Juan 15 - Manobo Western Bukidnon

Is Pinemula wey is Menge Subpang Din

¹ “Iyan a,” ke si Jesus, “sikan is puun te pinemula he paras ne is Amey ku he Megbevayà, iyan teg̵ipinemula.

² Ke zuen subpang ku he kenà ebpemeg̵as, id-awè din. Ne is langun he menge subpang ku he ebpemeg̵as, edlumpiyuwan din su wey mekesigudu mekepemeg̵as.

³ Nelumpiyuwan kew en pinaag̵i te kedhemeni niw te impenurù ku keniyu.

⁴ Kenè kew suwey kediey iring te kenà a zaan edsuwey keniyu. Wazà subpang he ebpekepemeg̵as ke ebpekesuwey ziyà te lawa te pinemula, ne sikiyu zaan, emun edsuwey kew kediey kenè kew ebpekepemeg̵as.

⁵ Su iyan a sikan is lawa ne iyan kew menge subpang ku. Is etew he kenà edsuwey kedì iring te kenà a zaan edsuwey kandin, iyan ebpekepenigudu ebpekepemeg̵as. Wazà egkehimu niw ke ebpekesuwey kew kediey.

⁶ Su ke zuen etew he edsuwey kediey, ed-engkezan sikandin iring te subpang he idtimbag wey meg̵angu. Ne is menge subpang he nengeg̵angu, edtig̵umen ne idtimbag diyà te hapuy wey metutung.

⁷ Ne sikiyu, emun kenè kew edsuwey kedì ne edhemenan niw is menge penurù ku, is minsan hengkey he ebuyuen niw kediey, ibeg̵ey ku keniyu.

⁸ Emun ebpenigudu kew ebpemeg̵as, he ke và dà egkeg̵iya, ke layun meupiya is menge vaal niw, egkezelig̵an te menge etew is Amey ku he Megbevayà ne egketuenan he tutuu kew iyan he menge sumusundan ku.

⁹ Iring te mahal a ziyà te g̵ehinawa te Amey ku, mahal kew zaan dini te g̵ehinawa ku. Hemeni niw is kebmahala ku keniyu zini te g̵ehinawa ku.

¹⁰ Emun edtumanen niw is menge sug̵ù ku keniyu, ne kenè kew egkeawà te kebmahala ku keniyu zini te g̵ehinawa ku iring te midtuman ku is menge sug̵ù kediey te Amey ku he Megbevayà ne kenà ad daan egkeawà te kebmahala zin kedì diyà te g̵ehinawa zin.

¹¹ Umba migkag̵i ku keniyu heini is langun su wey niw ikelipey is kediey he kelipey ne wey kew utew melipey.

¹² Iyan heini sug̵ù ku keniyu he kinahanglan he mahal ziyà te g̵ehinawa te uman sevaha keniyu is minsan hentei keniyu iring te mahal kew zini te g̵ehinawa ku.

¹³ Ke zuen etew he ebpehimatey wey melibri is menge emig̵u zin, tuus heini he utew mahal is menge emig̵u zin diyà te g̵ehinawa zin; wazè en kebmahal he ebpekeiring kayi.

¹⁴ Menge emig̵u ku sikiyu ke edtumanen niw is idsug̵ù ku keniyu.

¹⁵ Kenè ku en maan sikiyu egngezanan te menge sulug̵uen ku su is sulug̵uen, kenà egkeg̵iyan te egalen din ke hengkey is ebeelan te egalen din. Egngezanan ku sikiyu he menge emig̵u ku su is langun he impesavut kediey te Amey ku he Megbevayà, impesavut ku zaan keniyu.

¹⁶ Kenè kew iyan nekepilì kediey, kekenà, iyan a nekepilì keniyu. Intezù ku sikiyu wey kew mekepemeg̵as te menge meupiya he ulaula ne wey kenà daan mahanew is beg̵as niw. Ne is minsan hengkey he ebuyuen niw ziyà te Amey ku he Megbevayà tenged te kedtuu niw kediey, ibeg̵ey zin keniyu.

¹⁷ Iyan sug̵ù ku keniyu is: kinahanglan he mahal ziyà te g̵ehinawa te uman sevaha keniyu is minsan hentei keniyu.

Is Kegkuntedaha te Menge Etew ki Jesus

¹⁸ Emun egkuntedahan kew te menge etew zini te kelibutan he kuntada te Megbevayà, kenè kew meinuinu su zaan e zan he egkuntedahan.

¹⁹ Emun duma kew te menge kuntada te Megbevayà ebmahalen kew zan, iyan, geina te kenè kew zan duma ne egkuntedahan kew zan su mibpilì ku sikiyu wey kew mekesuwey ziyà te kandan.

²⁰ Tentenuzi niw is migkag̵i ku keniyu he is sulug̵uen, kenà lavew te egalen din. Su ke mibpesipelahan e zan is egalen niw, iyan kew pe be kenè dan pesipelahi. Ke edtumanen te menge etew is kedì he penurù, edtumanen dan daan is keniyu.

²¹ Iyan, ebpesipelahan kew te menge etew tenged te kedtuu niw kediey su wazè dan mekilala is Amey ku he midsug̵ù kediey.

²² Angin ke wazà a mekehendini te kelibutan ne wazà a zaan mekepesavut kandan su kenà sikandan egkevesulan tenged te salè dan, iyan, guntaan wazè dan en igkepesangil.

²³ Is egkuntada kediey, kenà iyan e zà egkuntedahan din, kekenà, egkuntedahan din daan is Amey ku he Megbevayà.

²⁴ Duen mibeelan ku he neehè dan he menge egkein-inuwan he kenà egkeveelan te minsan hentei he menusiyà. Angin ke wazè dan maahà heini su kenà sikandan egkevesulan tenged te mezaat he mid-ulaula zan kedì. Iyan, neehè dan en ne minsan pa zutun, siak wey is Amey ku, egkuntedahan key zan.

²⁵ Pinaag̵i kayi netuman diyà te kandan is tagnà diyà te kesug̵uan he impenurù dengan kandan he edhenduen te, ‘Minsan ke wazè dan ketezengan te igkuntedaha zan kedì, ne egkuntedahan e zan.’ ”

²⁶ Ne mid-uman megkag̵i si Jesus te, “Is Menenavang he ebpuun te Amey ku, edsug̵uen ku zini te keniyu. Iyan sikandin sikan is Wag̵as he Mulin-ulin he ebpenurù te tutuu he edtuuwan. Ne emun ebpekeuma en dini te kelibutan, ibpesavut din ke hentei a.

²⁷ Ne ebpekepesavut kew zaan kayi su puun pa te aney ku en kebpenurù, duma ku en sikiyu.”