1 TƐSALONIKABLƐISIA 2 - Ngowili Yekpei Numu Kpɛlɛɛ Va

Ngengei Pɔɔl Pieni Tɛsalonika

¹ Mu mbaa Kristimableisia, wua vulii wu kɔɔlɔ kɛ pei na mu pieni wu gama ii yɛni a kɛwɛ jia.

² Wu kɔɔlɔ kia ti kpalɛ lani la mu ma, ta mu bɛlɛ nyani Filipai pɛiŋ mu yaa wa wu gama Tɛsalonika. Tawao kia bɛɛ nungaa ti yɛ lapi waa a mue, mu Yewɔɛi i mu gɔilɔ a ndiilo Ngowili Yekpei na leva wu ma a gbua ngi gama.

³ Ji mu lapini aako wu la a Ngowili Yekpei muii ndɛɛ gualani tawao muii manɔhɔ hinda wieni tawao muii kava gulani numu gbi ma.

⁴ Kia maa na wie, watii gbi ma na lɔ le Ngewɔ longɔ mu nde, ajifa i mu hugɔɔnga i tɔnga kɛ mu mahoungɔe Ngowili Yekpei loko wuava mu yeya. Muii lapima nuuvungaa liilɛliva, mu lapima Ngewɔ lɔ liilɛliva, na i mu liisia huvei kpɛlɛɛ gɔɔngɔ.

⁵ Wu kɔɔlɔ vuli pandawanda kɛ muii wani wu gama a numu lɛ yɛpɛ ɔɔ njɛpɛi nasia ta mani nyamui nasia malɔwu ma pie nungaa wekɛisia ti yeya-hanisia va. Ngewɔ lɔ mu jeli le.

⁶ Muii lapini tato majɔɔva a numu gbi, muii loni a wu lato ɔɔ nungaa wekangaa ti nda,

⁷ kia bɛɛ mua ma gulɔ mu hani gboto gbua wu yeya ajifa toblaa lɔ a mue Kristi va. Na hu gbi mua mu ndii bɛbɛngɔ lɔ gɛni ji mu yɛ wu gama, kia koimɛi a ngi leengeisia nyini, a ti mahugbe.

⁸ Ndoma wai na va mu piengɔ a wue, mu magbatɛngɔ yɛla pieva wua bɛɛ wu Ngowili Yekpei hinda hugɔɔ a gbua Ngewɔ gama kɛɛ hinda gbi wieva gbɔva wu ma. Mu longɔ yɛla a wue hulewengɔ.

⁹ Taa wu nɛmahu vulii, mu mbaa Kristimableisia, kia mu yengeni kpayangɔ waa! Mu yengeilɔ a folo kɛɛ kpindi aako maa yɛ a kaha wu ma ji mu yɛ Ngowili Yekpei na lema wu ma a gbua Ngewɔ gama.

¹⁰ Wua lɔ mu jelisia a wue kɛɛ Ngewɔ kɛ mu luvayii wua wu Kristimableisia gama sɛwɛsɛwɛngɔ yɛla, pɔɔnangɔ, tawao nyamu gbi ii hu.

¹¹ Wu kɔɔlɔ kɛ mu wu yilayee gbi houilɔ kia kɛkɛi a ngi nda leengeisia hou la.

¹² Mu wu liiloilɔ, mu wu nɛpɔ, tawao mu yɛlɔ a nɔɔ wu ma jiava a pelei na a nɛɛ Ngewɔ wɛ na i wu lolima aako wua tieni wu gbɔ ngi Mahayɛi ma kɛɛ ngi wɔlɔyɛi.

¹³ Tawao sabu weka lɔ na ma siɛgbua Ngewɔ ma kpele gbi. Ji mu wani wu gama mu Ngewɔ wowili hugɛ a wue, wu mɛniilɔ tawao wu lailɔ la, wuii mbumbuni kia nuuvu wowili gbama, wu mbumbuilɔ a Ngewɔ wowili, tawao hii vulii i na. Ajifa Ngewɔ lɔ hinda wiema wu hu wua wu langɔ a ngie.

¹⁴ Mu mbaa Kristimableisia, hindei nasia ti wu wienga tia mia ti Kristimablei nasia wieni ti heiheini Judia lɔlei hu, nasia ti na Yesu Kristi woo a tie. Wu gbɔugbɔu gɛnyɛblɛisia ti juwuya hitɛilɔ wu wooma a toloma yakpei na Juublaa ti hitɛni la ti wooma,

¹⁵ Juublaa nasia ti Ndemɔi Yesu waani kɛɛ Ngewɔ lutuisia, ti hitɛni mu wooma a juwuya. Ti hinda i gbalɛni kpa Ngewɔ ma! Ti loloni kpa a numui gbi!

¹⁶ Ti lapilɔ gbɔma tɛɛ ti mu maabali maa Ngowili Yekpei na le nasia ma Juublaa yaa tie kɔɔ taa bawo. Hii ti jumbui kpɛlɛɛ laavenga ti piema wɔɔ gba. Faale kɛlɛmɛi ji lɔɔ, Ngewɔ i liilewenga ti ma.

Pɔɔl Longɔ I Wa Tɛsalonikablɛisia Gama

¹⁷ Kɛɛ mua, mu mbaa Kristimableisia, ji mua wueni mu luahu i gɔlɛni kulo, kia bɛɛ wu hinda ii yɛ gbua mu nɛmahu, wu mani i mu lɔni kpa tawao mu lapini kpa wu lɔva gbɔma!

¹⁸ Mu longɔ yɛla mu yama gbɔma wu gama. Nya, Pɔɔl vulii ngi lapilɔ tewengɔ heima yila ma yamava wu gama, kɛɛ Seitana ii lumani mu wɛ.

¹⁹ Gbamaile wua vulii lɔ mu lii valamɛi a wue kɛɛ mu goohunɛi kɛɛ mu sabui lawova a temaya majɔɔla mu Lemɔi Yesu gulɔ watii na a wa gbɔma.

²⁰ Tɔnya vulii le kɛ wua mia wa pie mu matagbua, mu kohunɛ jɔɔ!