Kulusas 1 - Manobo Western Bukidnon

¹ Siak si Pablo wey heini is suled tew he si Timoteo, ebpengemusta key keniyu ziyan. Epustul a; midsug̵ù a ni Jesu Kristu su iyan egkesuatan te Megbevayà.

² Ebpesuratan ku sikiyu is menge g̵aked te Megbevayà diyan te inged he Kulusas he menge metinumanen te lalag ni Kristu. Berakat he ikeg̵ag̵ew kew te Amey tew he Megbevayà wey veg̵ayi kew zin te melinawen he kebpekesavuk.

Is Ampù ni Pablo

³ Sikami, emun id-ampù dey sikiyu, layun key ebpeselemat diyà te Megbevayà he Amey te Nengazen tew he si Jesus tenged keniyu,

⁴ su nezineg dey is tudtul he mezesen is kedtuu niw ki Jesu Kristu wey zekelà layun is gag̵ew niw te minsan hentei he etew he g̵aked te Megbevayà.

⁵ Umba mezesen is kedtuu niw wey zekelà is gag̵ew niw su kenà egkeawà is perateng niw te langun diyà te langit he integ̵ana keniyu te Megbevayà. Nezineg niw heini zutun te kebpesevuta keniyu te tutuu he penurù he iyan is Meupiya he Tudtulanen.

⁶ Heini is migkag̵i he Meupiya he Tudtulanen, pinaag̵i te kedtuu kayi, mezakel en he menge etew ziyà te minsan hendei he inged is mibmeupiya is menge ulaula zan. Ne kenà duen dà taman su ed-iseg ebmezakel is menge tumutuu pinaag̵i te Meupiya he Tudtulanen, iring te layun daan ed-iseg ebmezakel is menge tumutuu ziyan te keniyu puun pa zutun te andew zengan he nezineg niw is tudtul te g̵ag̵ew kenitew te Megbevayà wey netuenan niw he venar iyan.

⁷ Impenurù keniyu heini ni Ipapras he minahal he zuma zey he sulug̵uen ni Kristu. Metinumanen sikandin te menge sug̵ù ni Kristu pinaag̵i te kedtavang din kenami.

⁸ Midtudtul zin kenami he zekelà is gag̵ew niw te menge zuma tew he tumutuu tenged te mid-ulinan kew te Wag̵as he Mulin-ulin.

⁹ Ne tenged kayi ibpenigudu zey sikiyu id-ampù puun pa zutun te andew zengan he nezineg dey is tudtul mehitenged te kedtuu niw. Layun dey id-ampù diyà te Megbevayà he veg̵ayi kew zin te kegkesayud te langun he ulaula he ebpeveelan din keniyu, he ke và dà egkeg̵iya, mehimu kew zin he mebmetau ne pinaag̵i te Wag̵as he Mulin-ulin, iveg̵ey zin keniyu is kegketuusi te meupiya wey mezaat.

¹⁰ Su emun ebeelan din is iring kayi, ne human egkehimu is menge ulaula niw he zait he menge ulaula te menge etew he neg̵aked te Nengazen tew, ne egkehimu zaan he layun niw egkeveeli is egkesuatan din; layun niw egkeulaula is minsan hengkey he menge meupiya he ulaula. Ne layun daan ed-iseg is kegketueni niw te menge ulaula te Megbevayà.

¹¹ Ne ibeg̵ey zin keniyu is dekelà he g̵ehem he ebpuun te zekelà he g̵ehem din, ne tenged kayi te g̵ehem layun niw egkeantus is kemereg̵enan he zekelà is kelipey niw.

¹² Ne kenà duen dà taman su zekelà dutun is kebpeselemat niw te Amey tew he Megbevayà tenged te kedhimuwa zin keniyu he zait he mekeambit kew zutun te langun he ibeg̵ey zin diyà te keniyu te menge g̵aked din he midteyawan is isip dan.

¹³ Midtevangan kiw te Amey tew he Megbevayà ne tenged kayi wazè kiw en maan meveyveyai te kerusireman, he ke và dà egkeg̵iya, si Setanas. Ne g̵untaan iyan en ebayàbayà kenitew is Anak te Megbevayà he si Jesus he utew mahal ziyà te g̵ehinawa te Megbevayà.

