Lute 2 - Livulu lya Shukulu Kalunga

Lute apanga mu lihya lya Mbowasi

¹ Naumi wakele na muka-vulo vwendi lizina lyendi Mbowasi, wapwile munu wakufuka wa lutsimo, wakundamene ku naanga ya munalume wendi Elimeleke.

² A litangwa limo Lute muka-muyati wa Mowavi wendekele kuli Naumi ngwendi, “Njitave njiye ku mahya njikapupulule vimbuto vya vinona vivanaseze munima amo njikawana akanjizivilako mema ku mbunge.” Naumi wamukumbulwile ngwendi, “Mwamuvwa munange ya.”

³ Ngecivene, Lute waile ku mahya, wakavangeyeye munima ya vaka-kupanga nakunonongola mbale ya maumwa ije vanaseze. Co casholokele ngeci, kuma wakele mu lihya lya Mbowasi kavushoko ka Elimeleke.

⁴ Omo kwetile kasimbu Mbowasi wezile kutunda ku Mbetelehema, walikandelelele na vaka-vipangi vendi. Wendekele ngwendi, “Shukulu Kalunga akale amo neni.” Co vamukumbulwile ngwavo, “Shukulu Kalunga amivezikise mwane.”

⁵ Asinoni Mbowasi wehwile ntwama wa vaka-vipangi ngwendi, “Iyajo uje mumbanda?”

⁶ Uje ntwama wamukumbulwile ngwendi, “Ikeye mumbanda uje muka-kwija, wezile na Naumi ku Mowavi.

⁷ Nanjilombele ngeci njimutave akavangeye munima ya vaka-vipangi apupulule mbale ya maumwa. Nashangumukile kupanga tunde mutondo kweta na ku simbu ino, ngeci ololo acili nakuhwimako kasimbu muje mu citanda.”

⁸ Asinoni Mbowasi wendekele kuli Lute ngwendi, “Njitolilile njikunangule. Kesi ukapupulule mbale ya maumwa kweka kuvanga mu lihya lino vene. Panga amo na vaka-kupanga vange va vanakazi.

⁹ Kenga mu lihya umone kuje kuvalinakutejela vanalume, co kavangeya munima ya vanakazi. Njashiki vakwenje vaka-vipangi ngeci kesi vakuyandese. Oshe aje awuzivila lihwila, ya nakunwa mema mu vinjava vije vivanatekula.”

¹⁰ Lute watsikamene a mavuli. Co wendekele kuli Mbowasi ngwendi, “Omwo vikajo unaaka mbunge ali yange yakunjikongweya? Omwo vikajo uli na ngozi ya ngacije ali muka-kwija?”

¹¹ Mbowasi wamukumbulwile ngwendi, “Njinazivi vyuma vyoshe vije viwalingile kuli vanyokomweno, tunde aje munalume wove watsile. Njazivuka yove waseza vaisho na vanyoko, na lifuti lyove, co unaija nakukala akati ka vanu vaje kuwazivukile akulivanga.

¹² Shukulu Kalunga akwane cikandelela a vije walingile, Shukulu Kalunga Njambi ya Isalele, kuje kuunaija mukukunyunga, akwane cikandelela cakama cakutunda kuli ikeye!”

¹³ Lute wamukumbulwile ngwendi, “Mwane, yove uli na ngozi yakama kuli yange. Unanjisimpisa mu mbunge akwendeka mwamuvwa kuli yange, nameme kunjapwile amo na umo wa vangamba vove.”

¹⁴ A simbu yakulya kwa mutanya, Mbowasi wendekele kuli Lute ngwendi, “Ija kuno tulya mumo, ambata likende, tanta mu vinyu.” Ngecivene, Lute watumbamene amolika na vaka-vipangi, co Mbowasi wamwanene cisoko. Ngeci walile noo vakutile, co vyakulya vimo anga vyasaleleo.

¹⁵ Akumanesa, wakatukile, waile nakupupulula mbale. Mbowasi washikile vaka-vipangi vendi ngwendi, “Mutaveni apupulule mbale, nameme kuje kunalundama mikuta, kesi mumuvindike embwe.

¹⁶ Mushomonweni mbale imo a mikuta mumusezele ngeci akunone.”

¹⁷ Ngecivene, Lute wapupulwile mbale mu lihya noo cingwezi. Omo waijungwile, wawanene kuyehi na makilo likumi a mbale.

¹⁸ Co wambatele mbale yendi nakwiluka kwimbo. Wamwesele vainamweno vije vyapupulwile. Co lalo wavaanene vyakulya vije vyasaleleo a vije vyalile.

¹⁹ Naumi wamwihwile ngwendi, “Kulijo unapupulwila mbale yoshe eyi ku litangwa lya lelo? Mu lihya lyeyajo unakapangelele? Njambi avezikise munu ou nakuzivila ngozi!” Lute walekele Naumi ngwendi wakele nakupanga mu lihya lya munalume umo lizina lyendi Mbowasi.

²⁰ Naumi wendekele ngwendi, “Shukulu Kalunga avezikise Mbowasi! Visimbu vyoshe Shukulu Kalunga wapwa muka-kunyunga vikulaeso vyendi kuli vaka-kuyoya na kuli vatsi. Uje munu, ikeye muka-vulo vwetu natukundama, ikeye umo wa vaje vasa kutunyunga.”

²¹ Asinoni Lute wendekele ngwendi, “Ikeye nanjilekele kupupulula mbale na vaka-vipangi vendi noo vanamanesa kuteja.”

²² Naumi wendekele kuli Lute ngwendi, “Eyo munange, mwamuvwa manene kuli yove kupanga amo na vanakazi mu lihya lya Mbowasi. Amo vakakuyandesa nga ukaya mu lihya lya munu weka.”

²³ Ngecivene, Lute wapangele amo na vanakazi nakupupulula mbale, wapupulwile noo mbale na tiliku vyoshe vyahwile kuteja. Co Lute wakele amolika na vainamweno.