1 PITA 2 - Ngowili Yekpei Numu Kpɛlɛɛ Va

Ngewɔ Woo Lɔ A Kristimableisia

¹ Faale, a gbe hinda nyamui yeelasii gbi wiela ma; waa gbɔma ndɛɛ guala, waa numu wɛlɛ, waa lolo a numu gbi, waa mbɛlɛnyani yɛpɛ le a numu.

² A wie kia ndoola nɛnɛɛngaa ti na, wa wɔɔ nyiniya senyangɔi na va numu yafei longɔ la, aako wu yɛ a kpɔle wu yafeisia ti lakpa tawao ti bawo.

³ Kia Ngewɔ Gɔlɛi ndeni la yɛ, “Wua yekpe vulii wu Ndemɔi gbekpeyii lɔnga na.”

⁴ A yɛ a lukpe Ndemɔi gbla. Ngi wiengɔe kia pɛlɛ-lo-gɔtii na pɛlɛ loblɛisia ti pilini tɛɛ ii gbekpeni kɛɛ Ngewɔ i mbumbuni a kɔtu baagbangɔ waa.

⁵ A wa Ndemɔi gama kia kɔtii yekpengaa, wu luma Ngewɔ Yafei i Ngewɔ Wɛlei lo a wue, wu wote na a Ngewɔ jaagbuablaa Yesu Kristi biyɛi hu, wa saai nasia gbua Ngewɔ ma ngi Yafei a kɛ a wue tawao a nɛɛ ngi wɛ.

⁶ Ajifa Ngewɔ Gɔlɛi ndeilɔ yɛ, “Ngi kɔtu baagbangɔ wumbuilɔ, tamia ngi ngi yɛma a dɛmɛ gɔtiwai mia Jayɔn; tawao numu gbi lekee a la a ngie, ngi yaa ɛɛ wufe kunafɔ.”

⁷ Kɔtii ji baa wɔlɔngɔ waa le wu va wua wu langɔ a Kristi; kɛɛ nasia tii lani a Kristi: “Kɔtii na pɛlɛ loblɛisia ti pilini tɛɛ ii gbekpeni, i woteilɔ a bagɔma gɔtii tewengɔ kɔtii kpɛlɛɛ ma.”

⁸ Tawao Ngewɔ Gɔlɛi yeepekei i ndeilɔ yɛ, “Kɔtii ji lɔ nungaa ta lugba la, ta gula.” Ti lugbɛilɔ jifa tii lani a Ngowili Yekpei; namia i nɛni Ngewɔ wɛ ti va.

⁹ Kɛɛ wua lɔ kɛnyɛi na a wue Ngewɔ i wu mbumbuni, mahɛi jaagbuablɛisia a wue, wu vengɔ Ngewɔ yengei wɛ, tawao ngi nungaa lɔ a wue, i wu wumbuni ngi wiehinda gabandengɔisia hugɛva a numui gbi, Ngewɔ na i wu lolini i wu gbua jumbui yeekpindii hu, i wa a wue ngi bawoyɛi yeefoofo gabandengɔ wai hu.

¹⁰ Watii lɛɛnga wɔɔ, wuii yɛni a Ngewɔ nungaa, kɛɛ kiahuna na ngi nungeisia lɔ a wue; watii lɛɛnga wɔɔ, wuii Ngewɔ manumɛi majɔɔni, kɛɛ kiahuna na wu ngi manumɛi majɔɔnga.

A Luva kia Ngewɔ Luweisia

¹¹ Nya liima ndiamɔisia, nyaa wu manɛnɛma jifa hotangaa lɔ a wue kɛɛ nasia tii wani lɛmbima dunyei ji hu! A loko gbua hindei nasia hu wa pie wu luwui liilɛliva, hindei nasia ta kɔ wɛlɛ numu yafei ma watii gbi.

¹² Wu luvayii i gbekpe nasia ti lia Juublaa yaa tie, nahi ti ndɛɛ gualangaa tɛɛ hinda nyamu wieblaa lɔ a wue, ti hinda yekpei nasia lɔ wa pie, ta lumalɔ tɛɛ numu yekpengaa lɔ a wue, tawao ti Ngewɔ lato folei na ma a wa.

¹³ A golo nuuvu lemaya gbi bu jifa mu Lemɔi woomablaa a wue; a golo Rom Maha Wai bu, na ngi lewengɔ ti gbi ma,

¹⁴ kɛɛ Gɔvinɛi nasia i ti heinga kpaalɛ lava hinda nyamu wieblɛisia ma kɛɛ nasia lato va ta hinda yekpe wie.

¹⁵ Gbamaile Ngewɔ longɔ wu yɛ a hinda yekpe wie tuuŋ aako wu kpɔhu wu nguhubaablei nasia laa gbɔwu ta baa wu ma.

¹⁶ A luva kia nasia na tii nduwɔyahu, na hu gbi waa gili la kɛ ji wuii ndɔwuya hu kpaya vengɔi wu wɛ hinda nyamu gbi wieva, kɛɛ a luva kia Ngewɔ luweisia.

¹⁷ A baagɔɔ numu gbi ma, wu lo a wu mbaa Kristimableisia, wu luwa Ngewɔ ma, wu baagɔɔ Rom Maha Wai ma.

Kpaalɛi Na Lani Kristi Ma Yeetɔmaseli

¹⁸ Mahoungɔ wua Kristimablaa a wue wu nduwɔya hu, wu golo wu luwɔkɛisia wɛ, wu baagɔma waa ve ti wɛ, nasia lekee ii le ta wu hindawanda ta gili a wue pandaa, kɛ nasia bɛɛ ti yagbalɛngɔ.

¹⁹ Ngewɔ a wu lubalɔ ji va, ina wu liiloilɔ wu gu kpalɛi na bu ta nda wu ma mbaama hu, ajifa wu kɔɔlɔ kɛ hii i nɛni Ngewɔ wɛ.

²⁰ Tatoi yeegbɔɔ wu langɔ la wa majɔɔ ina wu guilɔ ndewe bu hinda nyamu va wu pienga? Kɛɛ kpaalɛ i langaa wu ma ji wa hinda yekpe bɛɛ wie, Ngewɔ a wu lubalɔ fa.

²¹ Ji lɔ i wu lolini ma, ajifa kpaalɛ i lailɔ Kristi vulii ma wu bawova, tawao i tɔmaseli longa a wue pookɔɔva.

²² Ii jumbu hinda gbi wieni tawao ndɛɛ yɛpɛ gbi ii gbuani ngi laa.

²³ Ji nungaa ti yɛ a ngi bɛlɛ nyani, ii hunyɔni a mbɛlɛnyani; ji ti kpaalɛ lani ngi ma, ii ti huluwani kpaalɛ lava ti ma, kɛɛ i ta yekpe loko wuaailɔ Ngewɔ yeya, na a kiti gbi lewe a pɔɔna.

²⁴ Kristi vulii i numui gbi ti jumbuisia wumbuilɔ ngi luwui hu i li la krɔsii ma, i haa na aako i mu wumawo i mu gbua jumbui luwɔyɛi hu, mu jia a pele wɔɔni na Ngewɔ longɔ la. Jifa ti kpaalɛ lani Kristi ma, mu mbawoya majɔɔnga.

²⁵ Wu wiengɔ yɛla kia mbalangɛi nasia ta lohu, kɛɛ kiahuna na Ngewɔ i yamanga a wue Kristi gama, na a wu yafeisia mahugbe kia mbala mahugbemɔi a pie a ngi baalangɛisia.