Kulusas 3 - Manobo Western Bukidnon

Is Daan wey Veg̵u he Kineiya

¹ Ne, menge suled, nevanhew si Kristu ne iring te nevanhew kiw zaan duma kandin su zuen tew en untung he wazè din pidtemanan. Ne tenged kayi, kinahanglan he ebpurungan ta layun ed-isipa is ibpeisip-isip kenita te Megbevayà diyà te langit he zutun edhadì si Kristu he ebpinuu ziyà te zapit te egkekewanan te Megbevayà.

² Ed-isipen ta layun heini ne kenè te en ed-isipen is menge mezaat he ulaula zini te tanà.

³ Umba egkeg̵iyen ku heini su sikita is tumutuu, minatey ki en duma ki Kristu ne is tutuu he untung ta pinaag̵i kandin, wazè pa heini ipezayag te Megbevayà.

⁴ Umba, menge suled, emun edlikù dini si Kristu he iyan puunà te veg̵u he untung ta, ibpeg̵awag̵awa is kekempet din ne ibpeg̵awag̵awa zaan dutun is kekempet te kenita he veg̵u he untung su zutun duma ki kandin.

⁵ Umba, menge suled, kenè niw en itug̵ut he tumana niw is mezaat he kebayè niw; kenè niw ul-ulaha is mahawag wey meremerik he ulaula ne kenè niw mehimuwa he zuen suat niw te kenè niw esawa; engkezi niw is mezaat he ulaula wey is keleleg̵ed su emun leg̵ezen ki te menge azen, henduen be te egkeilisan dini te g̵ehinawa ta is tutuu he Megbevayà te menge azen.

⁶ Ne siguradu edsilutan te Megbevayà is menge etew he kenà ebpemineg su layun dan ed-ulaula te menge iring kayi.

⁷ Ne iring kayi zaan is mid-ulaula niw zengan su zutun layun mezaat is menge ulaula niw.

⁸ Ne g̵untaan, kinahanglan he ed-iniyug̵an ta is minsan hengkey he mezaat he ulaula iring te kegkepauk wey kebpekigkuntada te zuma he etew, is kebpesipala, is ked-ituk wey is meremerik he kegkag̵i.

⁹ Kenè ki edtarùtarù su nelibri ki en te zaan he kegkeetew ta wey te menge mezaat he vaal he mid-ulaula ta zengan te kedtumana ta te menge zaan he suat ta.

¹⁰ Ne g̵untaan midhimu ki en te Megbevayà he veg̵u en he etew he edhimuwen din he iring te kandin. Umba midhimu ki zin he veg̵u su wey ta mepurung mesavut ke hentei sikandin.

¹¹ Ne tenged kayi, sikita is midhimu zin he veg̵u he etew, wazè ta zapit ibpelavi te etew he Hudiyu wey te etew he kenà Hudiyu su neked-iiring diyà te Megbevayà is nesirkunsidar wey is wazà mesirkunsidar; neked-iiring daan diyà te kandin is neketunghà wey is wazà meketunghà, is sulug̵uen wey is egalen. Dini te kenitew te menge veg̵u he etew, iyan dà lavew si Kristu ne midlumunan ni Kristu is kada sevaha kenitew.

¹² Ne, menge suled, geina te mibpilì kiw te Megbevayà, ne midhimu kiw zin he menge g̵aked din, wey g̵eina te mahal kiw ziyà te g̵ehinawa zin, kinahanglan he zekelà is hizu ta wey g̵ag̵ew ta ziyà te minsan hentei. Ebpurungan ta is menge zuma ta ne kenè ki ebpelavew. Kinahanglan he mepelevayen ki layun.

¹³ Ed-entusen ta, ne ebpeseyluwen ta is menge zuma ta he ebpekesupak kenita. Kinahanglan he iring te mibpesaylu kiw te Nengazen tew ebpepespeseyluwè kiw zaan.

¹⁴ Kinahanglan he mahal ziyà te g̵ehinawa te kada sevaha is minsan hentei he zuma zin. Iyan heini lavew te langun he sambag ku keniyu su emun egketuman niw heini egkehimu niw zaan is langun kayi te menge meupiya he ulaula.

¹⁵ Ne kinahanglan daan, he iyan niw ipelavi ziyà te g̵ehinawa niw is kelinew he ibeg̵ey ni Kristu su umba midhimu kiw he tumutuu te Megbevayà su wey kiw mebmelinawen su nesevaha kiw is menge tumutuu. Ne layun niw peselemati te Megbevayà is gag̵ew zin keniyu.

¹⁶ Menge suled, layun niw zewata is impesavut ni Kristu. Pepempenuruey kew wey mebpesemsembag̵è kew sumalà is ketau te kada sevaha. Kanta kew te menge idalig te Megbevayà, wey menge Salmo, wey elin daan is menge kentahan he ibpinted keniyu te Wag̵as he Mulin-ulin. Kentahi niw is Megbevayà he utew zekelà is kebpeselemati niw kandin.

¹⁷ Ne minsan hengkey he egkeg̵iyen niw wey ed-ul-ulahan niw, kinahanglan he zait heini he ulaula te sulug̵uen te Nengazen tew he si Jesus. Ne kinahanglan daan he layun dekelà is kebpeselemati niw te Amey tew he Megbevayà pinaag̵i te kebpekidsevaha niw ki Jesus.

Is Menge Sambag Diyà te Menge Tumutuu

¹⁸ Sikiyu is menge vahi, pevayàbayà kew te esawa niw su iyan heini hustu he ulaula te vahi he tumutuu te Nengazen.

¹⁹ Ne sikiyu zaan is menge maama, mahala niw is esawa niw; kenè niw sikandan henghenggeri.

²⁰ Sikiyu is menge vatà he tumutuu te Nengazen, pemineg̵a niw layun is menge sug̵ù te g̵inikanan niw su utew heini egkesuati te Megbevayà.

²¹ Ne sikiyu zaan is menge g̵inikanan, kinahanglan he kenà utew subra is kedsewaya niw te menge anak niw su kela ke maawà diyà te kandan is gustu zan te ked-ulaula te hustu.

²² Ne sikiyu is sulug̵uen, layun niw pemineg̵a is sug̵ù te egalen niw te minsan keenu he timpu, ne kenà dutun dà te timpu he ebentayan kew zin. Ne kenè niw iyan dà ibpemineg̵a kandin su wey meupiya is isip din keniyu, kekenà, kinahanglan he iyan ketezengan ke maan is ebpurungan niw is baal niw su g̵eina te zekelà is kedtahud niw te Nengazen tew.

²³ Ne minsan hengkey is ebpeveelan keniyu, ne purungi niw su iyan edsusi keniyu is Nengazen ne kenà iyan dà haazà is kelibutanen he egalen niw,

²⁴ su netuenan niw en he edsuhulan kew keuzemà te Nengazen. Ne ibeg̵ey zin keniyu haazà is suhul he impenaad din su is tutuu he egalen niw ne iyan si Kristu.

²⁵ Su sikan is etew he ed-ulaula te mezaat, ne edsilutan sikandin sumalà is keveg̵at te salè din su wazà ibpelavi te Megbevayà te minsan hentei.