Daniel 11 - Maktub Ta Kumkajir

¹ Na mĩ Mikael, kam ɓalt kɨdasa bang lo Darius, de kɨ Mede, m'ɗa kadat kɨta ɗa sia kɨ kad ngang.

² Tajigla m'a m'adi i ger nyag'n ɓet a ɗan nya jeje. Oo, ngarg mɨta a ɓain kam dɔning Perset ɓaitɔ, na ngar kɨkõsɔɔ, a i ngenyamajg tɔid tube, na lon ngah tɔg ngãi kɨtakul nyamajg lon a ne, a sila deg tube kad n'ndoorɨn kõɓe lo Grekg.

Ɗɔɔ to mbɨna ngargt kɨ ɓodo kɨ dɔɔ

³ Na ngar mad kɨ i kɨrãɗɔɔ a ɓai, a õɓe dɔ dɔninggt kɨ tɔg ngãibe, na a ɗa kɨgo ndigt lon.

⁴ Na lon ngah tɔg a ne, kõɓe loa a so, kɨ kegɨna kɨgo kogt kɨsɔɔ, ĩn nélg kɨsɔɔ a ɓaint, na a adɨn kõɓe loa ngakat kɨ ngaka al, kõɓe a i kɨ tɔg ngãi tit kɨkete al tɔ, a ɔrrɨn kõɓe loa kɔ, a adɨn deg madg, na ngakaa al.

⁵ Kamla ngar kɨɓodo a ngah tɔg ngãi, na kɨkɨɗa ku mbaiɓegt loa a tɔia kɨ dõ.

⁶ Go ɓalgt kɨ asɨ tat ye, a unɨn kɔd adɨn na, na ngon kɨdẽ lo ngar kɨɓodo a taa ngar kɨdɔɔ kɨtakad ladɨn nooj nat, na tɔg ji ngon kɨdẽ'n non a tokɨnõt al, ngawa kɨ ngana a ndɨn kɨ dɔd dõ al tɔ, a lan ngon kɨdẽ'n non kɨ koit nat kɨ ngékɨlaɓerg loa kɨ ngona kɨ ngeɗasia ad i ngawa kaglot'n non.

⁷ Na de mad girrkoojt loa, a ɓai ga goot bɔwa, a ɗe ɗɔɔ kɨ bahkad koosɨ ngéɗɔɔg lo ngar kɨdɔɔ, a and kam kuj ngomdɔɓet loa, a dum dɔd, a tetd ɗɔɔ.

⁸ A ɔi yog lod kɨ ɓakumta nyag lod kɨlẽ kɨjoo lɔrg kɨjoo larjãg lod kɨ gatd i ngãi awɨn dɔning Ejipt't, na a ta ko dɔ ɗɔɔt kɨ ngar kɨdɔɔ ɓal madg.

⁹ Kamla ngar kɨdɔɔ a ɗe kɨ ɗɔɔ kam kõɓet lo ngar kɨɓodo, na tɔga a asɨ al; a tel dɔningt lon gog.

¹⁰ Na ngan ngar kɨdɔɔ a ɓain kɨ ɗɔɔ, a kawɨn bahkad koosɨ ngéɗɔɔg kɨnat, a awɨn tit mankõn be, a tɔin, a ɗɔɔin mbã kɨ kuj ngomdɔɓe lo ngar kɨɓodo.

¹¹ Kamla wong a tɔl ngar kɨɓodo sɔkɨr, a tee, a ɗɔɔ kɨ ngar kɨdɔɔ, ĩ tɔ a ɓai kɨ bahkad koosɨ ngéɗɔɔg, na a lan bahkad koosɨ ngéɗɔɔ'n non ji ngar kɨɓodot.

¹² Na lon a hɔ bahkad koosɨ ngéɗɔɔ'n non a ne, dɔa a sir, a tɔl deg dubg nja kɨlahg, titbe ka a dum dɔ al.

¹³ Kɨtɔ ngar kɨdɔɔ a ɓai kɨ bahkad koosɨ ngéɗɔɔg ngãi tɔi kɨkete nõ, na go ɓalg madgt ɗe dɔat kɨ bahkad koosɨ ngéɗɔɔg kɨ nyaɗɔɔg ngãibe tɔ.

¹⁴ Na kaglot'n non ye, deg ngãibe a ɓai ndoorɨn ngar kɨɓodo, na deg kɨ ngéɗa ta kõ ku degt loa a ɓain kɨta tɔlkon nyakookamndilt 'nten, na a son.

¹⁵ Kamla ngar kɨdɔɔ a ɗe, a ad ɓan ning kɨ dõ kad ndogbɔrr ɓebot, na a ta ɓebo kɨngang'n non. Koosɨ ngéɗɔɔg kɨɓodo kɨ gõɗɔɔg kɨkɔt lo ngar a ɗan loɗadt al kɨta tɔgd kad ɗan ne loɗadt a goto.

