ᐱᓕᐱᔭᓇ 3 - ᐅᔅᑭ ᑎᔅᑌᒥᓐᑦ

ᐊᓂᒪ ᑖᐺ ᑾᔭᔉ ᐃᑖᑎᓯᐎᓐ

¹ ᒫᒋᒡ, ᓂᒋᔖᓂᑐᒃ, ᒥᓚᐙᑎᒃ ᐅᑎᐯᓕᒋᑫᐤ᙮ ᐁᑯᔑ ᑫᔮᐸᒡ ᐁ ᒫᓯᓇᐊᒫᑕᑾᒃ ᓇᒪᐎᓚ ᓂᑦ ᐊᓕᒥᐃᑯᓐ, ᒫᑲ ᑭᓚᐗᐤ ᐅᒋ ᐱᒫᒋᑌᓕᑖᑾᓐ᙮

² ᔮᒀᒥᔅᑖᑯᒃ ᐊᑎᒶᒃ, ᔮᒀᒥᔅᑖᑯᒃ ᑳ ᒪᒋ ᐊᑑᔅᑫᒋᒃ, ᔮᑾᒥᔅᑕᒧᒃ ᑭᔥᑲᑎᔓᐎᓐ᙮

³ ᐌᓴ ᑭᓚᓈᓇᐤ ᑭᔅᑭᓄᐙᒋᔓᐎᓐ ᑭᑦ ᐋᔮᓈᓇᐤ, ᑳ ᓇᐗᑭᔥᑕᐗᒃ ᑭᒋᒪᓂᑐ ᐊᒑᑯᐎᓂᒃ, ᓀᔥᑕ ᑳ ᒥᓚᐙᑕᔭᒃ ᙭ ᒋᓴᔅ, ᓀᔥᑕ ᐁᑳ ᐊᔅᐯᓕᒧᑐᑕᒪᒃ ᐎᔮᓯᐎᐎᓂᒃ:

⁴ ᐋᑕ ᒫᑲ ᓂ ᑳ ᑮ ᐊᔅᐯᓕᒧᑐᑖᑖᔾ ᐎᔮᓯᐎᐎᓐ᙮ ᑮᔥᐱᓐ ᑯᑕᒃ ᐃᓕᓕᐤ ᐃᑌᓕᑕᑭ ᐁ ᐋᔮᑦ ᑫᒀᓐ ᑫ ᐅᒋ ᒪᒥᔑᑐᑕᒃ ᐎᔮᓯᐎᐎᓂᓕᐤ, ᓂᓚ ᐊᐙᓯᑌ:

⁵ ᐁ ᑭᔅᑭᓄᐙᒋᔓᑳᐎᔮᓐ ᔮᓈᓀᐤ ᐁ ᑭᔑᑳᒃ, ᐃᔅᕃᐃᓪ ᐁ ᐅᑦ ᐊᐙᔑᒥᔑᑦ, ᐅ ᐯᔭᑯᑌᒥᒃ ᐯᓐᒋᒥᓐ ᐅᒋ, ᐁ ᐦᐃᑉᕉᐎᔮᓐ ᐦᐃᑉᕉᐗᒃ ᐅᒋ; ᐅᓚᔓᐌᐎᓐ ᐅᒋ, ᐁ ᐸᕋᓯᐎᔮᓐ;

⁶ ᐁ ᐋᓕᒧᒋᑳᑌᒃ ᓱᑫᓕᑕᒧᐎᓐ, ᐁ ᑲᒀᑕᑭᐊᑭᒃ ᒪᒪᐎᐋᔭᒥᐊᐗᒃ; ᐁ ᐋᓕᒧᒋᑳᑌᒃ ᒀᔭᔅᑭᑖᑎᓯᐎᓐ ᐅᓚᔓᐌᐎᓂᒃ ᑳ ᐃᑕᑾᒃ, ᓂ ᑮ ᒀᔭᔅᑭᑌᓕᑖᑯᓯᓐ᙮

