Pilipus 1 - Manobo Western Bukidnon

¹ Surat heini ni Pablo wey ni Timoteo te menge sulug̵uen ni Jesu Kristu. Ibpeuwit heini is surat diyan te keniyu te langun he menge tumutuu ki Jesu Kristu he menge meg̵inged diyan te inged he Pilipus wey te menge ebmeg̵urangen niw wey menge diyekunu.

² Berakat he ikeg̵ag̵ew kew te Amey tew he Megbevayà wey te Nengazen tew he si Jesu Kristu, ne veg̵ayi kew zan te melinawen he kebpekesavuk.

Is Ked-ampù ni Pablo

³ Dekelà utew is kebpeselemati ku te Megbevayà tew tenged keniyu emun egkeisip ku sikiyu.

⁴ Ne emun id-ampù ku sikiyu utew a egkelipey

⁵ su egketenuzan ku is kedtevangi niw kediey te kedsengyawa ku te Meupiya he Tudtulanen puun pa te timpu zengan te kebpeketuu niw taman en guntaan.

⁶ Dutun he timpu mibpuunan te Megbevayà is meupiya he vaal zin he edhimuwen din diyan te keniyu. Ne netuenan ku he ebpeniguduwan din pa heini edhimuwa taman te egkepasad din keuzemà te andew te kedlikù ni Kristu.

⁷ Hustu iyan is ked-isipa ku keniyu te iring kayi su minsan ke pinirisu a wey ke kenà a pinirisu wey ke edsangyew a te Meupiya he Tudtulanen wey ke edtevaken ku is menge kuntada te Lalag te Megbevayà, mahal kew layun dini te g̵ehinawa ku su pudu kiw ingkeg̵ag̵ew te Megbevayà.

⁸ Ebpeketistig̵us is Megbevayà he utew zekelà is kebulunga ku keniyu su is kezekelà te g̵ehinawa ku keniyu, ne iring te kezekelà te g̵ehinawa ni Jesu Kristu keniyu.

⁹ Ne id-ampù ku he med-iseg is kebpepurpurungè niw, is kegketueni niw te menge ulaula te Megbevayà, wey is ketau niw te ked-isip

¹⁰ su wey niw layun metueni ke hengkey is hustu ne wey niw layun heini meulaula. Ne zutun wazà keuzemà igkesawey ziyan te keniyu su egkehimu kew he wag̵as dutun te kedlikù ni Kristu.

¹¹ Ne zutun egkeveelan niw is minsan hengkey he metazeng he ulaula tenged te g̵ehem he ibeg̵ey ni Jesu Kristu su wey mezalig wey mevantug is Megbevayà.

Is Kedelig̵a ki Jesus Diyà te Minsan Hengkey he Egkeulaula

¹² Menge suled, egkesuatan ku he mesavut niw he is langun he mereg̵en he nehitavù kediey, ne kenà mezaat, kekenà, meupiya, su neketavang kedì te kedsengyawa te Meupiya he Tudtulanen.

¹³ Su is langun he menge sundaru he guwardya zini te turug̵an te hadì wey is minsan hentei pa kayi, ne netuenan dan he mibpirisu a tenged dà te sulug̵uen a ni Kristu.

¹⁴ Ne kenà duen dà taman su is kezekelan te menge zuma tew he tumutuu, ingkeheg̵et te kedsarig dan te Nengazen heini is kebpirisuwa kedì. Ne tenged kayi ed-iseg is sigudu zan te kedsengyawa te Lalag te Megbevayà ne kenè dan en egkehandek.

¹⁵ Is duma, ne iyan idsengyawa zan te impenurù ni Kristu is: tenged te nesina zan kediey ne wey e zan melevawi. Iyan, duen duma he iyan idsengyawa zan te menge penurù ni Kristu su igkesuat dan heini te ebpenudtul.

