Juan 12 - Manobo Western Bukidnon

Is Kedhaplas te Pehemut

¹ Mekeenem pa zutun is Pista te Kedlevayi, ne nekeuma si Jesus diyà te Bitanya he inged ni Lazaro, kes mibanhew ni Jesus.

² Ne ziyà te Bitanya midtukud dan te keemuran su neg̵alew zan tenged te kebpekeuma eni Jesus. Iyan si Marta mengengenat kandan, ne elin si Lazaro zuma ni Jesus dutun te ebpemengaan.

³ Ne si Maria, migkuwa zin is sengesalmun he agwa te nardu he utew mahal, ne mid-uvayan din si Jesus ne inhaplas din diyà te menge paa ni Jesus ne interapu zin is menge vulvul zin te paa ni Jesus. Ne nekeeneb dutun te tivuuk he seled te valey is mehemut.

⁴ Ne si Hudas he tigKeriyuti, is sevaha he sumusundan ni Jesus, iyan sikandin ed-akal ki Jesus ne migkag̵i sikandin te,

⁵ “Es, Es! Pira vuwa he g̵atus is bali kayi? Deyzey ke imbelegyà heeyan is agwa wey ikeveg̵ey is halin din diyà te menge egkengeayuayu.”

⁶ Iyan ingkekeg̵iya zin dutun, kenà te hizu zin te menge egkengeayuayu, kekenà, tenged te tekawen sikandin. Iyan sikandin ibpetipig eni Jesus te selapì dan ne ebpenekawen din is duma zutun.

⁷ Ne zutun migkag̵i si Jesus te, “Pesegdana niw si Maria. Petipig̵i kandin is samà kayi te agwa wey ikehaplas te lawa ku emun idleveng ad.

⁸ Is menge egkengeayuayu, layun niw egketevangi sikandan, iyan, siak, kenà a egkeug̵et dini te keniyu,” ke sikandin.

⁹ Nezineg te utew mezakel he menge etew he ziyà si Jesus te inged he Bitanya, ne nemenhendutun dan. Kenà iyan dan dà ed-ahaan si Jesus, kekenà, ed-ahaan dan daan si Lazaro sikan is mibanhew zin.

¹⁰ Ne tenged kayi neisip te menge punuan he menge memumuhat he edhimetayan dan daan si Lazaro

¹¹ su tenged kandin mezakel is menge Hudiyu he midsuwey te impenurù te menge memumuhat su edsunuzen dan si Jesus.

Is Kedhendiyà ni Jesus te Hiruselim

¹² Ne nepawà dutun te kedheplasi ki Jesus, sikan is utew mezakel he menge etew he ebpemenelavuk dutun te pista, nezineg dan he edhendiyà si Jesus te Hiruselim.

¹³ Ne migkuwa zan te menge zehunen he subpang, ne migawas dan dutun te inged su edsinug̵ungen dan si Jesus. Migkag̵i zan te, “Delig̵a is Nengazen! Delig̵a zaan heini is ebpekeuma he midsug̵ù te Nengazen! Is hadì tew te menge kevuwazan ni Israyil, berakat he tuvazi sikandin te Megbevayà!”

¹⁴ Ne migkuwa ni Jesus is nati te kudà he asnu ne mid-untuzan din. Ne pinaag̵i zutun netuman is insurat he tagnà he migkag̵i te,

¹⁵ “Sikiyu is menge meg̵inged te Hiruselim, kenè kew mahandek su ebpekeuma en is hadì niw he ed-untud te nati he asnu.”

¹⁶ Ne haazà is kedseled ni Jesus diyà te Hiruselim, wazè pa mesavut te menge sumusundan din he kegketuman haazà te netagnà dengan, asal, hein midlikù en si Jesus diyà te langit, netenuzan dan is mibeelan din ne nesavut dan he neulaula heini sumalà is netagnà dengan diyà te insurat he Lalag te Megbevayà.

¹⁷ Is menge etew he nekeahà ki Jesus dutun te ked-umawa zin wey kebenhawa zin ki Lazaro, midsangyew zan is neehè dan dutun.

