1 Juan INTRO1 - Manobo Western BukidnonIs Mehitenged te Nehuna he Surat ni Juan Is epustul he si Juan, meg̵urang en hein insurat din heini. Melug̵ayad he timpu is kedumala zin te menge tumutuu ki Jesu Kristu. Kenà pilusupu is menge ketezengan din emun edwali sikandin, kekenà, edsublien din is mid-isip din he utew impurtanti su para layun metenuzi. Mibeelan din heeyan hein insurat din is mehitenged te untung wey kemetayen ni Jesus, ne iyan daan heeyan mibeelan din kayi te surat din para te menge tumutuu. Utew migkeladu ni Juan is menge tuyù din te kedsurata zin kayi. Is nehuna he tuyù din nekag̵i ziyà te 2:1 is edhenduen te, “Iyan ibpesurati ku keniyu is: wey meheg̵eti is kedtuu niw wey kew kenà mekesalà.” Is salà, impetug-iring ni Juan te kerusireman ne is tutuu impetug-iring din te kerayag. Emun egkag̵i is etew te nekidsevehe en sikandin te Megbevayà, iyan, kemulu pa sikandin diyà te kerusireman ne tarù is lalag din. Iyan, emun egkilelaan te etew is salè din ebpeseyluwen sikandin te Megbevayà. Is etew he kenà edsuwey te Megbevayà ne kenà edsigudu ebaal te salà. Is ikezuwa he tuyù te kedsurata ni Juan kayi ne iyan is, wey zan kenà meketuu te tarù, 2:26 su zutun he timpu zuen menge etew he ebpemenurù te tarù. Is duma egkag̵i te, “Kenà Anak te Megbevayà si Jesus, kekenà, etew zà.” Ne elin daan penurù dan is, iyan dè kun sikandan memetau ne kenà salà is kebpezumdumahi te etew te mezaat he kebayè din. Is iketelu he tuyù te kedsurata ni Juan kayi ne iyan is: wey metueni te menge tumutuu he zuen dan en untung he wazà pidtemanan 5:13. Sikan is menge etew he midawat en te Megbevayà, egketuenan dan he ziyà te kandan is Megbevayà su ziyà ed-ubpà te g̵ehinawa zan is Wag̵as he Mulin-ulin wey tenged te zuen dan suat te kedsunud te menge ulaula ni Jesus te iyan ebpeveyaan dan. Nekag̵i zaan ni Juan kayi te surat din he kinahanglan ebminahalà is menge tumutuu ki Jesu Kristu su iyan heini tuus he menge anak sikandan te Megbevayà. |
© 2001, Wycliffe Bible Translators, Inc., All rights reserved.
Wycliffe Bible Translators, Inc.