¹⁶ Na ngar kɨdɔɔ kɨ a ɗe ndoora ye, a ɗa kɨgo ndigt lon; de mad kɨɗa kɨ a ɗa loɗant nõat a goto, a ɗe kam dɔningt kɨmaj ngãi ad i dɔning Israel, na dɔning'n non tube a so jiat.

¹⁷ Kamla ngar kɨdɔɔ a ndah kamɨnt kad ɗe kɨ tɔg kõɓe lon tube, a ɗe kɨ kɔjtag kɨtakad ĩ kɨ ngar kɨɓodo lan ne nooj nat, na a ɗa kɨgo kɔjtagt'n non, a ad ngar kɨɓodo ngonɨn kɨdẽ kad ta'n kõɓe, na maj a ura kam kɔjtaɗat loa nõ al, a taa kõɓe kɨɓodo al.

¹⁸ Kamla ngar kɨdɔɔ a ɓet tan kɨ dɔninggt kɨkad bahbot ko lokudkàdt, na a taa dɔningg madg ngãibe tɔ, kamla bɨraɗɔ mad a ad nyaɗaa kɨgo lo kidt tɨga, tel so dɔat gog.

¹⁹ Taa ne, ngar a nda kumɨn go ɓebogt kɨngang kɨ ɗan kɨ kuj ngomdɔɓegt kɨ kam dɔningt lon kɨ kɔsɨ dɔn. Na i nya mad al. Na oi, kanj kad de mad oo banga lo madt.

²⁰ Goot gog de mad a ɓai ga goota, a la kɨ de ngetaa nya ji degt kɨ lo ngetɔgt kam dɔninggt kɨmajtɔi kam kõɓet lon, na go ndɔgt ngãi al a tɔlɨna, a i ta ɗɔɔt al na ĩ ta kɨ laber.

²¹ Na de mad kɨ kari pãbe la a lan kõɓe jiat ye, i de kɨ sumba de ndah ngart al. Na taa kõɓe kɨ goɗob kɨ gootal kɨ ndo deg kɨ tag kɨ to pehpeh. I kaglo'n deg ndɨn kɨ lapia.

²² Koosɨ ngéɗɔɔg kɨ asɨn tetɨnɗɔɔ goto ãin nõat tit mankõ be, a tetɨnd ɗɔɔ, na a tɔl bɨra ngejamosɨkadkari tɔ ho.

²³ Na ngar'n non lon un kɔn kɨ de mad a ne, i kɨgo lo ndokumt, a ɓai aw ɗɔɔ kɨ de'n non, a ngah tɔg kɨdɔt dɔt. Deg ngãibe a son goat.

²⁴ Lon deg a ndɨn lom ye, a and kam dɔningt'n kand nyag kɨmaj ngãi tont mbuj kam nusɨ dɔningt kɨ Ejipt, a ɗa nya'n bɔwag ke kaag maɗi nu ɗan al, a keg nya kɨ ɓoog ad deg kɨ ngéndulo goa, kɨta a ɔj ta kamɨnt kad kɨ n'taa kuj ngomdɔɓeg, nya 'nten a ɗa nya kaglot kɨ tẽbe.

²⁵ A ɓai kɨ tɔgɨn, a ire kamɨn ngang kad ndoorɨn ngar kɨɓodo kɨ koosɨ ngéɗɔɔg, na ngar kɨɓodo a ɓai aw ɗɔɔ sia kɨ bahkad koosɨ ngéɗɔɔg ngãibe, na ngar kɨɓodo a asɨ al, kɨta deg a lan tad ber ndoorɨna ne.

²⁶ Kɨtɔ, deg'n in nat sia, ndɨ san sia kɨɗabe la tujɨna, na ngar kɨdɔɔ a tuɓa bahkad koosɨ ngéɗɔɔg loa, na deg ngãibe a oin.

²⁷ Na ngarg kɨjoo'n non a san ta tabɨlt kɨɗabe na kamd a sah ɗob kɨta ɗa majal kɨ na koon, tag tube a elɨna ye, i tag kɨbal. Na takɔj lod i kari kɨndang kɨta dɔboi nyag a ɗen kɨ kaglo'n i kɨ gang kete woi.

²⁸ Ngar kɨdɔɔ a tel kɨ dɔningt lon gog kɨ nyamajg kɨngãibe. Goot gog a nda kamɨnt kad kɨ n'ɗɔɔ kɨ deg lo kunkɔ kɨjaɓat; a ɗa kɨgo ndigt lon kamla a tel kɨ dɔningt lon gog ɓaitɔ.

²⁹ Kaglo'n i kɨ kɔj kete woi ye, ngar kɨdɔɔ a tel ɗe gog kam dɔningt kɨɓodo, na kaw ɗɔɔ loa kɨdɔboit ye, a i tit kɨ kɨdasa al.

