Tobit 12 - Marahay na Bareta Biblia

An Anghel na si Rafael

¹ Dangan inapod ni Tobit an saiyang aki na si Tobias asin sinabihan, “Aki ko, dai mo paglingawan na bayadan an lalaking nag-iba saimo; kaipuhan dugangan mo an bayad saiya.”

² Naghapot si Tobias, “Ama, gurano daw an dapat na itao ko saiya? Para sako, bako man maraot kun itao ko saiya an kabanga kan kwartang ikinabalik ko.

³ Huli ta ligtas niya akong ikinapuli, binolong niya an sakong agom, nakua an kwarta ki Gabael dangan binolong man niya an pagkabuta mo.”

⁴ Nagsimbag si Tobit, “Itao mo an kabanga kan kwartang nakua mo; maninigo siya kaiyan.”

⁵ Kaya inapod ni Tobias si Rafael dangan sinabihan, “Uya an kabanga kan kwartang nakua tang duwa.”

⁶ Dangan isiniblag ni Rafael an duwang lalaki asin sinabihan, “Omawon nindo an Dios asin magpasalamat kamo saiya. Omawon nindo siya sa atubang kan gabos huli kan ginibo niya saindo. Maninigo na omawon siya asin pamurawayon an saiyang ngaran. Ipahayag nindo an mga gibo nin Dios. Dai kamo mag-ontok sa pag-omaw saiya.

⁷ “Marahay na kaisipan an itago an sekreto nin sarong hade, alagad an ginibo nin Dios kaipuhan ipahayag sa gabos na lugar. “Kun maggibo kamo nin marahay, mayong maraot na mangyayari saindo.

⁸ “An pagpamibi marahay kun igwa iyan nin kaibang pag-ayuno, mga gibong herak asin katanosan. Mas marahay an kadikit na itinao na may kaibang katanosan ki sa dakul na may kaibang karatan. Mas marahay an maglimos ki sa magsaray nin bulawan.

⁹ Huli ta an paglimos nagliligtas sa kagadanan, asin naghuhugas kan lambang kasalan. An mga nagpapahiling nin mga gibong herak sa kapwa asin nin mga gawe nin katanosan magkakaigwa kan kapanoan nin buhay;

¹⁰ alagad an mga nagkakasala iyo man sana an kaiwal kan saindang sadiri.

¹¹ “Sinabihan ko na kamo na marahay na kaisipan an itago an sekreto nin sarong hade, alagad an ginibo nin Dios kaipuhan ipahayag sa gabos na lugar. Ngunyan, itutuga ko saindo an bilog na katotoohan asin mayo ako nin tatagoon.

¹² Tobit, kan ika asin si Sara nagpamibi sa Kagurangnan, ako an nagdara kan saindong mga pamibi sa saiyang atubang. Siring man an sakong ginibo sa lambang paglubong mo kan gadan.

¹³ Kan aldaw na dai ka nagduwa-duwang magtindog asin magbaya kan saimong pagkakan tanganing ilubong an gadan, naaraman ko an saimong marahay na gibo, asin kaibahan mo ako.

¹⁴ Kaya sinugo ako nin Dios tanganing bolongon ka asin an manugang mong si Sara.

¹⁵ Ako si Rafael, saro sa pitong banal na anghel na nagdadara kan mga pamibi kan mga banal asin nagtitindog sa mamurawayon na presensya nin Kagurangnan, andam na maglingkod saiya.”

¹⁶ Natakot si Tobit asin si Tobias kaya nagdapa sinda sa daga na nagtatakig sa takot.

¹⁷ Alagad sinabihan sinda ni Rafael, “Dai kamo matakot; magigin ligtas kamo. Alagad omawon nindo an Dios sagkod pa man.

¹⁸ Huli ta nagdigdi ako bako sa sadiri kong kabotan, kundi huli sa kabotan nin satuyang Dios. Kaya omawon nindo siya sagkod pa man.

¹⁹ Kan nakaaging aldaw, kan naghona kamong nagkakakan ako, bakong totoong nagkakan ako, kundi saro man sanang bisyon an nahiling nindo.

²⁰ Mantang yaon pa kamo sa dagang ini, omawon nindo asin pasalamatan an Dios. Ngunyan mabalik na ako sa saiya na nagsugo sako. Isurat nindo sa sarong libro an gabos na nangyari.”

²¹ Dangan nawara si Rafael. Nagtindog si Tobit asin si Tobias, alagad dai na ninda siya nahiling.

²² Dangan nagpoon sindang mag-awit nin pag-omaw saka pasasalamat huli kan dakula saka makangangalas na mga gibo nin Dios; inako ninda na nagpahiling sa sainda an anghel nin Kagurangnan.