Tobit 2 - Maung A Balita Biblia

Say Impansilibra na sakey a Pamilya

¹ Kasabik ed abung, akapankakasakey kami lamet di Ana ya asawak tan Tobias ya anak ko. Nen Pistay Panagani a tatawagen met na Pistay Pitoran Simba, masasamit a kakanen so dinongoan ko.

² Kanengneng kon amayamay so kakanen ed lamisaan, inkuankod kinen Tobias, “Anak ko, paway kan mananap na Judion mairap-bilay tan kapara tayon nibantak dia, tan maseseg a manusumpal na saray ganggan na Dios. Itagar mo dia, pian makapibiang ed panangan na pista tayo. Ag ak onggapon mangan ya anggad ipawil mo dia.”

Walay Toon Apatey ed Ninive

³ Pinmaway sirin si Tobias a mananap na Judion asalita nen ama to. Balet pinmoliktar a tampol tan ineyag to, “Ama! Ama!” “On, anak ko, anto man?” tinepet ko. “Apatey so sakey a kapara tayon Judio. Walay anikel ed sikato, insan to imbantak ed tindaan so bangkay to.”

⁴ Tampol ya inmalagey ak ya ag ko ni atawayan imay nisaklang. Impaliis ko may bangkay a walad dalan, inawit kod sirum a pasen, tan diman ko intilak ya anggad mansironget, ta nayarian ko lad satan ya ikotkot.

⁵ Kasumpal to ya, sinmempet ak tan nanoras ak a panlinis koy siak a dili onung ed ganggan. Maerermen ak a nandem.

⁶ Nipanunot ed siak imay inkuanen propita Amos ed saray totood Betel, “Magmaliw a panangitolur na inatey iray pista yo, tan nagawan akis na ermen iray magayagan kanta yo.” Ginapwan koy nanakis.

⁷ Kaselek na agew, pinmaway ak, nanggawa ak na abut tan intabun ko may bangkay.

⁸ Lapud sayan ginawak, impasen ak a sakey a makulang-kulang na saray kakaabay ko. “Ag ka ni aderya?” kuanda. “Eerelen da ka la nen saman lapud pangipopompon mod saray inaatey; no ag ka labat akabatik, pinatey da ka. Insan natan, gagawaen mo ni lamet.”

Abulag si Tobit

⁹ Diad saman a labi nanoras ak a panlinis koy siak a dili onung ed ganggan, insan pinmaway ak ed solar ko ya onogip ed abay na padir. Masalimoot ed saman a labi, kanyan ag ko la nankobut.

¹⁰ Wala ray manok ya anuyaw a pinmokuk ed tapew na padir ed petek ko, balet ag ko amtan wadman ira. Naplagan iray matak na ampeteng a tai da ra may manok et walay ampotin bengatla a nikolaba ed saray matak. Sinansakey kon nila ray doktor, balet kapag itdan da ak na saray tambal da, lalon ag ko makanengneng. Diad kaonuran sigput ya abulag ak. Apat taon ya ag ak makanengneng a balut. Mapalaloy paga na saray kakanayon ko lapud kipapasen ko, tan tinulongan ak nen Ahikar a duay taon kasakbayay inyakar tod dalin na Elam.

Say Kolkolan na sakey a Pamilya

¹¹ Kataynan nen Ahikar, nakaukolan a mankimey si asawak ya Ana, kanyan nanlagay abel a singa saray arum a bibii.

¹² Kapag nasumpal toy abel, iyakar tod saray amo to, et sikato met lay bayaran da. Aminsan ya agew, nen asumpal lay panaon na betel, akasumpal si Ana na sakey a pirason abel ed panaglagaan to; inyakar tod saray totoon nampagawad sikato. Binayaran day kanepegan a bili to, insan da ni initdan na sakey a kanding.

¹³ Nen insempet to may kanding, ginapwan toy mambikbik. Inkuankod satan, “Iner so nanlapwan na satay kanding? Tinakew mo, anto? Ipawil mod saray makankien. Makapoy so mangan na tinakew!”

¹⁴ “Aliway ibabagam,” ebat nen Ana. “Impangaro tan a kanding; kaarumay bayar na abel a ginawak.” Balet ag ak anisiad imbaga to, kanyan mapalaloy baing ko lapud sayan ginawa to. Ingganggan kon ipawil to may kanding ed saray makankien, balet inkuanton inmebat, “Natan, atalusan ko lay petepeteg ya inkatoom! Kawalaan to la may panangarom ed saray arum a totoo? Kawalaan da la ra may kaabigan a ginagawam?”