¹⁶ Ebpenudtul zan tenged te mahal a ziyà te g̵ehinawa zan su netuenan dan he mibpilì a te Megbevayà wey ku metavak is menge kuntada te Meupiya he Tudtulanen.

¹⁷ Iyan, is menge zuma, kenà meupiya is tuyù dan te kebentug̵a zan ki Kristu. Egkesuatan dan he melevawi e zan ne kunaan dan ke pinaag̵i kayi egkeumanan is menge samuk ku zini te pirisuwan.

¹⁸ Iyan, nasì ku igkelipey heini is menge vaal zan su ke hustu is tuyù dan wey minsan ke mezaat, maambe en, asal mevantug dan si Kristu.

¹⁹ Kenà egkeawà is kelipey ku su netuenan ku he ibpaawà a kayi te pirisuwan tenged te ked-empua niw kedì wey tenged te tavang te Wag̵as he Mulin-ulin he midtevangan din daan si Jesu Kristu.

²⁰ Ne utew ku egkesuati, wey idsarig ku ziyà te Megbevayà he layun ku metuman is ebpeveelan din kedì su wey a kenà meeled te minsan keenu he timpu lavew en guntaan. Egkesuatan ku he mezalig si Kristu tenged kedì pinaag̵i te kebpaawaa kedì kayi te pirisuwan ne emun kenà, ne mezalig si Kristu pinaag̵i te kebpatey ku.

²¹ Ne tenged te egkesuatan ku he mezalig si Kristu, egkesuatan ku he mebmelug̵ayad pa is ked-ubpaubpè ku zini te kelibutan su wey mevantug ku pa si Kristu, iyan, ke ebpatey a ne lavew pa he ibmeupiya ku.

^22-23 Kenè ku egketuenan ke hendei zapit is meupiya he ebpilien ku, su egkesuatan ku he metapus en is ked-ubpaubpè ku zini te kelibutan wey a mekepekidume en ki Kristu su meupiya pa utew haazà. Iyan, ke zuen pa ebpeveelan kedì he ebpulus, meupiya zaan.

²⁴ Iyan, kinahanglan he kenè e pa ebpatey wey ku sikiyu metevangi.

²⁵ Ne tenged te iyan heini netag̵ù dini te g̵ehinawa ku, netuenan ku he kenè pa egketapus is untung ku kayi te kelibutan ne ebpekiduma e pa keniyu wey ku mepurungi te edheg̵et is kelipey niw tenged te kedtuu niw.

²⁶ Ne zutun, ke ebpekelikù ad diyan te keniyu egkehimu he iyan a igkeventug̵a niw ki Jesu Kristu.

²⁷ Menge suled, ke minsan hengkey is egkehitavù kediey, utew kinahanglan he is menge ulaula niw, ne kenà ebpekesuwey te impenurù ni Kristu pinaag̵i te Meupiya he Tudtulanen. Su emun kenè kew edsuwey kayi, minsan ke kenà a ebpekelikù diyan, egketudtulan a he nesevaha is gehinawa niw wey tuyù niw te kedhag̵ù su wey metuuwi te mezakel he menge etew is Meupiya he Tudtulanen.

²⁸ Ne egketudtulan a zaan he kenè kew egkehandek te menge kuntada niw. Su emun kenè kew egkehandek kandan egkesavut dan he iyan sikandan edsilutan ne iyan kew ebeg̵ayan te untung he wazè din pidtemanan su ibpesavut kandan heini te Megbevayà.

²⁹ Su is mibpeveelan keniyu te Megbevayà, ne kenà iyan dà is kedtuuwi niw ki Kristu, kekenà, elin daan is ked-entusa niw te kemeresayan tenged te kedtuu niw kandin.

³⁰ Nekedreragkes kiw en is ed-antus te kemeresayan tenged te Meupiya he Tudtulanen. Ne heini is menge kemeresayan he nehitavù kediey zengan, ne kemulu g̵untaan kenè ku egkesuwey, sumalà is nezineg niw.