1 Juan 5 - Manobo Western Bukidnon

Is Kedtuuwi ki Jesus

¹ Anak en te Megbevayà is minsan hentei he edtuu he iyan si Jesus mibpilì te Megbevayà he ibpahadì. Ne emun ebmahalen din diyà te g̵ehinawa zin is Amey tew he Megbevayà ebmahalen din daan is menge zuma zin he anak te Megbevayà.

² Emun hustu is kebmahala ta te Megbevayà wey is kedtumana ta te menge sug̵ù din, egketuenan ta he hustu zaan is kebmahala ta te menge zuma ta he anak te Megbevayà.

³ Is hustu he kebmahala ta te Megbevayà, ne iyan is kedtumana ta te menge sug̵ù din. Ne kenà mereg̵en he edtumanen is menge sug̵ù din

⁴ su sikitew is langun he nehimu en he menge anak te Megbevayà, egkezaag tew en si Setanas he iyan ebayàbayà dini te kelibutan; ne iyan ibpekezaag tew kandin is kedtuu tew ki Jesus.

⁵ Hentei is ebpekezaag ki Setanas? Iyan dà sikan is midtuu he Anak te Megbevayà si Jesus.

Is Tistig̵us Mehitenged ki Jesu Kristu

⁶ Iyan si Jesu Kristu sikan is midsug̵ù te Amey zin dini te kelibutan. Egketuusan heini pinaag̵i te wahig wey lengesa. Kenà heini egketuusan pinaag̵i zà te wahig he iyan is kebewtismuwi kandin, kekenà, pinaag̵i zaan te lengesa he iyan is kedtig̵is te lengesa zin dutun te kedrensanga kandin te krus. Iyan ebpenistig̵us kayi zini te kenitew is Wag̵as he Mulin-ulin, su tutuu layun is egkeg̵iyen din.

⁷ Tetelu is ebpenistig̵us mehitenged ki Jesu Kristu.

⁸ Is sevaha, ne iyan is Wag̵as he Mulin-ulin; is sevaha pa, ne iyan is kebewtismuwi ki Jesu Kristu, ne is sevaha pa, ne iyan is kedtig̵is te lengesa zin. Ne neuyun is kedtistig̵us kayi te tetelu.

⁹ Egkevenaran ki te kebpenistig̵us te menge etew zà duen, iyan, lavew pa he mezesen is kebpenistig̵us te Megbevayà ne midtistig̵usan din he Anak din si Jesus.

¹⁰ Is minsan hentei he edtuu he Anak te Megbevayà si Jesus, nevenaran sikandin te kebpenistig̵us te Megbevayà. Is minsan hentei he kenà edtuu te kebpenistig̵us te Megbevayà, ed-isipen din he teruen is Megbevayà su wazè din tuuwi is kebpenistig̵us te Megbevayà mehitenged te Anak din he si Jesus.

¹¹ Is Megbevayà, imbeg̵ey zin kenitew is untung he wazà pidtemanan; ne ziyà ebpuun heini is untung te Anak din he si Jesus. Iyan heini sikan is kebpenistig̵us kenitew te Megbevayà.

¹² Is minsan hentei he nekidsevaha te Anak te Megbevayà, duen din en untung he wazà pidtemanan. Is minsan hentei he wazà mebpekidsevaha te Anak te Megbevayà, wazè din untung he wazà pidtemanan.

Is Kedepitè Tew Ziyà te Megbevayà

¹³ Sikiyu is nemeketuu en te Anak te Megbevayà, ebpesuratan ku sikiyu wey niw metueni he zuen niw en untung he wazà pidtemanan.

¹⁴ Sikitew is nemeketuu, dekelà is kebpekesarig tew ke ed-ampù kiw ziyà te Megbevayà. Netuenan tew he ke zuen minsan hengkey he ebuyuen tew he kenà supak te egkesuatan din, ibeg̵ey zin kenitew.

¹⁵ Layun sikandin ebpemineg kenitew ke ed-ampù kiw ne tenged dutun netuenan tew zaan he ibeg̵ey zin is ebuyuen tew.

¹⁶ Ke zuen minsan hentei he neehè din he nekesalà is duma zin, iyan, is rimeg̵as dutun te salà, ne kenà kemetayen, ne kinahanglan he iampù din ne is Megbevayà, ibeg̵ey zin is untung he wazà pidtemanan dutun te nekesalà. Iyan egkeg̵iyen ku kayi is etew he nekesalà he kenà kemetayen is rimeg̵as dutun te salè din. Duen salà he iyan rimeg̵as dutun is kemetayen. Kenè ku iyan egkeg̵iyen he id-ampù tew is etew he nekesalà te iring dutun.

¹⁷ Salà is minsan hengkey he mezaat he ed-ul-ulahan, ne zuen salà he kenà iyan rimeg̵as dutun is kemetayen.

¹⁸ Netuenan tew he wazà minsan hentei he nehimu he anak te Megbevayà he layun ed-ulaula te mezaat su edlig-enan sikandin te Anak te Megbevayà ne kenè en sikandin egkehilevetan ni Setanas.

¹⁹ Netuenan tew he menge anak kiw te Megbevayà, iyan, is langun he menge kuntada te Megbevayà dini te kelibutan, ebeyveyaan sikandan ni Setanas.

²⁰ Netuenan tew zaan he midhendini en te kelibutan is Anak te Megbevayà ne imbeg̵ey zin kenitew is kedsavut wey kiw mehimu he menge emig̵u te tutuu he Megbevayà. Nekidsevaha kiw te tutuu he Megbevayà su nekidsevaha kiw te Anak din he si Jesu Kristu. Iyan sikandin tutuu he Megbevayà, iyan sikandin puunà te untung he wazà pidtemanan.

²¹ Menge anak ku, likayi niw is ked-ezapa te minsan hengkey he kenà iyan is tutuu he Megbevayà.