Lute INTRO1 - Livulu lya Shukulu KalungaCizivukiso Livulu lya Lute limwesa vije vili mu mwonyo wa naanga ya kaIsalele a simbu ya Maako. Naanga eyi kulutwe yapwile ya vulemu manene mu Isalele, omwo mutekulwila wakama wa Lute wapwile Mwene Ndaviti. Kuwezelela kuli Lute, munu mukwavo wakama tuwana mu livulu eli napu Naumi, uje wakele mu Mbetelehema na munalume wendi na vana vendi vavali va vanalume. Oloni kwakele njala ya lyangengela, co ije naanga vaile ku lifuti lya Mowavi. Munalume wa Naumi wakatsililile kuje vene, co vana vendi vambatele vanakazi va vaMowavi, Lute wapwile umo wa vanakazi vaje. Omo vana va Naumi vavali vatsile ku Mowavi, co Naumi wayongwele ngeci eluke ku Mbetelehema. Naumi walekele vainamweno ngeci vasale ku Mowavi vashomboke ku vanalume veka. Oloni Lute wavyanene kusala, co waile nendi ku Mbetelehema. Livulu lyoshe lituleka muje mwashombokelele Lute kuli kavushoko wakufuka lizina lyendi Mbowasi. Ngwe ku mashiko, vaMowavi kuvavatavesele vapwe vaIsalele. Oloni livulu eli lituleka ngeci Lute wapwile wa kulongwa manene nakukulaela kuli Shukulu Kalunga, co vamutavele kulipandakana na vanu va Isalele, co walekele Naumi ngwendi, “Njikaya kwoshe kuje kuukaya, njikakala kwoshe kuje kuukakala, vanu vove vakapwa vanu vange, Njambi yove akapwa Njambi yange. Njikatsila kwoshe kuje kuukatsila, co vakanjitsinda kuyehi nove. Shukulu Kalunga anjihise nga tulitepa, kuvanga kutsa vene!” (1:16b, 17) Kulumbununa vyuma vili mu livulu Naumi eluka ku Mbetelehema na Lute 1:1-22 Lute aliwana na Mbowasi 2:1–3:18 Mbowasi ambata Lute 4:1-22 |
The Bible in Mbunda ©The Bible Society of Zambia, 2006
Bible Society of Zambia