Yeemagonɛi
Pɔɔl gɔlɛi Filipaiblɛisia gama i nyɛini sɔsii yeehaalayei gama lɔ i dawoni nuu gowei lɔlei hu, mia Romableisia ti laa wa yila hu na la a Masidonia. Kɔlɛi ji nyɛi gbeli bɛni kinii kpemɛi ma lɔ tomɔi yɛ kpindi wɛleibu, kɛɛ a yeewatii na bɛɛ ma ngi lii gama vawɛingɔ yɛla ji Kristimablaa wekeisia ti hiyeni ti looni kpayangɔ ngi baahu, tawao ndii nyani wa ngi houlɔ ndɛɛ gaai va ti yɛ kɛ sɔsii na hu na yɛ Filipai. Na hu gbi, kɔlɛi ji lɔ fɛfɛ lɛndɛi vɛma a kohunɛ taa liiloma hu wee na yeekohu a gu i gɛ i gbuama lanaya kpaukpau ma i yɛ Pɔɔl wɛ Yesu Kristi hu.
Haala sabui Pɔɔl kɔlɛi ji nyɛini yɛni a siɛgbua valɔ Yesu mablɛisia ma ti yɛ Filipai lɔlei hu mboya hani yoyo va ngi wɛ kpɔma yɛva ngi ma a watii ma hami ngi houni. I lapi lɔ yeewatii ji ma i ndiigba ve ti wɛ, aako ndiilo i yɛ ti wɛ kɛɛ liiloma kia bɛɛ kpundɛngaa kpɛlɛɛ gulangɔ yɛla ngi ma kɛɛ na tia vuii bɛɛ ma. Yɛ ti dae le taa ti lemu ma ti tia yekpe mayei kia Yesu piela tao hani mani yee hulewengɔi aa lewe ti lii woma kɛɛ huwɔɔlɛi. I hitɛilɔ ti nɛmahu yɛ ji taa Kristi-ni ti wilinga hu ti makpɔnga ndɛvui ma, i yɛni a ngauwanda lɔ Ngewɔ i ti mboyanga la lanaya woma gbama polouŋ va, kɛɛ taa gilila kɛ koloya va le Juubleisia ti jawa houla woma. Pɔɔl lilɔ gulɔma a kɔlɛi nyɛi la kɔloongɔ kohunɛ ma, kɛɛ ndiilɛli, na Ngewɔ a fe nasia wɛ tia Kristi-ni ta wilihu.
Kɔlɛi ji la liigbangɔi kpɔtu kohunɛ ma, kɛɛ liiloma, kɛɛ ngoyilɛi, kɛɛ ndiihou Kristimableisia ti lalei hu kɛɛ ti luvayii hu. I kɛilɔ gbɔma leiŋ ndoma wai na i yɛ Pɔɔl lii hu sɔsii na va yɛ Filipai.
NGUISIA KƆLƐI JI GOOHU
Magonɛi 1.1-11
Pɔɔl mahindeisia a ngi wumayee 1.12-26
Tuvayii Kristi hu 1.27—2.18
Hugbatɛi Timoti va taa Ipafɔditɔsi 2.19-30
Dahiisia kɔlooni juwuisia ma kɛɛ kpundɛ hindeisia 3.1—4.9
Pɔɔl taa ngi ndiamɔisia Filipai lɔlei hu 4.10-20
Kɛlɛma yɛpɛisia 4.21-23