¹⁸ Umba mibpemenelavuk ki Jesus is utew mezakel he menge etew su nezineg dan he mibanhew zin si Lazaro.

¹⁹ Ne zutun migkag̵i is menge Perisiyu te, “Utew mezakel he menge etew is edsundan kandin! Wazè tew en bes egkehimu.”

Is Kegkeg̵iya ni Jesus te Kemetayen Din

²⁰ Ne zuen menge Gerisyahanen he nemenelavuk daan dutun te pista su edsimba zan te Megbevayà diyà te Hiruselim.

²¹ Ne midhendiyè dan te ki Felipe. (Ne si Felipe, tigBitsayda, diyà te prubinsya he Geliliya.) Ne ke sikandan te, “Egkesuat key he ebpekidlalag ki Jesus.”

²² Ne si Felipe, migkag̵i zin heini ziyà te ki Andres, ne zutun mibpezumehè dan pehendiyà te ki Jesus, ne midtudtul zan kandin.

²³ Ne migkag̵i si Jesus te, “Egkesipeg̵an en utew is timpu he ibpeg̵awag̵awa ziyà te minsan hentei is utew ku kebpekelavew te langun.

²⁴ Utew venar is egkeg̵iyen ku keniyu he emun kenà idleveng is benì diyà te tanà, kenà egkevuwad. Ne emun igkeleveng en ne edtuvù; ne ebeg̵as te mezakel. Iring din ded daan kedì, su emun ebpatey a ne mezakel is egkeveg̵ayan te veg̵u en he untung.

²⁵ Is etew he egkenug̵unan din is untung din dini te kelibutan, ebpatey sikandin gihapun, iyan, is etew he tenged kediey kenè din egkenug̵unan is untung din dini te kelibutan, egkekuwa zin is untung he wazà pidtemanan.

²⁶ Ke zuen etew he egkesuat he mehimu he sulug̵uen ku, kinahanglan he edsunuzen e zin, su ke hendei a ne zutun daan is sulug̵uen ku. Ne ke zuen edtuman te menge sug̵ù ku, edelig̵en sikandin te Amey ku he Megbevayà.

²⁷ Utew mesakit is gehinawa ku g̵untaan. Hengkey vuwa is egkeg̵iyen ku? Kenà egkehimu he edhengyuen ku ziyà te Amey ku he kenè din ipaantus kediey heini is ebpeebuten ku he utew merasey, su umba midhendini a te kelibutan su wey ku meseg̵azi heini is ibpaantus kedì.”

²⁸ Ne zutun migkeg̵iyan ni Jesus is Amey zin he Megbevayà, ke sikandin te, “Amà, himuwa nu he mevantug ka te menge etew.” Ne zutun duen lalag he ebpuun te langit he egkag̵i te, “Midhimu ku en, ne ed-umanan ku edhimuwa.”

²⁹ Ne zuen mezakel he menge etew zutun ne hein nezineg dan haazà, ke sikandan te, “Rug̵ung!” Ne egkag̵i is duma te, “Belinsug̵uen te Megbevayà he ebpekidlalag ki Jesus!”

³⁰ Ne migkag̵i si Jesus te, “Umba mibpekidlalag is Megbevayà, kenà tenged kediey, kekenà, tenged keniyu su wey niw mezineg is egkeg̵iyen din.

³¹ Is Megbevayà, puun guntaan edhukuman din te silut is tivuuk he menusiyà he kuntada zin, ne egkezaag din en si Setanas, sikan is ebayàbayà dini te kelibutan.

³² Ne siak, emun ibayew ad pinaag̵i te tukud he ibpehitindeg, duen ibpekekabig ku te langun he menge etew.”

³³ Iyan ingkekeg̵iya ni Jesus dutun su ibpesavut din is paag̵i te kedhimetayi kandin.

