Proverbs 7 - Ohiatonhseratokénti

¹ Konién꞉ʼa sehià꞉rak tsi nahò꞉ten ká꞉ton tánon tóhsa nonwén꞉ton sasaʼnikónhrhen tsi nahò꞉ten ká꞉ton tsi nénhshiere.

² Thóh ná꞉tsehr tsi nahò꞉ten ká꞉ton tánon enhshónhnheke. Seʼnikón꞉rarak íhtshehr tsi ní꞉ioht tsi konrihonnién꞉ni tsi ní꞉ioht tsi seʼnikón꞉rare ne skahrà꞉ke.

³ Sateweién꞉ton tiótkon tsi ní꞉ioht tsi konrihonnién꞉ni, shiá꞉ton ne serià꞉ne.

⁴ Tasateweienʼtón꞉hahs nattokháhtshera tsi shí꞉ken ní꞉ioht ne saʼtsí꞉ʼa tánon ne kaʼnikonhraientáhtshera tsi shí꞉ken ní꞉ioht nakwáh ákta tsi tsatén꞉ro.

⁵ Ne kí꞉ken enkenikwé꞉ni nahsatatiaʼtohtáhrho nakó꞉ren ronnón꞉kwe rotiniá꞉kon tánon kí꞉ken konnón꞉kwe teiotiʼwennatsikhè꞉tare tánon naiesaʼnikonhrotá꞉ko.

Ión꞉kwe Ne Waʼthonwisenʼtsheráksen

^6-7 Énska iaʼká꞉ienhte iewakatké꞉tote tekatsiserá꞉ton tsi wakenónhsote, roʼnatsokowanen waʼkhé꞉ken ratinekénhteronʼs ne haróʼkho tehonateʼnikónhrison, shaiá꞉ta ká꞉ti waʼkáttoke tehotenonhwarorí꞉tonte.

^8-9 Eʼthó í꞉re ohahà꞉ke ákta tsi nón꞉we nikèn꞉teron kí꞉ken ión꞉kwe, oʼkarahsnéha ó꞉nen shaʼtetió꞉karas.

¹⁰ Eʼthó nontá꞉we waʼthiatátken, iotatkwatákwen tsi ní꞉ioht ne waʼthonwisenʼtsheráksen tánon ioteʼnikonhronnihátie.

¹¹ Ioianerenhseráksen tánon iáh teiotehenhserá꞉ien tiótkon ohahà꞉ke í꞉wes,

¹² tókaʼ tsi tekaiosaien sewatié꞉ren ó꞉ni tsi iontkehrontáhkhwa tiohrhá꞉re.

¹³ Iahohnià꞉sa ne ranekénhteron tánon waʼthonoronhkhwánion, waʼthotká꞉neren rakahrà꞉ke, sók wakèn꞉ron,

¹⁴ “Ón꞉wa wenhniserá꞉te iaʼkerihwaié꞉rite aterennaientahtsherá꞉kon tsi waʼkonwanatiaʼtátshaʼahte ne katshé꞉nen tánon onkwatá꞉tenre noʼwá꞉ron. Káts skátne tetiatská꞉hon.

¹⁵ Sók kiʼ takoniaʼtisákha. Tewakatonhontsó꞉ni nakoniaʼtatshén꞉ri tánon heh, kenʼ íhseʼs!

¹⁶ Wakatenaktahserón꞉ni wahsohkwí꞉ios ionnitskaráhkhwa né꞉ne kwáh tioiánere Egypt nitioné꞉non.

¹⁷ Iontiaʼtakonʼonhstáhkhwa tánon niaʼté꞉kon wenhserákonʼs tewakátion nakenaktà꞉ke.

¹⁸ Káts ká꞉ti! Ahsontakwé꞉kon tsi tentiatatenó꞉ronhkwe, eniontiatonhnhá꞉rake tsi teniontiatatienawá꞉kon.

¹⁹ Iáh tehèn꞉teron ne ionkeniniá꞉kon, í꞉non tsi nón꞉we niehawé꞉non.

²⁰ Wé꞉so iehohwístenha tánon iáh thaonsá꞉rawe tsi niió꞉re teiahiakserà꞉ke.”

²¹ Wahoskanékten ká꞉ti, tsi naʼteiowennatsikhè꞉tare tsi ní꞉ioht tsi ióhthare tho kiʼ niahoʼnikonhrénhawe.

²² Thontaiawénhstsi ká꞉ti waháhsere, rohsharí꞉ne tsi shí꞉ken ní꞉ioht ne teiotiná꞉kares waʼkonwarióhsere, tsi shí꞉ken ne oskenón꞉ton iotiaʼkaróntion tsi nón꞉we tewaterístaien

²³ tsi nón꞉we ne kaièn꞉kwire tenwáweste awerià꞉ne. Thóh ní꞉ioht ne ráonha tsi ní꞉ioht ne tsítenha waʼoié꞉na aʼá꞉rakon—iáh tehattókas tsi iótteron tsi rónhnhe.

²⁴ Ó꞉nen ká꞉ti kwaienʼokón꞉ʼa kwáh tokén꞉ʼen takwatahónhsatat tsi nahò꞉ten enkí꞉ron.

²⁵ Tóhsa sewathón꞉tat kí꞉ken niionkweʼtò꞉ten iakáhawe ne sewé꞉ri, tóhsa sewaiaʼtisákha.

²⁶ Áonha tkarihón꞉nis ronatiokowánen ronnón꞉kwe waʼakokarón꞉ni kenheiáthne iehoné꞉non, só꞉tsi ronatiokowánen nahonwanahsete.

²⁷ Tókaʼ thóh iénsewe tsi tkèn꞉teron, í꞉se ó꞉ni eʼthó ensewaiaʼtarátie tsi tionhwentsà꞉te ne ronenhé꞉ion. Kenʼniiohahésha ne kenhé꞉ion.