Aje 2 - Maktub Ta Kumkajir

Bɨraɓe sɔl kam deg lon

¹ Bal ngar Darius kɨ ngekõjoo kɨ nah kɨkõtanãimɨta kɨ ndɔ kɨdɔjoo gidaikɨɗa lo nah'n non ye. Ta lo Bɨraɓe ɗe kɨtakul Aje, ngekelta kɨta Luwaht, an:

² I el Jorobabel ngon Salatiel, ngekõɓe kɨ Juda, kɨ Jojue ngon Josadak bɨradɔ ngejanyamosɨ kɨ ndeg deg, an:

³ Nõ nãi kusɨt ĩn oo kuj'n ɗan kɨ majkooa kɨkete a? Na tajigla i oona titbãi a? I tit nya kɨkari takumsɨt ale?

⁴ Kɨtɔ 'nten la mĩ Bɨraɓe m'ndɨ m'eli m'an: Ĩ Jorobabel i hɔ roi ngang tajigla ĩ Jojue ngon Josadak bɨradɔ ngejanyamosɨ, i hɔn rosɨ ngang ĩn girrdeg tube kɨ dɔningt, I ɗan kɨla kɨta mĩ nat sesɨ kel Bɨraɓe Ngekoosɨg,

⁵ kɨgo kunkɔt'n hã m'un m'adsɨ kaglot kɨ i teen Ejipt't kɨtɨga Ndilɨm hɔlondɨ dãsɨt. Kɨtɔ 'nten, ot ɓoolɨn.

⁶ Kɨtɔ mĩ Bɨraɓe Ngekoosɨg la m'el man: Nãi kaglo sĩ kad m'a m'ye dɔrãg kɨ dɔning kɨ bahbo kɨ ning kɨtut nja kɨɗa ɓaitɔ.

⁷ M'a m'ye girrdeg tube kɨtakad nyamajg lo girrdeg tube a ɗen na m'a mad kuj'n ɗan ɗoosɨ kɨ majkoo, I mĩ Bɨraɓe Ngekoosɨg laa m'un ndim titbe ye.

⁸ Nar arjã i lom, nar ɔr i lom, kel Bɨraɓe Ngekoosɨg.

⁹ Majkoo kuj'n ɗan kɨdɔboit a tɔi kɨdasa, kel Bɨraɓe Ngekoosɨg, na kam lot'n ɗan m'a mad lapia i tit, I mĩ Bɨraɓe Ngekoosɨg la m'elta titbe ye.

Nya kɨkar kɨ nya kɨyerr

¹⁰ Ɓal kɨ ngekõjoo kam naht jikɨɗa ndɔ kɨ dɔjoo gidaisɔɔ'n ngar Darius õnɓe ye, Bɨraɓe kɨ Ngekoosɨg elta ngekelta kɨ ta Luwaht Aje gog an:

¹¹ Titbe kel Bɨraɓe Ngekoosɨg: I ndɨje ngejanyamosɨ ta 'nten do mberkɨndat;

¹² Ĩla de mad to dan kɨjaɓat ta kubt lon na kub loa ɔd bɨna, ke nyasa, ke man nduu, ke yib, ke nyasa kɨɗang, nya'n non a tel kɨjaɓat a? Ngejanyamosɨ turɨn anan: Ã ã.

¹³ Kamla Aje el an: Ĩla de mad tel kɨyerr kɨta kod nin a ne na ɔd nya kɨɗa ku nyagt 'nten ye, nya 'nten a tel kɨyerr to a? Ngéjanyamosɨ turɨn anan: A tel kɨyerr.

¹⁴ Kamla Aje tur an: Titbe tɔ la deg'n ɗan kɨ girrdeg'n ɗan kɨnomt, kel Bɨraɓe. Titbe kɨlaɗa jid tube kɨ kadkarig kɨ lan admɨn nõ ĩn kɨyerr.

¹⁵ Na tajigla m'kɔsɨ kad i gan kamsɨ maj dɔ nyat'n hã a ɗa nya nẽbe kɨnõt. Kete lon ndan mbal dɔ mbalt kam kujt kɨjaɓat lo Bɨraɓe al ɓaitɔ nya ɗi ɗa nya a?

¹⁶ Lon awɨn lot'n ɓukɨn nya tit asɨ ngo tɔrr nya dɔjoo a ne, ngahn kamt kɨlahbe koon na lon awɨn ta gor man nduut kad ɔdɨn asɨ ngo tɔrr nya dɔmi a ne, ngahn kamt dɔjoo be koon.

¹⁷ M'ndasɨ kɨ kand kɨlaɗasɨ tube, mad ndulo kɨ ba muro kɨ tuj kɨtakul kɔsɨndii, be kaa i telɨn kɨromt al, kel Bɨraɓe.

¹⁸ I gan kamsɨ dɔt maj, ndot kɨdɔjoo gidaisɔɔ lo nah kɨkõjikɨɗa, ndɔ'n ndan ne girr kuj kɨjaɓat lo Bɨraɓe, i gan kamsɨ dɔt maj.

¹⁹ Kumnya nãi kam damt nõ ale? Ke nduu, ke kag mbaiɓood, ke kag grenadie, ke kag olib, andɨn ale? Nẽbe kɨnõt m'a mad maj urrsɨ.

Jorobabel, ɓer lo Bɨraɓe

²⁰ Ndɔ kɨdɔjoo gidaisɔɔ lo nah'n non ye, ta lo Bɨraɓe ɗe ro Ajet nja kɨ ngekõjoo, an:

²¹ El Jorobabel, ngekõɓe kɨ Juda, an: M'a m'ye dɔrãg kɨ dɔning,

²² m'a m'nuj pong kõɓeg tube, m'a m'nuj tɔg kõɓeg lo girrdeg tube, m'a m'tɔsɨ pusɨɗɔɔg kɨ ngekald tu, m'tɨla, sɨndag kɨ ngékald a tuson, dekɨɗen a so kɨta nyakat lo madɨn.

²³ Na kam ndɔt'n non, m'a m'la kɨla kɨbo jiit Jorobabelt kad ɗa kɨta ĩn Jorobabel ĩ ɓer lom, m'a m'ndai tit kase kɔsɨdɔnya be kɨta m'kɔti, 'Nten la i takelɨm mĩ Bɨraɓe Ngekoosɨg ye.