1 Juan 2 - Manobo Western Bukidnon

Is Kedtuman te Menge Sug̵ù

¹ Sikiyu is iring te menge anak ku, iyan ibpesurati ku keniyu is: wey meheg̵eti is kedtuu niw wey kew kenà mekesalà. Iyan, ke zuen ebpekesalà he minsan hentei kenitew, duen datù tew he edtavang kenitew ziyà te etuvangan te Amey tew he Megbevayà. Iyan datù tew si Jesu Kristu he utew metazeng.

² Iyan sikandin impemuhat tenged kenitew wey mepalis is menge salè tew, ne kenè kenitew zà he salà is egkepalis, kekenà, is menge salà daan te tivuuk he menusiyà.

³ Egketuenan tew he emig̵u kiw en te Megbevayà ke edtumanen tew is menge sugù din kenitew.

⁴ Iyan, ke zuen egkag̵i te, “Emig̵u e en te Megbevayà,” ne haazà is egkag̵i, kenè din edtumanen is menge sug̵ù te Megbevayà, teruen sikandin. Kenà sikandin ebpezumazuma te tutuu he tuluuwen.

^5-6 Ne ke zuen etew he edtumanen din is menge sug̵ù te Megbevayà, neheg̵et en is kebmahala zin te Megbevayà diyà te g̵ehinawa zin. Sikan is etew he egkag̵i he nekidsevaha sikandin te Megbevayà, kinahanglan he metazeng is menge ulaula zin iring te metazeng is menge ulaula ni Jesus. Emun iyan heini ed-ul-ulahan ta, netuenan ta he nekidsevaha ki te Megbevayà.

Is Beg̵u he Sug̵ù

⁷ Minahal ku he menge suled, kenà beg̵u heini is idsug̵ù ku keniyu su zengan dà. Ne insug̵ù en heini keniyu hein aney kew medtuu. Ne heini he sug̵ù, ne iyan ded sikan is lalag he impesavut kenitew he mahala tew is minsan hentei he zuma tew.

⁸ Ne minsan pa te zaan heini he sug̵ù, henduen be te sikan pa isug̵ù kenitew su impaahà ni Kristu he tutuu heini is sug̵ù wey ibpeehè niw zaan g̵untaan. Egkeawè en kayi te kelibutan is kerusireman ne egketeyawan kiw en te tutuu he tuluuwen.

⁹ Ke zuen etew he egkag̵i he midteyawan te Megbevayà is isip din, iyan, ebpekigkuntada sikandin te zuma zin, kemulu pa sikandin diyà te kerusireman.

¹⁰ Is etew mulà he ebmahalen din is duma zin, iyan sikandin kes edteyawan is isip din te Megbevayà, ne kenè din ibpekesalà is menge ulaula zin.

¹¹ Iyan, is etew he ebpekigkuntada te zuma zin, kemulu pa is isip din diyà te kerusireman ne mezaat pa is menge ulaula zin. Iring sikandin te etew he kenè din egketuenan ke hendei sikandin ebpekepevayà su ziyè pa sikandin te kerusireman.

¹² Ebpesuratan ku sikiyu, menge anak ku, su nengepesaylu en is menge salè niw tenged ki Kristu.

¹³ Sikiyu is menge meg̵urang, umba ebpesuratan ku sikiyu su nehimu kew en he menge emig̵u ni Kristu. Daan en sikandin te wazè pa limbag̵a is minsan hengkey. Sikiyu is menge menguhed, ebpesuratan ku sikiyu su nezaag niw en si Setanas.

¹⁴ Sikiyu is menge vatà, ebpesuratan ku sikiyu su menge emig̵u kew en te Amey tew he Megbevayà. Iyan ibpesurati ku keniyu te menge meg̵urang is: tenged te emig̵u kew en ni Kristu. Daan en sikandin te wazè pa limbag̵a is minsan hengkey. Iyan ibpesurati ku keniyu te menge menguhed su mevig̵er en is kedtuu niw ne kenà egkeawà diyan te isip niw is Lalag te Megbevayà, wey nezaag niw en si Setanas.

