Pilimun 1 - Manobo Western Bukidnon

^1-2 Minahal he emig̵u zey wey timbang dey he si Pilimun. Siak si Pablo is nepirisu tenged te kedtuu ku ki Jesu Kristu wey si Timoteo he suled tew, ebpesuratan dey sikew, wey si Epiya he etevey tew tenged te kedtuu, wey si Erkipu he zuma tew he sundaru ni Kristu wey elin daan ebpesuratan dey is menge tumutuu he ziyan edsimba te valey nu.

³ Berakat he ikeg̵ag̵ew kew te Amey tew he Megbevayà wey te Nengazen tew he si Jesu Kristu wey veg̵ayi kew zan te melinawen he kebpekesavuk.

Is Kedtuu wey Gag̵ew ni Pilimun

⁴ Sikew, suled, layun dekelà is kebpeselemati ku te Megbevayà tenged kenikew te kada ku ked-ampù;

⁵ su nezineg ku is tudtul mehitenged te mezesen he kedtuu nu te Nengazen tew he si Jesus wey mehitenged te kebmahala nu ziyà te g̵ehinawa nu te langun he menge tumutuu kandin.

⁶ Ne id-ampù ku zaan he pinaag̵i te kebpekid-upakat nu kenami tenged te kedtuu tew, med-iseg is kedsavut tew te langun he meupiya he intuvad kenitew te Megbevayà tenged te nekidsevaha kiw ki Kristu.

⁷ Utew ku ingkelipey, Geli, is kebmahala nu te menge zuma tew he tumutuu. Ingkeheg̵et heini te kedtuu ku su pinaag̵i kenikew nengelipey is gehinawa te menge etew ziyan he g̵aked te Megbevayà.

Is Hangyù ni Pablo Mehitenged ki Unisimu

⁸ Ne tenged kayi te langun duen idhangyù ku kenikew. Netuenan ku he tenged te keg̵ehem he imbeg̵ey kedì ni Kristu egkehimu he edsug̵ù a kenikew he himuwa nu is hustu,

⁹ iyan, tenged te utew ka mahal zini te g̵ehinawa ku, edhangyù e zà kenikew. Siak, si Pablo, is meg̵urang wey g̵untaan pinirisu a zaan tenged te kedtuu ku ki Kristu,

¹⁰ edhengyuan ku sikew he peseyluwa nu si Unisimu. Tenged te kedtuu zin ki Kristu iring sikandin te tutuu en he anak ku su pinaag̵i kedì nehimu sikandin he tumutuu zini te pirisuwan.

¹¹ Dengan wazè nu pulus ki Unisimu, iyan, guntaan edekelà utew is pulus tew kandin.

¹² Ibpeulì ku en diyan te kenikew si Unisimu he utew ku pezem minahal.

¹³ Neisip ku he meupiya pezem ke iyan sikandin duma ku kayi su wey mehimu sikandin he iyan tavang nu kedì te kemulu e pa nepirisu zini tenged te kedsengyawa ku te Meupiya he Tudtulanen.

¹⁴ Iyan, kenè ku pa heini ebeelan te wazè nu pa itug̵ut kediey. Kenà a ebpeg̵es he ikehizu a kenikew. Su iyan meupiya is ebpuun te meliwanag he g̵ehinawa is kedhimuwa nu kayi.

¹⁵ Kela ke iyan tuyù te Megbevayà te kedsuwaya ni Unisimu kenikew is: impaawà sikandin diyan te kenikew te wazà utew meug̵et su wey mehimu he meg̵aked nu en te wazà pidtemanan.

¹⁶ Ne g̵untaan kenà sikandin uripen nu zà duen, kekenà, utew pa mahal kenà is uripen su suled nu en daan tenged te kedtuu zin ki Kristu. Utew sikandin mahal zini te g̵ehinawa ku ne mahal pa zaan diyan te kenikew, kenà tenged dà te uripen nu, kekenà, tenged daan te suled nu en tenged te Nengazen.

¹⁷ Ne emun ed-isipen a kenikew he timbang nu, ig̵alewg̵alew nu si Unisimu iring te kegelg̵elawa nu kediey.

¹⁸ Ke zuen salè din diyan te kenikew wey ke zuen utang din diyà te kenikew, isipa nu he kediey.

¹⁹ Ahaa nu is kedsurata ku kayi: Iyan a si Pablo ebayad. Asal netuenan nu he zekelà daan is utang nu kedì su pinaag̵i kediey nekeangken ka te untung he wazè din pidtemanan.

²⁰ Ne tenged kayi, Geli, edhengyuan ku sikew he ikehizu a kenikew su telesuled ki pinaag̵i te kedtuu ta te Nengazen. Himuwa nu heini wey a melipey su telesuled ki pinaag̵i ki Kristu.

²¹ Dekelà is kedsarig ku kayi te kebpesurati ku kenikew su netuenan ku he ebpemineg̵en a kenikew. Netuenan ku he zekelà is edhimuwen nu, kenà te idhangyù ku.

²² Ne zuen pa idhangyù ku he iyan is: endami a zaan te edhizeg̵aan ku ziyan, su zekelà is kedsarig ku he pinaag̵i te ked-ampù niw, idtug̵ut te Megbevayà he mekehendiyan a te keniyu.

²³ Si Ipapras, is duma ku he pinirisu tenged te kedtuu ki Jesu Kristu, ebpengemusta keniyu.

²⁴ Ebpengemusta zaan keniyu ensi Marcos, si Eristarku, si Dimas, wey si Lucas. Menge timbang ku sikandan kayi te ebpeveelan te Megbevayà.

²⁵ Berakat he ikeg̵ag̵ew kew is langun te Nengazen tew he si Jesu Kristu.