Daniel 5 - Maktub Ta Kumkajir

Ji de ndang nya kad kujt Beltasar ɗa mbur nam kɨbo

¹ Ngar Beltasar ɗa mburnam kɨbobe kɨta mbaiɓeg lon kɨdub, na ãi kasɨnduu nõ degt kɨdub'n non.

² Lon Beltasar ɔd kasɨnduu tant ye, el kad ɗen kɨ jo lɔrg kɨ jo larjãg ĩn bɔwɨn ɔidi kam kuj ndub Luwaht kɨ ɓebo Jerusalem kɨtakad ngar kɨ mbaiɓeg lon, kɨ nẽng kɨ dekɨdẽg ngéɗakɨlaɓerg ãin kasɨnduu kam jogt'n non.

³ Taa ne, ɗen kɨ jo lɔrg kɨ jo larjãg'n ɔind kam kuj ndub Luwaht ad i kuj lo Luwah kɨ ɓebo Jerusalemt nõ, na ngar kɨ mbaiɓeg lon, kɨ nẽng, kɨ dekɨdẽ ngéɗakɨlaɓerg ãin kasɨnduu kam jogt'n non.

⁴ Ãin kasɨnduu ndubɨn ne yo lɔrg kɨ yo larjãg kɨ yo ningakasɨg kɨ yo handg kɨ yo kagg kɨ yo mbalg.

⁵ Tentenbe ngan ji de teen hɔi, ndang ta kad bɔrt lo kuj kõɓe sumba kag ndah lambat sew, na ngar oo jin non lon ndangɨn ta.

⁶ Kamla takum ngar ɓa ndà, tagah ad kama gang man, dɔkur gojag tɔr ta nat ad goja ndan na.

⁷ Ngar ko kɨ ndin kɨbobe kad ɗen kɨ ngéndɔndilg kɨ Kaldeag kɨ ngeyog ngéndɔndil dɔ kɨmẽgt. Ngar el ngéterrg kɨ Babilon an: De'n da ta kɨndang 'nten, na ɔrrɨm gira tɔ a ne, a lana kub kɨkɨre wor wor, a lan kɨla ninga lɔr kɔat, a i de kɨ ngekõmɨta dɔ kõɓet.

⁸ Taa ne, ngéterrg lo ngar tube andɨn, na asɨn dan ta kɨndang'n non al, ke asɨn kɔrr girra kad oo al.

⁹ Ɓool tɔl ngar sɔkɨr takuma ba nda, na kam mbaiɓeg loa dand ta pa.

Daniel ɔrr girr taa'n ji de ndang ad ngar oo

¹⁰ Kõ ngar and kam kuj mburnamt kɨta tag lo ngar kɨ kɨ lo mbaiɓeg loa, na el an: Ngar, kɨ i ndɨ kɨ dɔi dõ mbãkɨnõt. Ot kad tagahi ad kami gang man. Ot kad takumi ɓa ndà.

¹¹ De mad i nõ kam kõɓet loi, ndil luwahg kɨkunjɗang i kamat. Kaglot lo bɔwi ngahn kunj kɨ goosɨ ger girrnya kɨ terr tit terr lo Luwahg be kamat na bɔwi ngar Nebukadnesar ndaa bɨradɔ mboolig kɨ ngéndɔndilg kɨ Kaldeag kɨ ngéyog ngéndɔndil dɔ kɨmẽgt,

¹² kɨta ngahn ndil kɨmaj kɨ nyager kɨ goosɨ kɔrr girr niig kɨ goosɨ ger girr terrtag, kɨ goosɨ kɔrr nintag kɨngang kam Danielt'n non in ngar ndah tɔa Beltasar. Maj kad kunɨn Daniel, a adi i ger girr ta 'nten.

¹³ Taa ne, andɨn kɨ Daniel nõ ngart. Ngar el Daniel an: I ĩ Daniel'n non in i kɨkɨɗa ku kɨhɔgt kɨ Juda ĩn bɔwm ngar ɔid ɗe sed nẽbe ko dɔning Judat ye a?

¹⁴ M'oo dɔ hoita loi kad ndil luwahg kɨkunjɗang i kamit, na ngahn kunj kɨ goosɨ ger girrnya kɨ terr kɨmajtɔi kamit.