³⁰ Kɨtɔ deg kɨ ko lokudkàdt a ɗen kɨ toog kɨbo kɨ Kɨtim ad Sipɨr ɗɔɔn sia, a ndana ɓoolt, ad a tel kɨgog. Taa ne, a ɓan wong kɨ tɨngabil kɨ deg'n Luwah un kɔn ad'd. Na a nda ron kɨɗabe nat kɨ deg'n mbetɨn kunkɔ lo Luwah.

³¹ A la kɨ koosɨ ngéɗɔɔg lon, kad yerrɨn kɨ kuj kɨjaɓat kɨ kuj ngomdɔɓe, a ɔgɨn dɔ kadkari kɨlahorrt. A udɨn nya kɨyerr kɨ ngenujɓe ad ɗa dõ.

³² Ngar ĩ kɨɓe kɨ dɔn kɨtakul tag kɨ to pehpeh kɨ taat, a ndoo deg kɨ ngétɔi dɔ kunkɔ lo Luwah, na deg kɨ ngéger Luwah lod a ɗan loɗadt bijir, na a ɔjɨn kadkam lod kɨ tɨga wakɨsɨ.

³³ Ngényager kɨmaj ku degt'n non a ndoon deg ngãibe, na kam kaglot kɨ tẽbe a tɔlɨn kɨmad kɨ kiyaɗɔɔ, kɨ mad horr a hõd, na kɨ mad a hɔnd ɓert, a tirɨn nyag lod pur.

³⁴ Kaglot'n non i kaglo'n deg dain yod titbe a ne, de kɨ kad ɗa sed kɨ jaraw. Deg ngãibe a ndulon god kɨgo lo ndokumt.

³⁵ Na kɨmadg ku ngényager kɨmaj'n non a ɔin na koi lod a i ta ɗob kɨ tee kɨta kad girrdeg lo Luwah telɨn kɨ kar nyang, na kɨ ɗan go ron kɨta kaglo kɨ dɔboit. Kɨtɔ nya 'nten a ɗa nya kaglot kɨ gang kete woi.

³⁶ Ngar'n non a ɗa kɨgo ndigt lon, a tɔi ron, a tɔi dɔn kɨ dõ dɔ luwahgt tube, a eltag kɨbobo ndoorɨn Luwah lo luwahgt. Maj a urra kam nyagt tube'n a ɗa mbã ndɔt'n wong kɨtɔlsɔkɨr lo Luwah a mbagɨr. Luwah a tɔlkon nya'n ndambera kad'n ɗa.

³⁷ A tur go luwahg lo bɔwɨng al, ke nyandɨg lo dekɨdẽg, ke luwah mad kɨɗang kɨta a tɔi dɔn kɨ dõ dɔdt tube,

³⁸ na a ɔsɨgon luwah mad kɨ ngeɗa sia kad taan kuj ngomdɔɓeg gan goot luwahg'n non, a ad luwah mad'n bɔwag gerɨna al lɔr kɨ larjã kɨ medkɔsɨg kɨ gatd i ngãi ɔsɨn gon luwah'n non.

³⁹ A taa kuj ngomdɔɓeg kɨngang ngãi kɨtakul tɔg lo luwah mad kɨmbah, na deg'n ndɨgna luwah kɨ mbah'n non a ne, ngar'n non a tɔid kɨ dõ kɨ kɔsɨgon. A tel deg'n non ngékõɓeg dɔ degt ngãibe, na a kegd dɔning nyabajit lod.

⁴⁰ Kaglot kɨdɔboit, ngar kɨɓodo a tee kad ɗɔɔ kɨ ngar kɨdɔɔ'n non, ngar kɨdɔɔ a hura yedeng tit nélbarwãi be, kɨ pusɨɗɔɔg kɨ ngékal sɨndag kɨ too kɨbo kɨta kaw ɗɔɔg ngãibe, a andɨn kam dɔninggt kɨ dang dang, a nda lo gang na a taa lo tit man kɨ tɔi dɔ kongɨr,

⁴¹ A and kam dɔningt kɨmaj ngãi, ad i dɔning Israel. A tɔl bahkad koosɨ deg ngãibe, na dɔning Edom kɨ dɔning Moab kɨ Amoniag ngãibe a teen jiat kɔ.

⁴² A la jin taan dɔningg kɨ dang dang, na dɔning Ejipt a tee jiat al.

⁴³ A tɨr nyamajg ad i nya lɔrg kɨ nya larjãg kɨ nyag kɨ gatd i ngãi kɨ kam dɔning Ejipt't tube ndɨdɔt, na Libiag kɨ Etiopiag a dɔd girr tɔgt.

⁴⁴ Na hoitag kɨ ko loɓakàdt kɨ ko dɔɔ a ad kama gang man, a tee kɨ wong kad n'awɨn tɔ koh deg ngãibe, kɨ'n nujd kɔ.

⁴⁵ A ɗa kujkub lon kɨmaj tit kuj kõɓe be kɨ dõ mbɨna bahbot kɨ mbalbo kɨjaɓat kɨ kɨmaj dum, titbe kaa ne, a tee dɔngoint, na de mad kɨ ngeɗasia a goto.