Kulusas INTRO1 - Manobo Western BukidnonIs Mehitenged te Surat he Para te Menge TigKulusas Nehimanan kew te para te untung niw tenged te kebpekidsevaha niw ki Kristu. Iyan heini ibpesavut ni Pablo hein mibpesuratan din is menge tumutuu ziyà te Kulusas. Kinahanglan he egketuenan dan heeyan su mezakel is edsupak keniyan he ketudluanan. Is duma egkag̵i te kenè pa ereg is kedserig̵i ki Jesus. Ke sikandan te utew kinahanglan is kebpezizalem te menge sug̵ù wey te zuma he menge tulumanen he imbeg̵ey te Megbevayà pinaag̵i ki Moises dengan, wey te zuma pa he menge tulumanen he midhimu te etew. Iyan, migkag̵i si Pablo te, “Lavew si Kristu te langun he vineelan wey minsan te mezakel he kelasi te menge mulin-ulin he zuen dan keg̵ehem wey g̵ehem.” Migkag̵i pa zaan sikandin te, “Is langun he menge sug̵ù te menge Hudiyu ne alung dà te ebperetengen dan.” Piru iyan tutuu is: neume en sikan is ebperetengen dan, su nekeume en si Kristu. Umba iyan tew sikandin edsilbiyan. Is duma, iyan kandan he penurù is: kenè kun tutuu he Megbevayà si Jesus. Piru sumalà is impesavut ni Pablo, “Iyan suat te Megbevayà is: langun he kegkemegbevayè din ne ziyà daan te anak din he si Jesu Kristu.” Umbe minsan hengkey he ebeelan ta, kinahanglan he iyan ta ibpehuna si Kristu, su is tumutuu ki Kristu, wazè din en kebpekidepità te kelibutanen he menge vutang su sakup en sikandin diyà te langit. Inragkes ni Pablo kayi te surat din is menge sug̵ù para mebmelipayen is pemilya. Duen menge sug̵ù he para te menge esawa he vahi, menge esawa he maama, menge anak wey menge ginikanan wey elin daan is menge sulug̵uen wey is menge egalen dan. |
© 2001, Wycliffe Bible Translators, Inc., All rights reserved.
Wycliffe Bible Translators, Inc.