⁷ ᒫᑲ ᐊᓂᐃ ᑳ ᑮ ᐅᑎᓯᔮᓐ, ᐁᐗᒀᓂᐃ ᓂ ᐗᓂᑖᓐ ᓂ ᑮ ᐊᑭᑌᓐ ᙭ ᐅᒋ᙮

⁸ ᐁᐁ, ᑭᔅᑎᓈᒃ, ᒥᓯᐌ ᑫᒀᓇ ᐸᑾᓐᑕᐤ ᓂᑦ ᐃᑕᑭᑌᓐ ᐁ ᐃᔑ ᑭᔅᑌᓕᑖᑾᓂᓕᒃ ᐅ ᑭᔅᑫᓕᒥᑯᓯᐎᓐ ᙭ ᒋᓴᔅ ᓂ ᑎᐯᓕᒋᑫᒻ; ᐊᓇ ᒥᓯᐌ ᑫᒀᓇ ᑳ ᑮ ᐅᒋ ᐗᓂᑖᔮᓐ, ᓀᔥᑕ ᑖᐱᔅᑯᒡ ᒥᒋᑾᓛᔕ ᓂᑦ ᐃᑕᑭᑌᓐ, ᑭᒋ ᑲᔥᑭᐊᒃ ᙭,

⁹ ᓀᔥᑕ ᑭᒋ ᒥᔅᑳᑲᐎᔮᓐ ᐁ ᐱᒋᔅᑲᐗᒃ, ᐁᑳ ᐁ ᐋᔮᔮᓐ ᑎᐱᓚᐌ ᓂ ᒀᔭᔅᑭᑖᑎᓯᐎᓐ, ᐅᓚᔓᐌᐎᓂᒃ ᑳ ᐅᒋ ᑕᑾᒃ, ᒫᑲ ᐊᓂᒪ ᐅ ᑖᐺᔦᓕᒥᑯᓯᐎᓂᒡ ᙭ ᑳ ᐅᒋᐸᓕᒃ, ᐊᓂᒪ ᒀᔭᔅᑭᑖᑎᓯᐎᓐ ᑭᒋᒪᓂᑐᒃ ᑳ ᐅᒋᐸᓕᒃ ᑖᐺᔦᓕᑕᒧᐎᓐ ᐅᒋ:

¹⁰ ᑭᒋ ᑭᔅᑫᓕᒪᒃ, ᓀᔥᑕ ᐁᔅᐱᒋ ᑲᔥᑭᐅᒪᑲᓂᓕᒃ ᐅ ᐗᓂᔥᑲᐎᓐ, ᓀᔥᑕ ᐊᓂᒪ ᐎᒉᐎᐌᐎᓐ ᐅ ᐙᐎᓴᑫᓕᑕᒧᐎᓂᒃ ᑳ ᐅᒋᐸᓕᒃ, ᐁ ᐃᔑᓈᑯᐃᑲᐎᐗᒃ ᐅ ᓂᐱᐎᓐ;

¹¹ ᑮᔥᐱᓐ ᓈᓐᑕᐤ ᐃᔑ ᑭᒋ ᑮ ᐅᑎᑕᒶᒃ ᐅ ᐗᓂᔥᑲᐎᓂᐗᐤ ᐅᓂᐱᐗᒃ᙮

ᓄᔅᐱᓇᑕ ᑭᔅᑭᓄᐗᒋᒋᑲᓐ

¹² ᓇᒪᐎᓚ ᑖᐱᔅᑯᒡ ᐋᔕᔾ ᐁ ᑮ ᐅᑎᑕᒫᓐ, ᓀᔥᑕᐱᑯ ᐋᔕᔾ ᐁ ᒥᑐᓂᐎᓯᔮᓐ; ᒫᑲ ᓂ ᓄᔅᐱᓇᑌᓐ, ᑮᔥᐱᓐ ᑫ ᐅᑎᑎᓇᒧᐙᓀ ᐊᓂᒪ ᑳ ᑮ ᐅᒋ ᐅᑎᑎᓂᑦ ᙭ ᒋᓴᔅ᙮

¹³ ᓂᒋᔖᓂᑐᒃ, ᓇᒪᐎᓚ ᓂᑦ ᐃᑕᑭᒥᑎᓱᓐ ᐋᔖᔾ ᐁ ᑮ ᐅᑎᑎᓇᒫᓐ: ᒫᑲ ᐅᒪ ᐯᔭᒃ ᑫᒀᓐ ᓂ ᑐᑌᓐ; ᐁ ᐗᓂᑭᔅᑭᓯᑐᑕᒫᓐ ᐊᓂᐃ ᐅᑖᓈᒃ ᑳ ᐃᑕᑾᑭ, ᓀᔥᑕ ᐁ ᑲᑴᒋᑎᓇᒫᓐ ᐊᓂᐃ ᓂᑳᓂᒃ ᑳ ᐃᑕᑾᑭ,

