2 TIMOTI 2 - Ngowili Yekpei Numu Kpɛlɛɛ Va

Yesu Kristi Gugba Lɔnyangɔi

¹ Bia, nya loi, Ngewɔ yauwandei na mu woo le ji mua Yesu Kristi-ni mu wilingɔ hu i pie bi kaahu majɔɔ.

² Kaai nasia wumbu bi yɛ mɛni ngi yɛ kɛ leiŋ seli gboto yaama, bi ti loko wuaa ndiivalamablaa yeya, nasia tia bɛɛ ta gu a nungaa wekangaa gaala.

³ Kpalɛi bi ndɛi i la bi ma, kia Yesu Kristi gugba lɔnyangɔi a bie.

⁴ Kugba gbi a ngi yengei wielɔ aako i ngi mahumɔ wai liilɛli, faale ɛɛ loko wili numu gbamɛisia ti hindeisia hu.

⁵ Piimɛmɔi na tia ngi mbaangɛisia ta wiimɛ mawali ma ɛɛ gu aa ngi mbaangɛisia gula aa mawaa na majɔɔ ti lapima faa kɛlee i jia a yee saweisia.

⁶ Kpala yengemɔi na i yengema kpaayangɔ, mahoungɔ haala bei na ta tewe, ta yesei i ngi ndɛi majɔɔ.

⁷ Gili a njɛpɛi jisia ngi ndema, ajifa Ndemɔi a pielɔ bi gu a kpɛlɛɛ yeembui gɔla.

⁸ Yɛ a gili a Yesu Kristi na Ngewɔ i ngi wuni hee hu, na i yɛni a Devidi bɔɔsɔ, kia ma nungaa gaa la Ngowili Yekpei ji hu nga hugɛ,

⁹ jifa nga Ngowili Yekpei le nungaa ma famia kpalɛ a la nya ma tawao jɔwɔi vulii gulangɔ nya ma kia sawa nyanimɔ. Kɛɛ jɔwɔ gulangɔ ii le Ngewɔ laayiɛi ma.

¹⁰ Famia nga gu hindei gbi bu Ngewɔ nungaa wɔyɔngɔisia va kɔɔ tia bɛɛ ti mbawoi na majɔɔ Yesu Kristi a wala kpɛngɔ kunafɔ wɔlɔyɛi ma.

¹¹ Tɔnya yia lɔ a ji, tɛɛ: “Ina mua Yesu-ni mu haanga, mua tieni lɔ ma vulu gbɔma.

¹² Ina muii gbahai a gula hinda gbɔugbɔu bu, mua tieni ma mahayɛi mɛlɔ gbɔma. Ina mu mawalinga ngi hinda ma, ta bɛɛ a mawalilɔ mu hinda ma.

¹³ Ina mu gbenga a lala a Ngewɔ, ta ɛɛ gbe a lala a mue gbamaile ɛɛ ta yekpe hou a mawali”

Ngengemɔi Na A Ngewɔ Liilɛli

¹⁴ Ji hitɛ nungeisia wɛ, bi ti laahii kpɔtukpɔtu Ngewɔ yaama taa ndabla wie, taa lapi kɔlooni njɛpɛwo gbi ma. Na ɛɛ kpekpe gbi wie tawao a nasia hinda huwulɔ ta wolo.

¹⁵ Lapi a bi sɔbɛ gbi bi tato majɔɔ Ngewɔ yaama, kia ngengemɔi na i na ɛɛ wufe ngi yengei ma, numui na ngi bɛɛngɔ a nungaa gaala a Ngewɔ wowili yeetɔnyɛi.

¹⁶ Gbe baabaa laablɛi nasia ma ta baa gbua Ngewɔ ma, ta pie nungaa tɛɛ la a Ngewɔ.

¹⁷ Kaai na wiengɔe kia ngelei na i na a li a numu luwui mɛ, yeekpalɛmɛi ya a wɔlɔ lekee. Hingaa fele ti nungaa gaanga a hinda bondɛi jisia, tia mia a Haiminiɔs kɛɛ Failetɔs.

¹⁸ Ti gbenga tɔnya welei ma tawao tiaa piema nungei nasia ti langɔ a Ngewɔ ti lii yaa a hupu, a ji ti ndema ti ma tɛɛ, mu welanga bɛɛ a wula hee hu.

¹⁹ Kɛɛ pɛlei ji Ngewɔ i hitɛnga, gbɛ-o-gbɛ ɛɛ sɛɛjia; tawao njɛpɛi jisia lɔ nyɛingɔ ma tɛɛ, “Ndemɔi i nasia gɔɔlɔ ngi woo a tie”, kɛɛ gbɔma, “Numu gbi lekee a nde yɛ Ndemɔi lɔ ngi woo a ngie, mahoungɔ i wounve hinda nyamu wiela ma.”

²⁰ Mɛhɛɛ-mɛ haakei yeelasii gbi lɔ pɛlɛ waa gbi bu, tɛngaa gbatɛngɔ a kanigolei kɛɛ kanigbɔlui, pekeisia gbatɛngɔ a ngulii kɛɛ hujii; tɛɛnga lɔ na ta yenge la a ngila ngila hinda waawaisia mahu, pekeisia ti na ta yenge la kpele gbi.

²¹ Numu gbi i gbengaa hinda nyamui jisia kpɛlɛɛ ma i ta yekpe yɛ sɛwɛ, Ngewɔ a yengelɔ a ngie hinda waawaangaa hu, ajifa i ta yekpe venga ngi bɔɔsɔi wɛ tawao a gu a ngi magbewe gbuala, ngi magbatɛngɔ ngenge yekpe gbi wieva.

²² Joowi hinda nyamui nasia ma mani a numu lɔ foningeyɛi hu, bi lapi pɔɔna hinda wiela ma, kɛɛ lala a Ngewɔ, kɛɛ ndoma, kɛɛ ndiilɛli, wua nungei nasia ta wɔɔ Ngewɔ ma a ndiigole kpɔma va.

²³ Joowi baabaa mawali houlei nasia ma nungei nasia tii gbɛ-o-gbɛ gɔɔ ta wa la; bi kɔɔlɔ kɛ ta gɛlɛ njianjiɛi hu lɔ.

²⁴ Ndemɔi yengemɔi tia numu gbi tɛɛ yia. Mahoungɔ i yɛ a kpekpeya wie a numui gbi, Kaamɔ yekpe a ngie a ngi lii hou,

²⁵ Ɛɛ liilewe ji a yɛ nungei nasia loma pele ma ta ngi hou a mawali. Gbamaile tɛngaa Ngewɔ a sabu lalɔ ti wɛ wounveva ti jumbuisia ma ti tɔnyɛi gɔɔ.

²⁶ Tawao ti nɛmahui a walɔ na, ti bawo Seitana mani ya, na i ti hounga wɔɔ i kpɔndanga ti ma ngi liima hindei wieva.