Juan 16 - Manobo Western Bukidnon

¹ “Umba migkag̵i ku keniyu heini is langun,” ke si Jesus, “su wey kenà mehugkà is kedtuu niw kediey te egkehitavù keniyu keuzemà.

² Su id-awè dan is ketenged niw te kedseled diyà te simbahan, ne kenà iyan dà heini su keuzemà ke zuen edhimatey keniyu, kunaan din ke igkesuat te Megbevayà haazà is mibeelan din.

³ Umba ebeelan dan heini keniyu su siak wey is Amey ku, wazè key zan mekilala.

⁴ Umba egkeg̵iyen ku heini keniyu he zaan su emun egkehitavù heini is kebpekeantus niw te kemereg̵enan, egketenuzan niw he inlag̵uy ku en keniyu heini he zaan. Wazè ku sikiyu keg̵iyi kayi zengan hein beg̵u kiw pa he nekeduzuma su kemulu e pa zutun duma niw.

Is Baal te Wag̵as he Mulin-ulin

⁵ Iyan, guntaan ed-ulì ad diyà te Amey ku he midsug̵ù kedì. Ne wazà sevaha keniyu he ed-insà kedì ke hendei a ebpevayà,

⁶ kekenà, utew kew egkengeseeng tenged te migkag̵i ku keniyu is egkengeantus niw he kemeresayan keuzemà.

⁷ Ne minsan pa kayi, benar iyan is egkeg̵iyen ku he igkezeyzey niw is ked-ewai ku keniyu su emun kenè ku sikiyu ed-ewaan, kenà ebpekehendini te keniyu is Menenavang. Ne emun ed-awà a, edsug̵uen ku sikandin dini te keniyu.

⁸ Ne emun dini en sikandin, ibpesavut din te menusiyà he mezaat is ulaula te menusiyà wey ibpesavut din he zuen metazeng he ibayà wey ibpesavut din daan kandan he edsilutan sikandan te Megbevayà.

⁹ Iyan ibpesevuta zin kandan he mezaat is ulaula zan su wazè dan medtuu kediey.

¹⁰ Ibpesavut din kandan is metazeng he ibayà su ed-ulì ad diyà te Amey ku ne kenè e en egkeahà keniyu.

¹¹ Ibpesavut din is kedsiluti kandan te Megbevayà su si Setanas he egalen dan te menge kuntada te Megbevayà, midhukuman en te silut.

¹² Mezakel pa is egkeg̵iyen ku pezem keniyu, iyan, kenè niw pa egkesavut.

¹³ Ne sikan is Wag̵as he Mulin-ulin he ebpenurù te tutuu he tuluuwen, emun dini en sikandin te keniyu, ibpesavut din keniyu is langun he tutuu. Kenè din iyan ibpesavut is kandin dà he isip, kekenà, iyan ibpesavut din is nezineg din diyà te Amey ku. Ibpesavut din daan keniyu is egkeulaula keuzemà.

¹⁴ Ebentug̵en e zin su ibpesavut din keniyu is penurù ku wey ulaula ku.

¹⁵ Umba migkag̵i ku he ibpesavut din keniyu is penurù ku su is langun he egkeg̵iyen te Amey ku, iyan ku zaan egkeg̵iyen.

Is Seeng Egkeilisan te Kelipey

¹⁶ Nesipeg̵an en is timpu he kenà ad keniyu egkeahà ne kenà daan utew egkeug̵et dutun ne egkeahà a keniyu egkeuman.”

¹⁷ Ne zutun mibpein-inseey is duma he menge sumusundan din te, “Hengkey vuwa is ibpesavut din kayi te lalag din he nesipeg̵an en is timpu he kenè tew en sikandin egkeahà ne kenà daan utew egkeug̵et dutun ne egkeehè tew en maan, wey hengkey is ibpesavut din te migkag̵i zin he ed-ulì sikandin diyà te Amey zin?”

¹⁸ Ne ke sikandan daan te, “Hengkey vuwa is ibpesavut din te migkag̵i zin he nesipeg̵an en is timpu? Kenè tew egkesavut ke hengkey is ibpesavut din.”

