Tobit 10 - Marahay na Bareta Biblia

Nahandal si Tobit asin si Anna

¹ Sa bilog na panahon na iyan, binibilang ni Tobit an mga aldaw na kaipuhan sa pagbyahe tanganing makaabot sa Rages dangan makabalik. Kan tapos na an talaan na aldaw na dapat sindang magbalik, asin mayo pa si Tobias saka si Rafael, nagsabi si Tobit sa saiyang agom,

² “Ano kaya an nakaabala ki Tobias? Gadan na daw si Gabael kaya mayo na nin matao saiya kan kwarta?”

³ Nahandal nin marahay si Tobit.

⁴ Dangan nagsabi si Anna, “Gadan na an satong aki; an pagkaatraso niya an nagpapatotoo kaiyan.” Dangan nagpoon siyang maghibi para ki Tobias,

⁵ “Aki ko, ika na kaogmahan nin sakong buhay, tano ta tinugotan takang maghale digdi?”

⁶ Sinabihan siya ni Tobit, “Mag-alo ka; dai ka mahandal. Mayo nin maraot na nangyari saiya.”

⁷ Alagad nagsimbag si Anna, “Ika an mag-alo, asin ontoka an pandadaya mo sako. Gadan na an aki ko.” Kaya aroaldaw nagluluwas si Anna sa harong asin minaduman sa dalan na inagihan ni Tobias; nagbabantay siya sa pag-abot ni Tobias sagkod na magsolnop an aldaw. Dai siya nagkakakan nin anoman kun aldaw, asin dai siya nag-oontok sa pagtangis para ki Tobias kun banggi. Natapos na an katorseng aldaw nin bangkete sa kasal na ipinanuga na gigibohon ni Raguel para sa saiyang aki na si Sara. Kaya dinolok siya ni Tobias asin nagsabi ini, “Tugotan mo akong magpuli na ngunyan huli ta aram kong nawaraan na nin paglaom an sakong ama saka ina na mahiling pa ako.”

An Paghale sa Ecbatana

⁸ Alagad nagsimbag si Raguel, “Digdi ka sana sa kaibahan ko. Mapasugo ako sa saimong ama tanganing paaramon siya kan kamugtakan mo.”

⁹ Alagad nagsabi si Tobias, “Dai pwede! Papulion mo na ako sa sakong ama.”

¹⁰ Kaya itinao ni Raguel ki Tobias an agom kaini na si Sara asin an kabanga kan gabos na pagsadiri niya: oripon, baka, karnero, asno, gubing, kwarta saka iba pang pagsadiri.

¹¹ Benendisyonan niya an duwa asin dinespedir dangan nagsabi, “Pauswagon logod kamo kan Dios nin langit, mga aki ko. Mahiling ko logod an saindong mga aki bago ako magadan.”

¹² Sinabihan man ni Raguel si Sara, “Mag-iba ka sa saimong agom asin duman ka mag-erok sa saiyang mga magurang. Galangan mo sinda siring kan paggalang mo samo na mga magurang mo. Mga marahay na bareta logod manongod saimo an sakong madangog.” Dangan hinadokan ni Raguel si Sara. Sinabihan ni Edna si Tobias, “Aki ko, iligtas ka logod kan Kagurangnan nin langit, asin tugotan logod niya akong mahiling an mga aki mo ki Sara, tanganing magin maogma ako. Itinatao ko sa pangataman mo an aki ko. Dai mo logod siya pagpamondoon.”