Juan 5 - Manobo Western Bukidnon

Is Etew he Neug̵et En is Kegkezeruwi Zin

¹ Neiwas heini, duen pista te menge Hudiyu; ne tenged kayi midhendiyè en maan si Jesus te Hiruselim.

² Ne ziyà te Hiruselim duen linew uvey te idselang te kutà he egngezanan te Idselang te Menge Ayam he Kerehidu. Ne ziyà te kilid dutun te linew, duen lelima he helungà. Ne haazà is linew, egngezanan te Bitsata te kineg̵iyan he Hibriyuhanen.

³ Mezakel is egkengezeruwan he zutun dan en ebpemen-ubpàubpà te menge helungà. Menge lakap, menge piang, wey menge minatey is divaluy he lawa, ne zutun edteg̵azan dan is kegurig̵awa zutun te wahig

⁴ su zuen timpu he zuen kun belinsug̵uen te Megbevayà he ebpenaug dutun te linew ne egurig̵awen din haazà is wahig. Ne zutun, is egkehuna he etew he ebpekeagbur zutun te wahig, egkeulian sikandin te minsan hengkey he zaru zin.

⁵ Ne zuen dutun etew he neug̵et en he egkezeruwan su ketluan en wey walu he tuig is kegkezeruwi zin.

⁶ Naahà sikandin ni Jesus is dutun edhidhizeg̵à ne netuenan ni Jesus he neug̵et en haazà is daru zin. Ne mid-insaan ni Jesus te, “Mama, egkesuat ke ve he meulii ka?”

⁷ Ne midtavak haazà is etew te, “Datù, wazà duma ku he ebpekeagbur kedì keniyan te wahig emun egurig̵awen en ne layun a egkehunai te zuma te kenè e pa ebpekeagbur.”

⁸ Ne migkag̵i si Jesus te, “Enew ka, ne luluna nu heeyan is ikam nu; ne hiphipanew ka.”

⁹ Ne zutundutun dà neulian haazà is etew; midlulun din haazà is ikam din ne midhiphipanew. Nehitavù haazà te andew he Sebadu he iyan Andew te Kedhimeley.

¹⁰ Umba, haazà is etew he neulian, nepeukan sikandin te menge punuan he Hudiyu; ke sikandan te, “Iyan heini Andew te Kedhimeley ne ebpekesupak ka te kesug̵uan tew ke ed-uwiten nu heeyan is ikam.”

¹¹ Ne midtavak haazà is etew te, “Sikan is mibawì kediey, migkeg̵iyan e zin he luluna ku is ikam ku wey medhiphipanew a.”

¹² Ne in-insè dan te, “Hentei he etew is migkag̵i kenikew he luluna nu is ikam nu wey medhiphipanew ka?”

¹³ Iyan, wazà mekilala si Jesus dutun te etew he neulian su medmezakel is nengetig̵um he menge etew zutun ne wazè en dutun si Jesus.

¹⁴ Ne netegteg̵aad dutun naahà sikandin ni Jesus diyà te simbahan he egngezanan te Valey te Megbevayà, ne migkeg̵iyan ni Jesus te, “Meupiya su neulian ke en; iniyug̵i nu en is menge mezaat he ulaula nu su wey kenè nu meeg̵iyi is tuwas pa he mezaat.”

¹⁵ Ne zutun mid-awà haazà is neulian ne migkeg̵iyan din is menge punuan he menge Hudiyu he iyan si Jesus mibawì kandin.

Is Untung Pinaag̵i te Anak te Megbevayà

¹⁶ Umba puun dutun nepeukan si Jesus te menge punuan he menge Hudiyu su utew zan ingkeepes haazà is kebewii zin te egkezeruwan dutun te andew he Sebadu.

¹⁷ Iyan, duen ketezengan ni Jesus, ke sikandin te, “Is Amey ku he Megbevayà, kenà sikandin edhimeley he ebaal, ne siak, ebpenigudu a zaan ebaal.”

¹⁸ Ne zutun mid-iseg is suat te menge punuan he menge Hudiyu te kegkehimetayi kandin su ke sikandan te, “Kenè dà taman te kedsupaka zin te Andew te Kedhimeley, kekenà, edsupaken din daan is Megbevayà su egkeg̵iyen din he Amey zin is Megbevayà, he ke và dà egkeg̵iya, Megbevayè sikandin.”

¹⁹ Ne zutun midtavak si Jesus te, “Utew venar is egkeg̵iyen ku keniyu he siak is Anak te Megbevayà, wazà egkehimu ku te kediey zà duen he g̵ehem; iyan dà edhimuwen ku is egkeehè ku he edhimuwen te Amey ku. Is ebeelan din, iyan daan ebeelan ku.

²⁰ Siak is Anak din, utew a mahal ziyà te g̵ehinawa te Amey ku, ne ibpeehè din kediey is langun he ebeelan din. Ne kenà duen dà taman su keuzemà, lavew pa he mekeg̵eg̵ehem is ibpenurù din kediey, ne ebeelan ku wey kew meinuinu.

²¹ Is Amey ku, ebenhawen din is menge minatey ne ibeg̵ey zin kandan is untung. Ne siak is anak din, untung daan is ibeg̵ey ku ziyà te minsan hentei he ebpilien ku.

²² Is Amey ku, kenà iyan sikandin edsusi keuzemà te nengeveelan te tivuuk he menusiyà su siak is anak din, mibeg̵ayan e zin te ketenged te kedsusi te nengeveelan te menusiyà,

²³ su egkesuatan din he edtehuzen a te langun he menge etew iring te kedtehuza zan kandin. Ne is minsan hentei he kenè e zin edtehuzen, is kenè din kedtahud kediey, iyan daan kenè din kedtahud te Amey ku he Megbevayà he midsug̵ù kedì.