¹⁵ Ngéterrg kɨ ngé ndɔndilg andɨn nomt kɨta da ta kɨndang 'nten kɨ kɨta kadɨm m'ger gira tɔ, na asɨn korm girr ta 'nten al.

¹⁶ Na m'oo hoita loi, i aw kɨ goosɨ kɔrr girrtag kɨ goosɨ kɔrr nintag kɨngang. Ĩla i asɨ da ta kɨndang'n non na adɨm m'ger girra tɔ a ne, a lain kub kɨ kɨre wor wor, a lan kɨla ninga lɔr kɔit, a ĩ de kɨ ngekõmɨta kam kõɓet.

¹⁷ Kamla Daniel turta nõ ngart, an: I ngom kadkarig loi, i ad nyabajig loi de mad kɨɗang. Titbe kaa ne, m'a m'da ta kɨndang'n non mad ngar oo, m'a m'ɔrra girra tɔ ho.

¹⁸ Ĩ ngar Luwah Ngetɔitɔi ad bɔwi Nebukadnesar kõɓe kɨ tɔg ngãi kɨ tɔko kɨmaj kɨtɔitɔi,

¹⁹ na kɨta tɔg kɨngãi in ada ye, deg tube kɨ girrdeg kɨ dang dang tube kɨ deg tube kɨ ta ɓe lod i dang dang, ĩn kɨ ɓool kɨ rondad nõat. Tɔl deg'n ndig tɔld, na nya deg kɨ dɔd dõ ĩn ndig nyad kɨ dɔd dõ; tɔi deg kɨ dõ ĩn ndig tɔid kɨ dõ, na la dɔ deg kɨber ĩn ndig la dɔd.

²⁰ Na lon dɔa sir ad kama kongkong mbã kad ɗa nya kɨgo lo dɔngangt ye, ɔrrɨna dɔ pong kõɓet loa, ɔrrɨn tɔko loa kɔ tɔ.

²¹ Tuɓana kɔ ku degt, ad hala tel tit hal dã kɨmut be, londia i nat kɨ korrog kɨmut, adɨna mũ kad sa tit mang be, tal hɔ dɔat mbã kad gerɨn Ngetɔitɔi ndɨ õɓe dɔ kõɓet lo deg, na a ad de'n ndig kada.

²² Na ĩ Beltasar, kɨ ngona, i ger nyag'n non tube kaa ne, i sɔl dɔi al,

²³ na i tɔi dɔi kɨ dõ i ndoorɨn Bɨraɓe kɨ dɔrãt dõ ad ɗen kɨ jog ko kam kujt loa kɨnõit, na ĩ kɨ mbaiɓeg loi kɨ nẽig, kɨ dekɨdẽ ngéɗakɨlaɓerg ãin kasɨnduu kamdt ndubɨn ne yo lɔrg, kɨ yo larjãg, kɨ yo ningakasɨg, kɨ yo handg, kɨ yo kagg, kɨ yo mbalg, ĩgɨn oon kɨ kumd oo lo al, mbid oo dɔ ta al, gerɨn nya mad al tɔ ho, na Luwah'n ndɔig i kam jiat, ger ɗobg loi tube ye, i ɔsɨgona al.

²⁴ I kɨta 'nten la, la'n kɨ ngan ji de ad ndang ta 'nten.

²⁵ 'Nten la i ta kɨndang in ndang: Mene, Mene, Tekel, Peres.

²⁶ Girrta 'nten i titbe. Mene: Luwah tɨda ndɔ kõɓe loi, na dɔboia asɨ.

²⁷ Tekel: Ĩn kɨ mbɔj kam nya mbɔj kɔinyat. Na ĩn asɨ al.

²⁸ Peres: Kõɓe loi gang jo, a ad Medeg kɨ Perseg.

²⁹ Kamla Beltasar elta ad lan kub kɨkɨre wor wor ro Danielt, lan kɨla ninga lɔr kɔat, na lan mber dan ne dɔa, anan: I de kɨ ngekõmɨta kam kõɓet.

³⁰ Kondɔt'n non tɔlɨn Beltasar, ngar kɨ Babilon.