Kulusas 2 - Manobo Western Bukidnon

¹ Umba egkeg̵iyen ku heini su egkesuatan ku he metueni niw ke maan is ebpenigudu a edhag̵ù tenged keniyu wey tenged daan te menge tumutuu ziyà te inged he Leudisiya wey is minsan hentei he tumutuu ziyan he iring keniyu wazè pa mekekilala kedì.

² Iyan idhag̵ù ku su wey melig-eni is kedtuu niw te Megbevayà pinaag̵i te kegkeupakat niw wey pinaag̵i te kebmahala niw te uman sevaha keniyu. Egkesuatan ku he meheg̵et is kegkesavut niw te impenurù keniyu he iyan kes impezayag te Megbevayà keniyu mehitenged ki Kristu.

³ Su iyan dà sikandin ebpekeveg̵ey te minsan hengkey he tutuu he ketau wey tutuu he kedsavut.

⁴ Egkeg̵iyen ku heini su wey wazà mekekabig keniyu he minsan hentei pinaag̵i te menge ketezengan he henduen be te hustu, iyan, tarù.

⁵ Su minsan te wazà a g̵untaan diyan te keniyu, layun ku sikiyu ed-isipa. Igkelipey ku sikiyu su netuenan ku he mibpurungan niw te ed-ulaula is meupiya he ulaula wey melig-en daan is kedtuu niw ki Kristu.

Is Kelibriyanan Pinaag̵i te Kebpekidsevaha Tew ki Jesu Kristu

⁶ Ne g̵eina te midawat niw si Jesu Kristu he Nengazen niw kinahanglan he is menge ulaula niw, ne zait te upakat niw kandin.

⁷ Purung kew pendalid diyà te kandin; purungi niw istudyuwi is menge ulaula zin; purungi niw tuuwi sikan is tutuu he tuluuwen he impenurù keniyu. Ne kinahanglan he layun niw peselemati te Megbevayà is gag̵ew zin keniyu.

⁸ Andam kew su kela ke zuen egkabig keniyu pinaag̵i te kebpenurù te tuluuwen he tarù ne wazè din pulus su imbilinbilin dà te menge etew. Kenà haazà hustu he tuluuwen su kenà ebpuun diyà te ki Kristu.

⁹ Umba egkeg̵iyen ku heini su si Kristu, nehimu sikandin he etew. Duen din lawa, iyan, minsan pa kayi is minsan hengkey he ziyà te Megbevayà ne ziyà te kandin.

¹⁰ Ne sikiyu zaan, pinaag̵i te kebpekidsevaha niw ki Kristu, nekepurung kew en mekeazen te untung he imbeg̵ey keniyu ni Kristu. Ne iyan si Kristu sikan is edhadì te minsan hentei he kedesenan he zuen din keg̵ehem wey kebayàbayà.

¹¹ Ne tenged kayi, minsan kenè kew menge Hudiyu, is midhimu keniyu te Megbevayà, ne iring duen te kedsirkunsidara zengan te menge Hudiyu su nehimu kew en he menge g̵aked te Megbevayà pinaag̵i te kebpekidsevaha niw ki Kristu. Iyan, selakew heini, su kenà pinaag̵i te kebpelii te lawa zà duen, kekenà, in-awà ni Kristu is gehem te mezaat he kebayà te lawa niw.

¹² Ne tenged kayi inleveng kew zuma kandin dutun te kebewtismuwi keniyu, ne nevanhew kew zaan duma kandin su nekidsevaha kew kandin tenged te midtuuwan niw he mekeg̵eg̵ehem is Megbevayà. Iyan sikandin sikan is mibanhew ki Kristu.

¹³ Ne sikiyu, wazè niw pa zengan untung he wazè din pidtemanan tenged te memezaat is menge ulaula niw te kenà menge Hudiyu wey tenged te midtuman niw is memezaat he kebayà te lawa niw. Ne minsan pa zutun, mibeg̵ayan kew te Megbevayà te untung he wazè din pidtemanan ne nevanhew kew en duma ki Kristu. Mibpesaylu kiw te Megbevayà te langun he menge salè tew.

¹⁴ Ne minsan pa te wazè kiw medtuman te insurat he kesug̵uan din, pinaag̵i te kebpatey ni Kristu ziyà te krus, in-awè din is kesug̵uan ne tenged kayi wazè en igkesiluti zin kenitew.

¹⁵ Ne haazà is menge kedesenan he mezaat he mulin-ulin he zuen dan keg̵ehem te kebayàbayà, in-awà te Megbevayà is keg̵ehem dan, ne pinaag̵i te kedsulituwa zin kandan pinaag̵i te kebpatey ni Kristu ziyà te krus, impeehè din he wazè dan en kebpekesukul.

¹⁶ Umba, menge suled, kenè niw itetenged is edsudì keniyu emun kenè niw ebpezumdumahan is egkesuatan dan he ibpeulaula keniyu mehitenged te kegkaan wey ked-inum, wey mehitenged daan te kedsilibra te menge mahal he menge andew wey kedsilibra te intrada te hayag wey menge andew te kedhimeley.

¹⁷ Su is menge iring dutun, ne nehimu zengan he alung dà. Ne ziyè pa te huziyan is teg̵ialung dutun he iyan si Kristu.

¹⁸ Duen daan menge etew he egkag̵i he lavew sikandan tenged te zuen kun menge egkein-inuwan he impaahà kandan wey tenged te kenè dan mepelevawen. Ne ibpenurù dan he kinahanglan he ebpekeazap ki te menge velinsug̵uen te Megbevayà ziyà te langit. Kenè niw, menge suled, itetenged is kedsudì dan keniyu su is iring dutun he etew, ne ebpezalig dà, iyan, wazà hustu he ketezengan te kebpezalig dan su iyan ebayàbayà te isip dan is kelibutanen he kebayè dan.

¹⁹ Ne wazè dan en upakat ki Kristu he iyan ed-uwit kenitew. Iyan si Kristu puunà te zesen te kedtuu tew ne pinaag̵i kandin ed-iseg is kezesen te upakat tew te langun he tumutuu sumalà is egkesuatan te Megbevayà, iring te lawa tew, ne ed-iseg daan is desen din ne kenè ebpekedsusuwey pinaag̵i te kegkevagkes kayi zutun te menge ug̵at din.

^20-22 Na, menge suled, geina te iring te minatey ki en duma ki Kristu, wey kenè ki en maan egkeveyveyaan te menge kenà hustu he tuluuwen, kinahanglan he kenè kew en maan mebpemineg te menge sug̵ù te menge etew he menge kuntada te Megbevayà. Menge sug̵ù heini te menge etew zà duen. Egkag̵i zan he zuen menge egkeenen he kenà ibpekaan kenitew te Megbevayà, ne minsan is kegezami wey is kegewezi zà kayi ne wazè din kun itug̵ut kenitew. Kenè niw, menge suled, pemineg̵a is iring dutun su wazà pulus te idawey zan su emun egkeenen tew is egkeenen ne egkeawà heini.

²³ Haazà is menge etew, henduen be te hustu is ibpenurù dan. Egkag̵i zan he kinahanglan he ed-ezapen ta is menge velinsug̵uen te Megbevayà, wey kinahanglan he ebminusen ta is pid-etawan ta wey kinahanglan daan he edresayen ta is lawa ta. Ne minsan pa kayi, kenà hustu heini is ibpenurù dan su is menge sug̵ù he iring kayi, ne kenà heini ebpeketavang kenita te kedsukul te mezaat he kebayà te lawa ta.