²⁴ Utew venar is egkeg̵iyen ku he is minsan hentei he ebpemineg te menge lalag ku ne edtuu te Megbevayà he midsug̵ù kediey zini, iyan ebpekeangken te untung he wazà pidtemanan. Kenà sikandin keuzemà edsilutan su nekelikey en te kemetayen is gimukud din wey naangken din en is untung he wazà pidtemanan.

²⁵ Utew venar is egkeg̵iyen ku keniyu he egkeuma is andew ne neume en guntaan he siak is Anak te Megbevayà, egkezineg te menge etew he wazè pa meveg̵ayi te untung is menge lalag ku kandan, ne haazà is ebpemineg, ebeg̵ayan ku te untung he wazà pidtemanan.

²⁶ Mekeg̵eg̵ehem is Amey ku ne ebpekeveg̵ey te untung, ne siak daan is anak din, tenged te mibeg̵ayan e zin te g̵ehem, ebpekeveg̵ey ad daan te untung he wazà pidtemanan.

²⁷ Ne siak, tenged te migeraran a he Kakey te Menusiyà, mibeg̵ayan a te Amey ku te ketenged wey ku keuzemà mesusi is nengeveelan te tivuuk he menusiyà.

²⁸ Kenà kew meinuinu kayi su egkeuma is andew keuzemà he zutun is langun he menge minatey, egkezineg dan is ked-umawa ku kandan

²⁹ ne egkengevanhew zan. Ne is nemekevaal mulà te meupiya, duen dan untung he wazà pidtemanan. Ne is nemekevaal te mezaat, egkengevanhew sikandan wey mesiluti.

³⁰ Wazà egkehimu ku te sebsevaha ku; su is paag̵i te kedsusiya ku te nengeveelan te menusiyà, impenurù kediey te Amey ku he Megbevayà. Ne metazeng mulà is kediey he kedsusi kandan su kenè ku ebpengahaan is kediey he egkesuatan, kekenà, is egkesuatan te Amey ku he midsug̵ù kediey.

Is Menge Tistig̵us Mehitenged ki Jesus

³¹ Emun iyan e zà ebpenistig̵us te kedì he keugelingen, kenà egkeserig̵an is kediey he kebpenistig̵us.

³² Iyan, selakew is ebpenistig̵us te menge vaal ku. Iyan is Amey ku ebpenistig̵us kediey, ne netuenan ku he egkeserig̵an is kebpenistig̵us din.

³³ Duen midsug̵ù niw ziyà te ki Juan Megbebewtismu, ne tutuu is kebpenistig̵us ni Juan kediey.

³⁴ Kenà a egkinahanglan he zuen etew zà duen he ebpenistig̵us kediey, iyan, midhimu ku he metenuzi niw is kebpenistig̵us ni Juan su wey kew meketuu kediey ne egkeveg̵ayan kew te untung.

³⁵ Su si Juan, iring sikandin te sulù he merayag is sig̵a zin, ne meg̵aan dà utew is kelipey niw te kedteyawi zin keniyu, he ke và dà egkeg̵iya, seled te meg̵aan dà utew kew nesuat te penurù din he tutuu.

³⁶ Iyan, duen kebpenistig̵us he lavew pa kenà is ki Juan, su is langun he mibpeveelan kediey te Amey ku he Megbevayà he ed-ul-ulahan ku, iyan edtistig̵us he midsug̵ù a te Amey ku he Megbevayà.

³⁷ Iyan sikandin midsug̵ù kediey ne edtistig̵usan e zin. Wazè niw mezineg is kegkag̵i zin ne wazè niw zaan maahà is dagwey zin.

³⁸ Ne netuenan ku he kenè niw edewaten is lalag din su siak is midsug̵ù din, wazà a keniyu tuuwi.

³⁹ Ed-istudiyuwan niw is ingkesurat he lalag din su kunaan niw ke tenged dutun ebpekeangken kew te untung he wazà pidtemanan. Edtistig̵usan a te insurat he Lalag te Megbevayà,

⁴⁰ iyan, kenè kew edtuu kediey. Angin ke ebpeketuu kew su ebeg̵ayan kew te untung he wazà pidtemanan.

⁴¹ Kenà ku iyan ebpengahaan is kegkezelig̵a kedì te menge etew

⁴² su nesayud a keniyu; kenà mahal is Megbevayà diyà te g̵ehinawa niw.

⁴³ Midsug̵ù a zini te Amey ku he Megbevayà, ne egemiten ku is gehem din ne minsan pa kayi kenà a keniyu edewaten. Ke zuen selakew he ebpekeuma ne kandin dà he g̵ehem is egemiten din, ne edewaten niw mulà.

⁴⁴ Egkemenumenu is hustu he kebpeketuu niw emun ebpengahaan niw te kada sevaha is kegkezelig̵i keniyu te menge zuma niw, ne is kegkezelig̵i pezem keniyu te sebsevaha zà he Megbevayà, kenè niw egkesuatan?

⁴⁵ Kenè niw isipa he iyan a edsumbung keniyu keuzemà diyà te etuvangan te Amey ku he Megbevayà. Su kes lukes niw he si Moises, edsarig kew te insurat he menge lalag din, ne nasì iyan sikandin edsumbung keniyu zutun he andew.

⁴⁶ Angin ke venar is kedtuu niw kandin su ebpeketuu kew zaan kediey su insurat din dutun is keag̵i ku.

⁴⁷ Ne tenged kayi emun kenè kew edtuu te lalag he insurat ni Moises, kenè kew zaan edtuu te kediey he lalag.”