Pilimun INTRO1 - Manobo Western BukidnonIs Mehitenged te Surat he Para ki Pilimun Duen hangyù ni Pablo ziyà te emig̵u zin he si Pilimun he tigKulusas. Hein nepirisu si Pablo ziyà te Ruma nekilala zin is etew he egngezanan ki Unisimu. Si Unisimu, uripen ni Pilimun su zutun he timpu, utew medmezakel is menge etew he uripen. Ne si Unisimu, mibpeleg̵uyan din si Pilimun ne ziyà sikandin mekeaput te ki Pablo. Ne wazà meug̵et neketuu si Unisimu te Meupiya he Tudtulanen he impenurù ni Pablo ne nehimu sikandin he ug̵up ni Pablo zutun te kedlised din diyà te pirisuwan. Dutun te kegkehimuwa ki Unisimu he sakup ni Jesus, neisip ni Pablo he meupiya ke ed-husayen din si Unisimu wey si Pilimun su pudu zan en tumutuu ki Jesus. Iyan, egkahandek si Unisimu su zutun he timpu kenà supak te velaud te gubirnu emun edhimetayan te etew is ebpelag̵uy he uripen din wey ke ebpurungan din ebug̵ela. Ne mibpesuratan ni Pablo si Pilimun te kedhangyù diyà te kandin he peseyluwa zin si Unisimu wey zewata zin daan. Ne midtuu si Pablo he siguradu ed-uyun si Pilimun dutun te hangyù din su netuenan din he metazeng si Pilimun wey mahal ziyà te g̵ehinawa zin si Jesus he Nengazen. |
© 2001, Wycliffe Bible Translators, Inc., All rights reserved.
Wycliffe Bible Translators, Inc.