Daniyeli 3_2 - BIBLIYA NTAGATIFU OMU MASHI

Okumanywa kw’ecisômerîne

⁹¹ Okubundi, mwâmi Nabukondonozori anacifuduka, ayimuka duba duba anacibwîra abagula bâge b’ihano, erhi: «Ka rhurhakwêbire omu muliro balya bantu basharhu erhi banali bashwêke?» Banacishuza mwâmi, mpu: «Nêci, kwo binali ntyo, waliha mwâmi!»

⁹² Naye ashubiza ababwîra, erhi: «Ci niono mbwînage bantu bâni barhali bashwêke bajà balambagira omu muliro barhanalu­mwa; n’enshusho y’oyôla wa kani eshushire mugala wa banyamuzinda».

⁹³ Oku bundi Nabukondonozori anaciyegêra aha muhango gw’erya ndugurhira y’omu­liro aderha, erhi: «Sadraki, Mesaki n’Abednego, barhumisi ba Nyamuzinda w’Enyanya bwenêne, muhuluke omwo muyishe!» Oku bundi Sadraki, Mesaki n’Abednego banacihuluka, barhenga omu muliro.

⁹⁴ Abarhambo bâge, abambali, abarhambo bâge b’akashala n’abahanûzi bâge, erhi babà bamashûbûza­nya, balola, babona oku gurhahumire oku mubiri gwâbo, n’oku emviri z’oku irhwe lyâbo zirhàbabusire, n’ebishûli byâbo biciri bigumagumà n’oku barhana­gwêrhi kabayo ka muliro.

⁹⁵ Nabukondonozori aderha erhi: «Ayâgirwe Nyamuzinda wa Sadraki, Mesaki n’Abednego ye warhumaga bamalahika bâge mpu balikûze abarhumisi bâge abamwikubagira, bàtwa irhegeko lya mwâmi, bahûna emibirî yâbo ahâli ha okukolera n’okuharâmya owundi nyamuzinda orhali nyamuzinda wâbo.

⁹⁶ Namâtwa alula lushika: Ngasi muntu, abè wa lubaga luhi, abè w’ishanja lihi, abè wa lulimi luhi, erhi ankaderha ebigalugalu ebiyere­kire Nyamuzinda wa Sadraki, wa Mesaki n’Abednego, oyo muntu banamurhole bihimbi bihimbi n’enyumpa yâge bayihongole ebè cirundo camvu, ebwa kubà ntà wundi nyamuzinda wankahasha okulîkûza abantu okwa bene okûla.»

⁹⁷ Oku bundi mwâmi aganûziza Sadraki, Mesaki n'Abednego omu cihugo ca Babiloni.

IV. Ebindi bilôrho bya Nabukondonozori

⁹⁸ Niene Mwâmi Nabukondonozori, oku mbaga zoshi, oku mashanja n’oku bantu ba ngasi lulimi bayûbasire omu igulu lyoshi; mmulongîze omurhûla munji bwenêne!

⁹⁹ Namâbona oku kuli kwinjà mbabwîre n’ebirhangâzo Nyamuzi­ nda, Ow’Enyanya bwenêne, ajizire oku bunguke bwâni.

¹⁰⁰ Ebimanyîso byâge biri binene, mushâna! N’ebirhangâzo byâge biri bya kusômeza bwenêne! Obwâmi bwâge buli bw’ensiku n’amango! N’obuhashe bwâge burhenzire oku iburha kujà oku lindi!