ƐFISƆSBLƐISIA 1 - Ngowili Yekpei Numu Kpɛlɛɛ Va

¹ Nya Pɔɔl, nya i nɛni Ngewɔ wɛ i nya yɛni a tomɔ Yesu Kristi va, nya mia ngi kɔlɛi ji nyɛima Kristimablei nasia gama ti ɛfisɔs, nasia tɛɛ wote jifa ti wilingɔ hu tia Yesu-ni:

² Mu Kɛkɛ Ngewɔ kɛɛ Ndemɔi Yesu Kristi ti wu gɔ a ngauwanda kɛɛ ndiilɛli.

Ngewɔ A Kpekpeya Wielɔ A Mue Jifa Mua Kristi-ni Mu Wilingɔ Hu

³ A mu siɛgbua Ngewɔ ma jifa kia mua Kristi-ni mu wilingɔ hu, i ngelegoohu gbekpeyɛi yeelasii kpɛlɛɛ wienga a mue mu yafeisia.

⁴ Pɛiŋ bɛɛ wɔɔ dunyei i yaa gbatɛ, Ngewɔ i loko longa wɔɔ mu ma yɛva a ngi woo, a ji mua Kristi-ni ma wili hu aako mu jiayii i yɛ sɛwɛsɛwɛ Ngewɔ yaama, tawao jumbu gbi aa yɛ mu ma. Ndomɛi va Ngewɔ pieni a mue,

⁵ hugbatɛngɔ yɛla ngi lii hu mu woteva a ngi leengeisia Yesu Kristi sabui hu, ji lɔ nɛngɔ yɛla ngi wɛ pieva.

⁶ Na a pielɔ tato i yɛ Ngewɔ ma ngi yauwanda wai va i pieni a mue gbaama, ngi Hindoloi sabui hu, na ngi langɔ la.

⁷ Jifa Kristi i haani krɔsii ma, i mu wumawonga a ngi ŋamɛi tawao Ngewɔ i gbenga mu jumbuisia ma. Ngewɔ yauwandei ya wɔlɔni ma kpa;

⁸ na ya wɔlɔngɔ wa i pieni a mue a ngi nɛmahu gbi kɛɛ ngi hinda hugɔɔlei.

⁹ Ngewɔ i na wieilɔ i yɛ ngi lii hu, i hinda hugbatɛngɔ lɔwungɔi na hugɛ a mue i yɛ ngi lii hu pieva a Kristi loko.

¹⁰ Yeehinda hugbatɛngɔi na Ngewɔ a ngakpua lɔ ji yeewatii a hiti, ta mia a ngi gbatɛ-hani kpɛlɛɛ lɛla ma hinda yila; hani gbi ti ngelegoohu kɛɛ dunyei hu, i Kristi yɛ a ngui ti mahu.

¹¹ Hindei gbi a wielɔ kia i Ngewɔ lii hu kɛɛ kia i hugbatɛni la; tawao Ngewɔ i loko loilɔ mu ma yɛva a ngi nungeisia, mua Kristi-ni mu wilingɔ hu kia i yɛ ngi lii hu pieva pɛiŋ wɔɔ i yaa hani gbi gbatɛ.

¹² Mua, mua yese mu liiloni Kristi ma. Kɛɛ i loko loilɔ mu ma aako mu tato ve Ngewɔ wɔlɔyei wɛ.

¹³ Wua bɛɛ wu woteilɔ a Ngewɔbleisia ji wu ngowili yeetɔnyangɔi mɛnini, Ngowili Yekpei na i pieni Ngewɔ i wu bawoni. Wu lailɔ a Kristi tawao Ngewɔ i ngi lokowoi wuilɔ wu ma yɛva a ngi woo a ji i ngi Yafei na veni wu wɛ i Lahei wumbuni fa.

¹⁴ Ji mu Ngewɔ Yafei majɔɔnga, mu langa la kɛ ma na majɔɔlɔ Ngewɔ i Lahei wumbuni feva ngi nungeisia wɛ, tawao a pielɔ mu la la kɛ Ngewɔ a nasia gbualɔ yɛlɛŋ nduwɔyahu ngi woo a tie. A mu ngi wɔlɔyei lato!

Pɔɔl Lɔ Ngewɔ Vɛlima

¹⁵ Sabui ji va lɔ i hiye watii ma ngi mɛnini kɛ wu langɔe a mu Lemɔi Yesu Kristi, tawao wu longɔ a Ngewɔbleisia kpɛlɛɛ,

¹⁶ ngi yaa lɛɛvui a siɛgbuala Ngewɔ ma wu va. Nga wu laa gɛlɔ ji nga yɛ Ngewɔ vɛlima

¹⁷ tawao nga mu Lemɔi Yesu Kristi ngi Kɛkɛ wɔlɔngɔ wai manɛnɛ aako i ngi Yafei ve wu wɛ, yee-Ngafei i pie wu nɛmahu i lewe, i Ngewɔ gɛ a wue, aako wu tɔnyɛi gɔɔ kɔloongɔ ngi ma.

¹⁸ Nyaa ngi vɛlima gbɔma kɔɔ wu nɛmahuisia ti lawo tɔnyɛi na gɔva gbalauŋ a gbua Ngewɔ gama aako wu hani na gɔɔ i wu lolinga kulɔgbeva, kɛɛ kabande gbekpeya gboto wai na Ngewɔ i Lahei wumbunga feva ngi nungeisia wɛ,

¹⁹ kɛɛ ngi gbayei huleweni kpa i yengema mu hu, mua mu langɔ a Kristi. Yeekpekpeya yakpei ji i yengema mu hu ti yakpe tia kpaya wai na

²⁰ Ngewɔ i Kristi wuni la hee hu, i ngi hei ngi yeja gakei ma ngelegoohu.

²¹ Ngewɔ Kristi yɛlɔ a maha, ngi lewengɔ polouŋ mahubleisia gbi ma kɛɛ nasia kpaya wuangɔ ti yeya, kɛɛ tomableisia, kɛɛ mahawaisia tawao i leweni toma-biyɛi yeekpayei ma i dunyeihu kɛɛ na poma.

²² Ngewɔ i hani kpɛlɛɛ wuailɔ Kristi bu, kɛ i ngi wotɛnga a ngui hani gbi mahu sɔsii va.

²³ Sɔsii i yɛni a Kristi gbuhɛi lɔ, tawao sɔsii lɔ i Kristi yakpuani, Kristi na i hani kpɛlɛɛ yakpuani dunyei hu gbi.