FILIPAIBLƐISIA 3 - Ngowili Yekpei Numu Kpɛlɛɛ Va

Ngewɔ A Yee Numu Wote A Pɔɔnamɔ

¹ Nya mbaa Kristimableisia, pɛiŋ ngi yaa kɔlɛi ji gɛlɛ, nya longɔ ngi nde ngɛɛ wu goohunɛɛ jifa wua Ndemɔi-ni wu wilingɔ hu. Ɛɛ yɛ a mɔnɛ gbi nya va lajiava hindei nasia hu ngi nyɛinga ngovama, tawao ngi lajiangaa ti hu, kpundɛi na i wu mahu, mahu a yeilɔ.

² A wu mahugbe a nasia ta hinda nyamuisia wie, ngilangɛi nasia, nungei nasia ti nɔɔngɔ hu tɛɛ kɛ ta numu luwui lewe ma.

³ Mua mia mu heingɔ bili yeekpekpei ya, yeenungei nasia ii le, ajifa mua ma Ngewɔ vɛli ngi Yafei gbɔmi hu lɔ, tawao gbɔma mu goohu nɛngɔ jifa mua Yesu Kristi-ni mu wilingɔ hu. Muii lani a hindei nasia nungaa ta pie ti luwui lewe gomɛisia hu.

⁴ Nga gulɔ vulii a hɛlɛla a hinda bondɛi nasia. Ina numu gbi langɔe la kɛ a gulɔ a hɛlɛla a ngi luwui lewela ma, sabu gboto lɔ nya wɛ tewengɔ ti ma pieva hii.

⁵ Ajifa ti nya leni hoki yila kɛ ti nya heinga bili ya, Isrɛlmɔ mia a nge ndavengɔ, ngi gbuani Bɛnjami bembei hu lɔ, Juumɔ a nya kɛkɛ kɛɛ nya nje. Juubleisia ti Jawei houla va, Farisiimɔ lɔ wɔɔ a nge,

⁶ tawao na kpewengɔ waa yɛla nya ma, tamia a juwuya hitɛ la Kristimableisia wooma. Ina Sawei houla a gulɔ i numu yɛ a pɔɔnamɔ, kɛ nyamu yakpe bɛɛ ngii kani.

⁷ Kɛɛ hindei kpɛlɛɛ wɔɔ ngi mbumbuni a nafa hinda, ngii yaa mbumbuni a gbɛogbɛ na va Kristi i pienga nya wɛ.

⁸ Hindei nasia lekee ii le, ngi hani kpɛlɛɛ wumbunga a gbɛ-o-gbɛ yee na va ngi jɔngɔi lewengɔ polouŋ ti ma, tamia a nya Lemɔi Yesu Kristi gɔlɛi. Ngi va lɔ ngi hani gbi wilinga; ngi ti kpɛlɛɛ wumbunga a manɔhɔ gbama lɔ, aako ngi yɛ a Kristi woo,

⁹ mua ta mu wili hu pandawanda. Pɔɔnamɔ yaa gbɔma a nge Ngewɔ yama hindei nasia va ngi pienga, pɔɔnamɔi na nyɔkɔ numu a wote la ji a Sawei hou. Ngewɔ i nya yɛnga na a pɔɔnamɔ jifa nya langɔ a Kristi; pɔɔni na a gbua Ngewɔ gama jifa nya langɔ a Kristi.

¹⁰ Na lekee kpewengɔ nya ma tamia a ji mua Kristi ma wili hu, kɛɛ kpayei na yayenge i ngi hiyengɔi hu hee hu, kpaalɛi nasia ti lani ngi ma, nyɔkɔ i la nya ma, ngi hee na nyɔkɔ wie i pieni,

¹¹ nya lii ma ngɛɛ Ngewɔ a nya bɛɛ wumbulɔ hee hu i nya vulu.

Piimɛi Mawaa Majɔɔva

¹² Ngii ndema ngaa yɛma ngi wilanga a na kpɛlɛɛ wiela Ngewɔ longɔ ngi pie ɔɔ kɛ ngi yɛnga a numui na mahoungɔ ngi yɛla. Nya lapima tuuŋ mawaa na va Yesu Kristi i welanga a nya yɛla a ngi woo fa.

¹³ Tɔnya le, nya mbaa Kristimableisia, ngii lani la vulii kɛ ngi gunga yeemawaa ma; na hu gbi hinda yakpei na nga pie ta lɔ a ji nga gbewe gbua lɔ na kpɛlɛɛ hu i lewenga, ngi lapi a nya sɔbɛ gbi fova na ma i nya gulɔ.

¹⁴ Faale, nyaa wiimɛ ma tuuŋ nga li yakpe piimɛi gɛlɛmɛi aako ngi gu mawaa ma, tamia a kunafɔ lɛɛvui Ngewɔ i nya lolinga ma Yesu Kristi sabui hu.

¹⁵ Mua kpɛlɛɛ mu layii a Kristi huhitingɔ, mahoungɔ ndii yakpe ji i yɛ mu goohu. Kɛɛ ina ndii weka mia i wu lɛɛngaa goohu, Ngewɔ a pielɔ wu hugɔɔ gbalauŋ.

¹⁶ I yee gbi yɛna, a mu yɛ a jia tuuŋ a sawa yakpei na mu jianga la wɔɔ i to kiahuna ma.

¹⁷ Nya mbaa Kristimableisia, a yɛ tuuŋ a nya wokɔɔ. A woolo nasia ma ti jiama a pele wɔnɛi nasia mu kɛnga a wue.

¹⁸ Ngi ji lenga wɔɔ wu ma kaka, tawao nyaa laajiama hu nga wɔɔ; numu gboto lɔ na ti luvayii i Kristi haalɛi krɔsii ma yɛnga a gbama hinda.

¹⁹ Ti gɛlɛmɛi a jahama lɔ, gbamaile ti luwui liima hindeisia lɔ ti yewɔɛi le. Ta matɛi gbua a na lɔ mahoungɔ ti wufe fa, tawao ta gili lekee a dunyei ji hu hanisia lɔ.

²⁰ Na hu gbi, mua mu yɛmii a ngelegoohu lɔ tawao mua mu Bawomɔi, mu Lemɔi Yesu Kristi mawuloma, i gbua ngelegoohu i wa.

²¹ Mu gbuha huhaangɔi jisia ta haa, Kristi i wangaa a yeekpuhɛi jisia maluvelɔ i pie ti wie kia ngi nda wai i na ngɔlɔya hu, a kpayei na yayenge a pie i gu a hani kpɛlɛɛ wuaala ngi mahayɛi bu.