³⁴ Ne migkag̵i zutun is menge etew te, “Duen impenurù kenami he ebpuun te insurat he Lalag te Megbevayà he kenè en ebpatey is mibpilì te Megbevayà he ibpahadì. Ne sikew, egkag̵i ka he ibayew ziyà te tukud is Kakey te Menusiyà. Hentei heini is egkeg̵iyen nu he Kakey te Menusiyà?”

³⁵ Ne migkag̵i ziyà te kandan si Jesus te, “Siak is kerayag he ebpeketayew te kedsavut niw, egkesipeg̵an en is ked-ewai ku keniyu. Te kemulu pa merayag, purungi niw susiya is ibayè niw su kela ke egkezukileman kew. Is edhipanew he merusirem is ibayè din, kenè din egketuenan ke hendei sikandin ebpekepevayà.

³⁶ Siak is kerayag. Te kemulu e pa zini te keniyu, sarig kew kediey te kerayag su wey layun meteyawi is isip niw.” Ne zutun te nekag̵i ni Jesus haazà, mid-ewaan din haazà is mezakel he menge etew ne mid-eles sikandin.

Kenà Edtuu is Menge Etew

³⁷ Minsan pa te mezakel is nengeehè dan he menge egkein-inuwan he mibeelan din, wazè dan sikandin tuuwi.

³⁸ Su pinaag̵i kandan netuman sikan is netagnà dengan ni Esaias, kes ebpeneuven te Megbevayà. Su ke si Esaias te, “Nengazen, wazà edtuu te ibpesavut dey. Wazà nesayud he impeehè nu en kandan is gehem nu.”

^39-40 Ne migkag̵i zaan si Esaias te, “Is Megbevayà, midhimu zin sikandan he lakap wey kenè dan mekeahà. Midhimu zin daan he mezesen is gehinawa zan wey zan kenà meketuu su kela ke ed-iniyug̵an dan is mezaat he ulaula ne ebpetavang dan kandin.” Umba wazè dan dutun meketuu ki Jesus.

⁴¹ Umba migkag̵i ni Esaias haazà is menge lalag su netuenan din dengan he utew zekelà is gehem ni Jesus, ne iyan si Jesus egkeg̵iyen din dutun.

⁴² Ne minsan pa zutun mezakel is nemeketuu ki Jesus he menge punuan he menge Hudiyu, iyan, wazè dan keg̵iya he neketuu zan kandin su nahandek dan te menge Perisiyu su kela ke ewaa is ketenged dan te kedseled te menge simbahan.

⁴³ Umba wazè dan keg̵iya su iyan dan impelavi is kedelig̵a kandan te menge etew, kenà is kedelig̵a kandan te Megbevayà.

⁴⁴ Ne zutun mibpekezag̵ing megkag̵i si Jesus te, “Is edtuu kedì, kenà iyan e zà egketuuwan din, kekenà, egketuuwan din daan is Megbevayà he midsugù kedì.

⁴⁵ Is nekeahà kediey, nekeahà daan te Megbevayà he midsug̵ù kedì.

⁴⁶ Umba midhendini a is kerayag te kelibutan su wey ku meteyawi is isip te menge etew. Ne ke zuen edtuu kedì, kenè en egkerusireman is isip din.

⁴⁷ Ne ke zuen etew he nezineg din heini is menge penurù ku ne kenè din edtumanen, kenè ku sikandin edhukuman te silut su wazà a medhendini te kelibutan wey ku mesiluti is menusiyà, kekenà, wey ku melibri te silut is menusiyà.

⁴⁸ Is etew he kenà edawat kedì ne kenà edtuman te menge penurù ku, edhukuman sikandin te silut keuzemà dutun te ketepusan he andew, su iyan idsiluti kandin is menge penurù ku he wazè din dewata.

⁴⁹ Su is menge penurù ku, kenà dini zà ebpuun te kediey zà he isip, su midsug̵ù a te Amey ku he Megbevayà ne insug̵ù din kediey is ibpenurù ku.

⁵⁰ Netuenan ku he is insug̵ù din kediey he menge lalag, iyan ebpekeveg̵ey te untung he wazà pidtemanan. Ne tenged kayi egkeg̵iyen ku is ibpekag̵i zin kediey.”