹⁹ Kɨ ɓai Horeb kɨ tɔi kam dɨlalot kɨbo kɨ kootɓool'n oon kɨ kumsɨ. J'un ɗob kɨ kaw dɔning mbalt lo Amoriag tit'n Bɨraɓe Luwah loj ndajɨn mbera na kɨ tee Kades Barnea.

²⁰ M'elsɨ m'an: I ɗe teen dɔning mbalt lo Amoriag'n Bɨraɓe Luwah loj ndɨ adj.

²¹ Oon, Bɨraɓe Luwah losɨ ndah dɔning nõsɨt. Awɨn, i taan nyakagɓet tit'n Bɨraɓe Luwah lo bɔwsɨ elɨn. Ot ɓoolɨn, ot kadɨn kamsɨ gang man.

²² Kamla in tube ɗen romt elmɨn anan: Ad kɨ lan deg nõjt kad ndan m'ãi dɔning'n non, na tel ɔrrjɨn hoi ɗob'n sumba kad j'andɨn kam ɓebog'n j'a kɨ j'awɨnt.

²³ Takɔjg 'nten m'oo ad maj na m'ɔi deg kɨlah gidaijoo kusɨt, de kɨɗa ko girrkooj Israelt kɨɗen.

²⁴ Ĩgɨn non la awɨn, tɔin dɔ mbalbot mbã teen hollot kɨ Eskol na nulɨn lon non kɔrikɔri.

²⁵ Jan kand kag kɨ dɔningt'n non jidt ɗen ne adjɨn, ɔrrjɨn hoia anan: I dɔning kɨmaj la Bɨraɓe Luwah loj ndɨ adj ye.

²⁶ Na i ndigɨn kaw al, i tõn ɗɔɔ mberkɨnda lo Bɨraɓe Luwah losɨ.

²⁷ I nyurɨn ta kam kujkubgt losɨ ngutngut anan: I kɨta Bɨraɓe mbetj la teen sej kɔ Ejipt't kad laj ji Amoriagt kɨ nuj'jɨn.

²⁸ Ko kɨɗah j'a kɨ j'awɨnt a? Ngankõj ɗan ad kamj gang man anan: In deg'n bod kɨ ngald tɔijɨn, ɓebog lod ĩn ɓeg kɨbobo, ndogbɔrrag ngalɨn puwuw, j'oo deg kɨ girr Anakia nu tɔ ho.

²⁹ M'elsɨ m'an: Ot ndadɨn, ot ɓoolɨnd.

³⁰ Bɨraɓe Luwah losɨ'n ndia nõsɨt, ĩ kɨdɔn a ɗɔɔ kɨtatɔsɨ tit'n ɗan takumsɨt kam dɔning Ejipt't,

³¹ kam dɨlalot tɔ, oon Bɨraɓe Luwah losɨ tosɨ tit'n de a ton ngonɨn go ɗobt i ndiant mbã i teen nẽbe kam lot'n ɗan.

³² Ke titbe kaa adɨn kamsɨ Bɨraɓe Luwah losɨ al,

³³ in ɔrrsɨ ta ɗob ndɔ kam horrt kad i hɔn londɨt, kada tɔ kam kilndiit kad ɔjsɨ ta ɗob.

³⁴ Bɨraɓe oo dɔ tag losɨ na ɓawong, nda yo an:

³⁵ Ku ngakat kɨmajal'n ɗan de kɨɗa kɨ a oo dɔning kɨmaj'n m'ndan yo mad bɔwsɨg goto,

³⁶ na Kaleb ngon Jepune koon. Ĩla a oo dɔning'n non, ĩ tɔ la m'a m'ada dɔning tube'n ndia kamt, ĩ kɨ nganɨn kɨta ndulo go Bɨraɓe kɨ kam kɨro.

³⁷ Bɨraɓe ɓa sem wong tɔ kɨtatɔsɨ na el an: Ĩ tɔ a andt al ho.

³⁸ Jojue ngon Nun ngekɨlaɓer loi la a andt ye. Ada ɗà bijir kɨta i ĩ la a aw kɨ Israelag ad õn nduba dɔning'n ɗan ye.

³⁹ Na ngansɨg kɨdu'n oon a anan: A ĩn nya tetɗɔɔ, ngansɨg'n ɓone gerɨn tɔrr go nya kɨmaj kɨ kɨmajal al, i in la a andɨnt, ĩng tɔ la m'a m'ad'd dɔning kad i nyakagɓe lod ye.

⁴⁰ Na ĩng i telɨn gog, unɨn ɗob kɨ kam dɨlalot kɨ kaw bahbot kɨkɨɗe.

⁴¹ Kamla i turmɨn anan: Jĩ kɨ ɗamajal kɨ ndoorɨn Bɨraɓe. J'a j'aw, kɨ ɗɔɔ, j'a kɨ ɗa nya kɨɗen'n Bɨraɓe Luwah ndaj mbera. Dekɨɗen kusɨt dɔ nyakat lon ɓont, oo an: Kaw dɔning mbalt i nya kɨkari.

⁴² Bɨraɓe elɨm an: Eld an: Ot kawɨn, ot ɗɔɔn kɨta Mĩ kusɨt al, na ɓeta madngétasɨg tetsɨn ɗɔɔ.

⁴³ M'elsɨ tag 'nten na oon dɔ ta lom al, i taan ɗɔɔ mberkɨnda lo Bɨraɓe na kɨ dɔngang losɨ la awɨn ne dɔ mbalbot.

⁴⁴ Kamla Amoriag ngéndɨ dɔning mbalt tee ndɔdsɨn, tuɓasɨn tit'n tejg a ɗan ne ye be, ndasɨn mbalbot kɨ Seir mbã kɨ Horma.

⁴⁵ I tel i nõn kɨnõ Bɨraɓet, na Bɨraɓe oo dɔ ndisɨ al, nel mbin kɨrosɨt al tɔ,

⁴⁶ kɨta 'nten la i ndɨn ne Kades Barnea ndɔg ngãi, i hɔn londɨ tit ndɔg ngãibe.