¹⁴ Ne pinaag̵i kayi te Anak din, nevelukasan kiw zin te kegkeuripen kenitew ni Setanas ne mibpesaylu kiw zin te menge ulaula tew he mezaat.

Is Tutuu Mehitenged ki Kristu

¹⁵ Heini is Anak te Megbevayà, ne iyan kebpeg̵awag̵awa te kenà egkeahà he Megbevayà. Is Anak, ne lavew sikandin te minsan hengkey he linimbag din

¹⁶ su pinaag̵i kandin te Anak te Megbevayà midlimbag te Megbevayà is minsan hengkey ziyà te langit wey zini te tanà, sikan is egkeahà te etew wey is kenà egkengeahà he kedesenan he zuen dan keg̵ehem, wey kebayàbayà, wey kedhadì. Is Anak, mibpeveelan kandin te Amey zin he Megbevayà is minsan hengkey su wey zin meg̵amit heini is minsan hengkey he linimbag din.

¹⁷ Ne elin daan ketezengan ke maan is lavew is Anak te Megbevayà su tenged te zaan en sikandin te wazè pa limbag̵a is minsan hengkey, wey pinaag̵i kandin is hustu he kebpekesavuk wey egkengeulaula te langun he linimbag.

¹⁸ Wey tenged te iyan sikandin ebayàbayà te lawa zin, he ke và dà egkeg̵iya, is langun he menge tumutuu kandin, wey tenged daan te iyan sikandin ebeg̵ey te untung diyà te langun he menge tumutuu su iyan sikandin lavew te langun he egkengevanhew ne tenged kayi iyan sikandin lavew te minsan hengkey.

¹⁹ Ne egkesuatan te Amey tew he Megbevayà he ke hengkey sikandin, iyan ded daan sikan is Anak din.

²⁰ Ne egkesuatan din daan he pinaag̵i te Anak din meked-uliey te meupiya he kedepità sikandin wey is minsan hentei zini te tanà wey ziyà te langit. Ne pinaag̵i te kedtig̵is duen te lengesa te Anak din diyà te krus egkehimu he menge emig̵u zin is minsan hentei.

²¹ Kenè kew zengan menge emig̵u te Megbevayà, kekenà, menge kuntada kew zin su layun mezaat is menge isip niw wey ulaula niw.

²² Ne minsan pa te iyan haazà, midhimu kew g̵untaan te Megbevayà he menge emig̵u zin pinaag̵i te kebpatey ni Kristu. Umba mibpehimatey si Kristu su wey kew mehimu he menge etew he wazà mezaat he ulaula ne wazà igkesumbunga keniyu keuzemà emun ibpeetuvang kew zin diyà te Amey zin he Megbevayà.

²³ Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

Is Baal ni Pablo

²⁴ Maambe ke ebpekeantus a g̵untaan te merasey su iyan igkezeyzey niw. Igkelipey ku heini su iring te kegkerasey ni Kristu edhimesazan ku en is langun he mereg̵en he ibpaantus din kediey su wey mezeyzey is lawa ni Kristu, he ke và dà egkeg̵iya, is menge tumutuu kandin.

²⁵ Nehimu a he sulug̵uen wey a meketavang te menge tumutuu. Ne umba mibpilì a te Megbevayà su wey ku sikiyu metevangi is menge etew he kenà Hudiyu ne wey ku ikepurung ikepenudtul is Lalag te Megbevayà.

²⁶ Ne zengan, heini is Lalag, ne in-eles te Megbevayà ne wazà ipezayag diyà te menge etew, iyan, guntaan ibpezayag din en kenitew te menge tumutuu kandin

²⁷ su egkesuatan din he sikitew is menge g̵aked din, ne egkesayud kiw ke hengkey is utew lavew he meupiya he edhimuwen din diyà te langun he menge etew. Ibpesayud din en kenitew he edlumunan kiw ni Kristu ne tenged kayi egketuenan tew he edtulusen kiw keuzemà.

²⁸ Sikami, idsangyew zey si Kristu; edleg̵uyan dey is minsan hentei, wey ebpenurù key kandan ebpurung sumalà is egkehimu zey he ketau su wey meketuu is langun ki Kristu, ne wey sikandan keuzemà ikepeetuvang diyà te Megbevayà he wazà kurang te kedtuu zan.

²⁹ Siak, ebpenigudu a ebaal he edlig-enan te zekelà he zesen ni Kristu su wey metuman heini.