Juan 21 - Manobo Western Bukidnon

Is Kebpaahà ni Jesus Diyà te Veyvey

¹ Netapus pa is nepipira he andew zutun, ne mid-uman mebpaahà si Jesus dutun te menge sumusundan din diyà te veyvey te ranew he Tibiryas. Ne iring kayi is hitavù te kebpeehè din kandan.

² Dutun si Simon Pedro, wey si Tomas he migngezanan te Sereping, si Natanael he tigKana ziyà te Geliliya, wey elin daan dutun is dezuwa he anak ni Sibidiyu wey zuen daan dutun dezuwa pa he menge sumusundan ni Jesus.

³ Ne migkag̵i si Pedro te, “Ebpenlaya a te pait.” Ne migkag̵i haazà is menge zuma zin te, “Eduma key kenikew.” Ne mid-untud dan te avang ne mibpenlaya zan dutun te tivuuk he kezukileman, iyan, kenè dan ebpekeutel.

⁴ Ne hein egkepawè en dutun, dutun si Jesus te veyvey. Naahà sikandin te menge sumusundan, iyan, wazè dan mekilala he iyan bes si Jesus.

⁵ Ne migkag̵i ziyà te kandan si Jesus te, “He menge suled, duen be neutel niw?” Ne midtavak dan te, “Wazà.”

⁶ Ne ke si Jesus te, “Ilaya niw heeyan is laya ziyà te zapit te egkekewanan ne ebpekeutel kew.” Ne in-uman dan ilaya haazà is laya ne hein mibuwat dan kenè dan egkehenat tenged te utew mezakel is neutel he pait.

⁷ Ne sikan is sumusundan he mahal ziyà te g̵ehinawa ni Jesus, migkag̵i sikandin diyà te ki Pedro te, “Iyan heeyan sikan is Nengazen tew.” Ne hein netuenan ni Pedro he iyan si Jesus haazà, insun-ud din is kumbalè din he midluwas din, ne mid-umpak diyà te wahig, ne midhendiyà te veyvey.

⁸ Ne haazà is menge zuma zin he sumusundan, midtelukun dan he ed-untud dutun te avang. Eguyuzen dan haazà is laya he nepenù te pait. Uvey zan dà te veyvey, menge kesiyawan dà he mitrus.

⁹ Ne hein nekezunggù dan, neehè dan is mid-ug-ug̵anga he menge vag̵a. Ne zuen dutun supas wey pait he intuug.

¹⁰ Ne migkag̵i kandan si Jesus te, “Uwita niw zini is duma he menge pait he neutel niw.”

¹¹ Ne mibeyaan ni Simon Pedro haazà is avang ne miguyud din sikan is laya he nepenù te zezekelà he pait. Is kezakel zutun te pait ne nenggatus wey kelimahan wey tetelu. Ne minsan pa te utew mezakal haazà is pait, ne wazà mevindas haazà is laya.

¹² Ne migkag̵i si Jesus te, “Ramag kew en.” Ne wazà nekeaku kandan te menge sumusundan he ed-insà ke hentei sikandin su netuenan dan he iyan haazà kes Nengazen he si Jesus.

¹³ Ne migkuwa ni Jesus haazà is supas ne mibpenalad din kandan ne mibpenalad din daan haazà is nengelutù he pait.

¹⁴ Iketelu en haazà he kebpaahà ni Jesus dutun te menge sumusundan din hein nevanhew en sikandin.

Si Jesus wey si Pedro

¹⁵ Ne hein nekeramag dan en dutun, migkag̵i si Jesus diyà te ki Simon Pedro te, “Sikew Simon, he anak ni Juan, mahal e ve utew ziyan te g̵ehinawa nu, lavew te g̵ehinawa te menge zuma nu kedì?” Ne midtavak si Pedro te, “Uya, netuenan nu he mahal ka zini te g̵ehinawa ku.”

¹⁶ Ne migkag̵i si Jesus te, “Semaki nu is menge nati ku he kerehidu.” Ne mid-uman megkag̵i si Jesus te, “Simon, anak ni Juan, mahal e ve utew ziyan te g̵ehinawa nu?” Ne midtavak si Pedro te, “Uya, netuenan nu he mahal ka zini te g̵ehinawa ku.” Ne migkag̵i si Jesus te, “Bentayi nu is menge kerehidu ku.”

¹⁷ Ne mid-uman megkag̵i si Jesus te iketelu te, “Simon, anak ni Juan, mahal e ve utew ziyan te g̵ehinawa nu?” Ne mibmesakit is gehinawa ni Pedro zutun te iketelu he ked-ul-uliti ni Jesus te, “Mahal e ve utew ziyan te g̵ehinawa nu?” Ne midtavak si Pedro te, “Netuenan nu is langun; netuenan nu he mahal ka zini te g̵ehinawa ku.” Ne migkeg̵iyan sikandin ni Jesus te, “Semaki nu is menge kerehidu ku.

¹⁸ Utew venar is egkeg̵iyen ku kenikew he zengan hein menguhed ke pa iyan ka mibakes te lawa nu ne sumalà ke hendei is egkesuatan nu ne zutun ka ebpevayà. Iyan, ke meg̵urang ke en ebpekererepa ka ne selakew he etew is ebagkes te lawa nu ne ed-uwiten ka zutun te kenè nu egkesuatan.”

¹⁹ (Umba migkag̵i ni Jesus heini su idtazem din is paag̵i te kebpatey ni Pedro he egkevantug din is Megbevayà.) Ne te nekag̵i ni Jesus heini, mid-uman megkag̵i te, “Sunud ka kediey.”

²⁰ Ne zutun midlilingey si Pedro ne neehè din he edtinundug kandan sikan is sumusundan he pinedtayà ni Jesus. Iyan sikandin sikan is dutun te kedlavung dan te wazè pa mebpatey si Jesus, diyà sikandin te zurug ni Jesus. Iyan daan kes mid-insà ki Jesus te, “Hentei kenami is ed-akal kenikew?”

²¹ Ne hein naahà ni Pedro haazà he sumusundan, migkag̵i ziyà te ki Jesus te, “Haazà is duma ta, hengkey is egkeulaula kandin keuzemà?”

²² Ne midtavak si Jesus te, “Emun iyan ku egkesuatan he kemulu pa sikandin uuyag keuzemà dutun te kedlikù ku zini te kelibutan, wazè nu kelavet. Sunud ke zà kediey.”

²³ Ne ziyà te langun he menge tumutuu nekeeneb is tudtul he kenà ebpatey haazà he sumusundan, iyan, wazà iyan keg̵iya ni Jesus kandin he kenè en ebpatey haazà he tumutuu su iyan migkag̵i zin is, “Emun iyan ku egkesuatan he uuyag pa keuzemà dutun te kedlikù ku, wazè nu kelavet.”

²⁴ Iyan a haazà is sumusundan he egkeg̵iyen din; iyan a ebpenistig̵us he tutuu heini is langun; iyan a midsurat kayi te langun ne netuenan dey he tutuu heini is insurat ku.

²⁵ Mezakel pa is mid-ulaula ni Jesus. Emun idsurat id-amin ne minsan is tivuuk he kelibutan, kenè pa ereg he egketeg̵uan te menge libru he edsuratan dutun.