Is Kelibutanen he Menge Suat te Etew

¹⁵ Kinahanglan he kenà iyan dekelà dini te g̵ehinawa ta is menge ulaula te menge etew zini te kelibutan he menge kuntada te Megbevayà, kinahanglan daan he wazà minsan hengkey zini te kelibutan he iyan dekelà dini te g̵ehinawa ta. Su ke zuen etew he iyan dekelà diyà te g̵ehinawa zin is iring dutun, kenà egkehimu he iyan mahal ziyà te g̵ehinawa zin is Amey tew he Megbevayà.

¹⁶ Su is minsan hengkey he mezaat he ulaula zini te kelibutan, iring te menge mezaat he kebayà, is menge mezaat he vutang he egkeahà wey egkesuatan te menge etew wey is kebpezalig dan tenged te menge azen he nekuwa zan, kenè man heini ebpuun te Amey tew he Megbevayà, kekenà, dini zà ebpuun te kelibutan.

¹⁷ Egkehanew keuzemà is kelibutan wey egkehanew zaan is minsan hengkey he mezaat he egkesuatan te menge etew, iyan, sikan is edtuman te egkesuatan te Megbevayà, kenà mulà egkehanew, kekenà, duen din untung he wazà pidtemanan.

Is Menge Kuntada ni Kristu

¹⁸ Menge anak ku, meg̵aan en egketapus heini is timpu. Nezineg niw en he keuzemà duen edlepew he egeraran te Kuntada ni Kristu. Guntaan duen en mezakel he menge kuntada ni Kristu ne tenged dutun netuenan ta he meg̵aan en iyan egketapus heini is timpu.

¹⁹ Ne heini is menge kuntada ni Kristu, kenè tew sikandan tutuu he menge zuma su umba mid-ewaan kiw zan. Angin ke tutuu zan he zuma tew su wazè kiw zan geina ewai. Tenged te ked-awè dan egketuenan ta he kenè dan tutuu he menge zuma tew.

²⁰ Sikiyu mulà, mibpeulinan kew ni Kristu te Wag̵as he Mulin-ulin ne tenged dutun nesavut niw te langun is tutuu he tuluuwen.

²¹ Kenè ku iyan ibpesurati keniyu is tenged te wazè niw mesavut ke hengkey is tutuu he tuluuwen, kekenà, tenged te nesavut niw en wey tenged te wazà minsan hengkey he tarù he ziyà ebpuun te tutuu he tuluuwen.

²² Hentei man is teruen? Iyan sikan is egkag̵i he kenà iyan si Jesus mibpilì te Megbevayà he ibpahadì. Is egkag̵i kayi, ne iyan kuntada ni Kristu su egkeg̵iyen din he kenà tutuu he ed-ezapen is Amey tew he Megbevayà ne egkeg̵iyen din daan he kenà si Kristu Anak te tutuu he Megbevayà.

²³ Ne ke zuen etew he kenè din edewaten is Anak te Megbevayà, kenè din daan edewaten is Amey tew he Megbevayà. Ne iring din ded daan ke zuen etew he midawat din en is Anak te Megbevayà, nezawat din en daan is Amey tew he Megbevayà.

²⁴ Is tuluuwen he impenurù keniyu hein aney kew medtuu, kinahanglan he edhemenan niw su emun edhemenan niw kenà egkehimu he kenè kew layun egkesevaha te Amey tew he Megbevayà wey te Anak din he si Jesu Kristu.

²⁵ Su iyan impenaad kenitew ni Kristu is untung he wazà pidtemanan.

²⁶ Ebpesuratan ku sikiyu wey kew med-andam su zuen menge etew he tarù is ibpetuuwan dan pezem keniyu.

²⁷ Iyan, sikiyu, wazà kinahanglan he zuen selakew pa he ebpenurù keniyu su mibpeulinan kew en ni Kristu te Wag̵as he Mulin-ulin. Pinaag̵i zutun egkesavut niw is langun he ibpesavut keniyu ni Kristu. Tutuu mulà ne kenà tarù haazà is ibpesavut din keniyu umba kinahanglan he hemeni niw is kebpekidsevaha niw kandin sumalà is impenurù en keniyu.

Is Menge Anak te Megbevayà

²⁸ Ne tenged kayi te langun, menge anak ku, hemeni niw is kebpekidsevaha niw ki Kristu su wey kenè kew mahandek ne kenè kew egkeeled keuzemà dutun te kedlikù din.

²⁹ Netuenan te en he metazeng si Kristu. Netuenan ta zaan he minsan hentei he metazeng is menge ulaula zin, nehimu en sikandin he anak te Megbevayà.