Lute 4 - Livulu lya Shukulu Kalunga

Mbowasi ambata Lute

¹ Asinoni Mbowasi waile ku mwela wakukungulukila ku cikolo ca mu nganda, co watumbamene mu mbanja. Cooni kavushoko ka Elimeleke wa a mbunge, uje yatumbwile Mbowasi, wezile. Ngecivene, Mbowasi wamusanene ngwendi, “Ndolome yange ija utumbame kuno.” Co watumbamene.

² Asinoni Mbowasi wasanene vakulunu likumi va mu nganda, wavalombele ngeci navo lalo vatumbame. Omo vatumbamene,

³ Mbowasi wendekele kuli kavushoko kendi ngwendi, “Naumi naija kutunda ku Mowavi, ashaka kulandesa lihya lya ndolome yetu Elimeleke,

⁴ njinakuleke ngeci uzivuke omwo yove wapwa kavushoko kendi wa a mbunge. Cooni nga ulishaka lilande ku mesho a mbunga ya vakulunu ava vanatumbama kuno. Oloni nga kuulishaka, endeka, omwo yove uli na moko yakulilanda akulivanga asinoni yange.” Co uje munalume wendekele ngwendi, “Njikalilanda.”

⁵ Mbowasi wendekele ngwendi, “Mwamuvwa nga yove ulanda lije lihya kuli Naumi, co lalo ambatela kumo na uje fwile Lute kaMowavi, ngeci lihya lisale mu mavoko a vavushoko vwa mutsi.”

⁶ Co uje munalume wamukumbulwile ngwendi, “Nga ngoconi, co eli lihya kunjasa kulilanda, omwo eci cikapwa cangoco, amo vana vange kuvakasa kulishwana. Cooni lilande yove, nga yangeni shange!”

⁷ A matangwa aje kuvatula vin̄anda vyakukula vyuma nambe kulandakana vufuko, uje muka-kulandesa ikeye ashomona n̄aku ku lindi lyendi, co ayana kuli uje muka-kulanda. Mukemwo vakele nakulinga vaIsalele mukumwesa ngeci vin̄anda vinahu.

⁸ Ngecivene, uje munalume wendekele kuli Mbowasi ngwendi, “Lilande yove,” co washomwene n̄aku ku lindi lyendi nakuyana kuli Mbowasi.

⁹ Asinoni Mbowasi wendekele kuli vantwama na kuli voshe vaje vakele kuje ngwendi, “Ku litangwa lya lelo yeni voshe munapu vakaleo, yange njinalanda kuli Naumi vyuma vyoshe vije vyapwile vya Elimeleke, nevi vya vana vendi va vanalume, Kilyone na Mahelone.

¹⁰ Amo na Lute kaMowavi, fwile ya Mahelone, njimwambata oni apwe munakazi wange. Eci cikapwa kunyunga vufuko vwa naanga ya mutsi mu mavoko a vavushoko vwendi, co na naanga yendi anga vakakala akati ka vavushoko vwendi na mu nganda yendi. Co ku litangwa lya lelo yeni voshe munapu vakaleo.”

¹¹ Asinoni vaje vantwama na veka vakele kuje vamukumbulwile ngwavo, “Eyo, yetu tunapu vakaleo. Shukulu Kalunga apwise munakazi wove ngwe Lakele na Leya, vaje vapwile vakukulwila va cikota ca Isalele. Upwe muka-kufuka mu cikota ca Efaleta nakutsimana mu Mbetelehema.

¹² Naanga yove ipwe ngwe naanga ya Peleze muna Tamale na Yunda.”

Mbowasi na vatekulwila vendi

¹³ Ngecivene, Mbowasi wambatele Lute, co Shukulu Kalunga wavezikisile Lute, wakele na kafumba, wakitile mwana wa munalume.

¹⁴ Co vanakazi vendekele kuli Naumi ngwavo, “Shukulu Kalunga ku litangwa lya lelo nakwana mutekulu wa munalume wakukunyunga. Mwana ou apwe wa lutsimo mu Isalele!

¹⁵ Vanyokomweno ava vakuzema manene, vanatuvakana vana va vanalume vatanu na vavali. Co ololo nakwana mutekulu wa munalume uje akasangula lizina lyove nakukwana kuvwaelela mu vukulukazi vwove.”

¹⁶ Naumi wambatele mwana, wamukambekele a nulo yendi, wamulelele.

¹⁷ Vanakazi vaje muvalyatelele valukile mwana lizina lya Ovende. Co valekele vanu voshe ngwavo, “Kuli Naumi kunasemuka mwana wa munalume.” Ovende ikeye ishe ya Njesi, uje wakitile Ndaviti.

¹⁸ Eyi ikeyo naanga ya Peleze, Peleze wakitile Hezelone,

¹⁹ Hezelone wakitile Lama,

²⁰ co Lama wakitile Aminandave, Aminandave wakitile Naheshone, Naheshone wakitile Salemone,

²¹ Salemone wakitile Mbowasi, Mbowasi wakitile Ovende,

²² co Ovende wakitile Njesi, na Njesi wakitile Ndaviti.