KƆLƆSIBLƐISIA 2 - Ngowili Yekpei Numu Kpɛlɛɛ Va

¹ Gbɛɛ ngi mɔnɛ wai na hugɛ a wue ngi pienga wu va kɛɛ Laodisia lawai hubleisia va kɛɛ nungaa wekei nasia gbi tii yaa nya lɔni taa nya gɔɔ.

² Nyaa ji wiema kɔɔ ti liisia ti yɛ kpaukpau tawao ti lalagblanga ndoma hu aako ti hinda hugɔɔla gbatɛ lavengɔi majɔɔ. Ji wiengaa, ta gulɔ a Ngewɔ hinda hulɔwungɔi gɔla, na i yɛni a Kristi vulii.

³ Ta lɔ Ngewɔ nɛmahulewei kɛɛ ngi hinda-hugɔlei lɔwungɔ ngi hu.

⁴ Faale, gbɛɛ ngi ji le wu ma aako numu gbi aa wu wɛlɛ a ndɛɛ yɛpɛngaa, yeenjɛpɛisia ti gbua bɛɛ kaka a njɛpɛ yekpengaa.

⁵ Ajifa kia bɛɛ nya gbuhɛi ii wu lia, na hu gbi nyalii lɔ wu gama, tawao nya goohu nɛngɔe ji ngi tɔma wu wilingɔ hu tawao wuɛɛ wotewote wu lalei hu a Kristi.

Ndɛvu Yekpei I Kristi Hu Lɔ

⁶ Kia na wu kɔɔnga tao wu lumanga kɛ Yesu Kristi lɔ wu Lemɔi le, wua tieni wu wilingɔ hu i yɛla.

⁷ Wa gulɔ a ji wiela a ji wa pie Kristi i hei wu liisia hu kia wu langɔ a ngie, tawao wu wu lɛɛvuisia loo ngi ma, wu lalei a ngie maa a yɛ a to, kia ti wu gaani la pieva. Tawao siɛgboto gbuala Ngewɔ ma aa baa wu la.

⁸ A wu mahugbe hɔɔ, kɔɔ numu gbi aa wu yama gbɔma nduwɔya hu a nuuvu nɛmahulewei na ta nungaa yaka la gbama, na a gbua kaai nasia hu ndebleisia ta ndo a ti leengeisia kɛɛ dunyei yeengafangeisia, kɛɛ ii gbuani Kristi gama.

⁹ Na gbi i Ngewɔ hu taa Kristi hu, watii bɛɛ i yɛ nuuvuya hu,

¹⁰ tawao Ngewɔ i ndɛvui yeekpekpei vulii venga wu wɛ ji wua Yesu-ni wu wilingɔ hu, tawao Yesu leweni ngafangaa ti mahangeisia ma kɛɛ ti mahublɛisia.

¹¹ Ji wua Kristi-ni wu wilini hu, wu woteilɔ a biliblaa, bili na ii le nuuvungaa ta hei, bilii na le Kristi a hei, na i yɛni a mu gbualalɔ jumbu gbayei yeya.

¹² Ajifa watii na ti wu wuani, ti wu gbɔwuilɔ kia ti Kristi gbɔwuni la, tawao watii ti yɛ wu wuama i wieilɔ bɛɛ wu lalei a Ngewɔ gbaya wai na i Kristi wuni la hee hu i wua bɛɛ wumbunga hee hu.

¹³ Watii yila ma wɔɔ wu wielɔ kia haablaa Ngewɔ yaama wu jumbuisia wooma ajifa Juublaa yaa a wue tawao jifa Mojisi Jawei ii wu yeya. Kɛɛ Ngewɔ i wu wunga na hee hu kia i Kristi wuni hee hu. Ngewɔ i manuilɔ mu ma mu jumbui kpɛlɛɛ va;

¹⁴ i kɔlɛi na hunyaniilɔ mu wienyamuisia ti nyɛingɔ hu, kɛɛ Sawei nasia kpɛngɔ ma, i gbe gbua feu yeekɔlɛi hinda hu i kpakpa krɔsii ma.

¹⁵ Ji Kristi i yɛ krɔsii ma, i ta yekpe gbuɛilɔ ngafangeisia ti mahangeisia kɛɛ ti mahublɛisia ti gbayei bu, i pie numui gbi ti ti lɔ ta to ngi ma kia kɔ-houngaa temaya vahɛi na hu ti yɛ tooni ngi ma.

¹⁶ Faale, numu gbi aa sawangaa la wu yeya kɔlooni na wa mɛ ɔɔ wa kpɔli, ɔɔ Kayema voleisia va ɔɔ Ngalu Ninɛi yeekomɛisia ɔɔ Ndɛvu Volei ndɛisia.

¹⁷ Hindei jisia nyɔkɔ kpɛlɛɛ ti yɛni a kulɔma hindeisia yeenɛnɛi lɔ; yeetɔnyɛi a Kristi lɔ.

¹⁸ Waa luma numu gbi aa pie wu baa a wu mawaa jifa a nde yɛ i leweni nungaa wekeisia ma jifa malikangaa ti gɛnga wɔɔ a ngie, a nɔɔ nungaa tia yekpe mayeiva a ndɛɛ kɛɛ hɛɛva malikeisia ma. Yeenumui ji bonda ngi giliyii a pielɔ ngi yaama i lɛ gbama,

¹⁹ tawao i gbenga a hɛlɛla a Kristi, na Kristimableisia gbi ti wui a ngie, ngi gbuhɛi a tie. Kpuhɛi na gbi i Kristi va a mɛhɛɛ jɔlɔ i gbɔvɔ, ndatɛisia ti yeehaniisia gbi hou kpaŋ ti yɛmɛisia, tawao yeekpuhɛi na a loolalɔ kia Ngewɔ longɔ i loola.

Haala Kɛɛ Fuluya Majɔɔla Kristi Hu

²⁰ Wua Kristi-ni wu haanga tawao wu gbuanga ngafangei nasia bu kpaya i ti wɛ dunyei hu. Gbɛe hɔɔ wu luvama bi tɔngaa bɛɛ dunyei ji woo lɔ a wue? Gbɛe wa sawei nasia nyɔkɔ hou ta nde tɛɛ,

²¹ “Baa ji hou a loko, ɔɔ Baa na gɔɔ, ɔɔ Baa jaa a yeepekei?”

²² Ji kpɛlɛɛ i yɛpɛma hanii nasia lɔ va ta nyani ji lekee numu a yenge a tie; nuuvunga lekee lɔ ti yeesawei nasia gbatɛni kɛɛ yeekaaisia.

²³ A tɔnya nungaa ta gililɔ tɛɛ sawei nasia bonda ti lablɛisia ti nɛmahu lewengɔe a ji ta nɔɔ nungaa ma hɛɛva malikeisia ma, ta tia yekpe mayei a ndɛɛ, ta ti gbuhɛisia goma a hanii nasia ti gbekpengɔ ndɛvui va; kɛɛ sawei jisia tɛɛ gbɔ numui na ma ngi longɔ i ta yekpe huhou hindei nasia wieva ta ngi gbuhɛi liilɛli.