¹⁹ Ne netuenan ni Jesus he zuen egkesuatan dan he id-insà kandin umba migkag̵i sikandin te, “Iyan buwa id-insè niw ke hengkey is ibpesavut ku te migkag̵i ku g̵eina he nesipeg̵an en is timpu he kenà ad keniyu egkeahà, ne kenà daan utew egkeug̵et dutun ne egkeahà ad maan keniyu.

²⁰ Utew venar is egkeg̵iyen ku keniyu he is menge kuntada ku, igkelipey zan utew is egkehitavù kedi, iyan, sikiyu, ebpekesineg̵ew kew su egkeseeng kew. Iyan, egkeilisan is kegkeseeng niw te zekelà he kelipey.

²¹ Emun ebeliliten is bahi, egkerasey te mesakit su ed-anak en. Ne emun edlusazan en, egkelipatan din is mesakit su igkelipey zin is beg̵u en he etew he in-anak.

²² Iring din ded daan, egkeseeng kew g̵untaan, iyan, dutun te kebpeked-uman tew kebpeked-aahà, utew kew zutun egkelipey, ne wazà minsan hentei he egkeawè din is kelipey niw.

²³ Ne zutun he andew wazè en kinahanglan he zuen id-insè niw kediey. Utew venar is egkeg̵iyen ku keniyu he ke zuen minsan hengkey he ebuyuen niw ziyà te Amey ku, ibeg̵ey zin keniyu tenged te kedtuu niw kediey.

²⁴ Wazè niw pa mibuyù diyà te kandin ebpuun te kedtuuwi niw kediey. Buyù kew wey kew mekezawat su wey kew utew melipey.

²⁵ Migamit ku is menge sempità te kebpenurua ku keniyu, iyan, meg̵aan en egkeuma is andew he kenè en maan menge sempitè pa is egemiten ku su zutun, melemu niw en he egkesavut is egkeg̵iyen ku. Ne zutun utew niw egkekeleduwi is egkeg̵iyen ku keniyu mehitenged te Amey ku he Megbevayà.

²⁶ Ne zutun he andew tenged te kedtuu niw kediey, iyan kew en egkag̵i te ebuyuen niw ziyà te Amey ku, ne kenè en kinahanglan he iyan e pa egkag̵i te ebuyuen niw ziyà te Amey ku

²⁷ su utew kew mahal ziyà te g̵ehinawa te Amey ku tenged te mahal a zaan diyà te g̵ehinawa niw wey tenged daan te midtuu kew he ziyà a ebpuun te Amey ku he Megbevayà.

²⁸ Diyà a ebpuun te Amey ku ne midhendini a te kelibutan. Ne g̵untaan ed-ewaan ku heini is kelibutan ne ed-ulì ad diyà te Amey ku.”

²⁹ Ne zutun migkag̵i haazà is menge sumusundan din te, “Ne utew en keladu is egkeg̵iyen nu su kenè en maan sempità.

³⁰ Nesavut dey en he netuenan nu is langun su minsan is id-insà kenikew, kenè en kinahanglan he egkeg̵iyen pa su netuenan nu en he zaan, umba edtuuwan dey en he sikew, diyà ka ebpuun te Megbevayà.”

³¹ Ne migkag̵i kandan si Jesus te, “Human kew ves meketuu?

³² Egkesipeg̵an en is timpu he zutun ebpekedsusuwey kew is langun; ed-ulì is kada sevaha keniyu ziyà te ed-ubpaan din ne egkeewaan a. Ne minsan pa zutun duen ku pa zuma su iyan duma ku is Amey ku he Megbevayà.

³³ Umba migkag̵i ku keniyu heini is langun su wey mebmelinawen layun is gehinawa niw tenged kediey. Dini te kelibutan ebpesipelahan kew te menge etew he kuntada ku, iyan, kenè kew mahandek su nezaag ku en sikan is egalen te menge kuntada ku!”