¹⁴ ᓂ ᓄᔅᐱᓇᑌᓐ ᐁ ᑭᔅᑭᓄᐙᒋᒋᑳᑌᒃ, ᐁ ᐎ ᐋᔮᔮᓐ ᐊᓂᒪ ᐊᔅᑣᑐᐎᓐ ᑳ ᐅᒋᐸᓕᒃ ᐅ ᑭᒋ ᓇᑐᒋᑫᐎᓂᒃ ᑭᒋᒪᓂᑐ ᙭ ᒋᓴᓯᒃ᙮

¹⁵ ᐁᑯᔑ ᒫᑲ, ᒥᓯᐌ ᐁ ᐃᑕᔑᔭᒃ ᑳ ᒥᑐᓂᐎᓯᔭᒃ, ᐅᒪ ᐃᔑ ᑭ ᑳ ᒫᒥᑐᓀᓕᑌᓇᐗᐤ; ᑮᔥᐱᓐ ᒫᑲ ᓈᓐᑕᐤ ᑫᒀᓐ ᐱᑐᔥ ᐃᔑ ᒫᒥᑐᓀᓕᑕᒣᒃ, ᑭᒋᒪᓂᑐ ᐅᒪ ᐊᓯᒋ ᑭ ᑳ ᐙᐸᑎᓕᑯᐗᐤ᙮

¹⁶ ᐁᓕᐌᒃ ᒫᑲ, ᐃᑕ ᐃᓕᑯᒃ ᐋᔕᔾ ᑳ ᑮ ᐅᑎᑕᒪᒃ, ᐁᑯᔑ ᑫᔮᐸᒡ ᐃᔑ ᐱᒧᑌᑕᐤ, ᐁᑯᔑ ᐁᐗᑯ ᑫᔮᐸᒡ ᒫᒥᑐᓀᓕᑖᑕᐤ᙮

¹⁷ ᓂᒋᔖᓂᑐᒃ, ᒫᒪᐎ ᓄᔅᐱᓇᔒᒃ, ᓀᔥᑕ ᑭᔅᑭᓄᐙᐸᒥᑯᒃ ᐊᓂᑭ ᑳ ᐱᒧᑌᒋᒃ ᐁ ᐃᔑ ᐋᐸᑎᓕᐌᔮᒃ ᐁ ᐱᒧᑌᔮᒃ ᓂᓚᓈᓐ᙮

¹⁸ ᐌᓴ ᒥᒉᑦ ᐱᒧᑌᐗᒃ, ᒥᒉᑡᐤ ᑳ ᑮ ᐋᓕᒧᑕᒫᑕᑾᒃ, ᐊᓄᒡ ᓀᔥᑕ ᑳ ᐋᓕᒧᑕᒫᑕᑾᒃ ᐁ ᒫᑐᔮᓐ ᐅᑎ, ᐁ ᐸᒀᑕᒸᒋᒃ ᙭ᑕ ᐅᑦ ᐋᔑᑌᐋᑎᑯᒥᓕᐤ;

¹⁹ ᑫ ᐊᑎ ᓂᔑᐗᓈᑎᓯᒋᒃ, ᑳ ᐅ ᒪᓂᑐᒥᒋᒃ ᐗᑕᐗᐤ, ᑳ ᐅᒋ ᒫᒪᑖᑯᒧᒋᒃ ᐊᓂᐃ ᑫ ᐅᒋ ᓇᓀᐯᐎᓯᐙᔅᐸᓐ, ᑳ ᒫᒥᑐᓀᓕᑕᑭᒃ ᐊᔅᑭᐎ ᑫᒀᓇ᙮

²⁰ ᐌᓴ ᑭᑦ ᐃᔑᐱᒫᑎᓯᐎᓂᓇᐤ ᑭᒋᑭᔑᑯᒃ ᐃᑕᑾᓐ; ᐃᑕ ᓀᔥᑕ ᑭᒋ ᐅᒌᑦ ᑳ ᐊᔕᐙᐸᒪᒃ ᐯᒫᒋᐃᐌᑦ, ᐅᑎᐯᓕᒋᑫᐤ ᒋᓴᔅ ᙭;

²¹ ᐊᓇ ᑫ ᑴᔅᑭᓈᑯᑖᑦ ᑳ ᐋᐱᔅᑌᓕᑖᑾᒃ ᑭᔭᐎᓈᐤ ᑭᒋ ᐃᔑᑖᓂᐗᒃ ᑖᐱᔅᑯᒡ ᐎᔭᐤ ᑳ ᒪᓂᑐᐎᓈᑾᓂᓕᒃ, ᐁ ᐃᔑ ᐊᑑᔅᑫᒪᑲᓂᓕᒃ ᐅ ᑲᔥᑭᐅᐎᓐ ᒥᓯᐌ ᑫᒀᓇ ᑭᒋ ᔖᑯᒋᑕᒫᓱᑦ᙮