Hoziya 9 - Livulu lya Shukulu Kalunga

Hoziya ambulula vyakunyanyamesa Isalele

¹ Vanu va mu Isalele, likeleni kulinga viwano vyeni vyakulisamba ngwe vaka-kujeneka kukulaela. Munatengulukila kweka nakutunda kuli Njambi yeni, co kumwapwile va kulongwa kuli ikeye. Co mu lifuti mwoshe munalilandesa yeni vavenya ngwe vikwizi kuli Mbale nakuzema vimbuto vije mwayongwele ngweni ikeye wamifwetelevyo!

² Oloni ololo kumukakala na vimbuto vyakupwisamo, na mazi a olive, co kumukakala na vinyu.

³ Vanu va mu Isalele kuvakasala mu lifuti lya Shukulu Kalunga, oloni vakeluka ku Ingito, co vakalya vyakulya vyakujeneka kujela mu lifuti lya Asilya.

⁴ Co mu mafuti aje a vungenzi kuvakasa kukombelelamo vin̄ombelo vya vinyu kuli Shukulu Kalunga, nameme kunena vin̄ombelo vyavo kuli ikeye embwe. Vyakulya vyavo vikajwalesa munu woshe uje akavilya, ngwe vyakulya vyakulila mu myala. Vakavipangesa lika kushulisa mafu avo, nacimo cai civakatwala ku Njuvo ya Shukulu Kalunga kupwa mulambu.

⁵ Vakalinga vati omo simbu ya matangwa a viwano vivemika vya kusingimika Shukulu Kalunga iketa?

⁶ Omo tuyando twakama tukaija, co vanu voshe vakalishandoka, co vaka-Ingito vakavakungulula, vakavakungulula nakuvatsinda ku Mefise! Vufuko vwavo vwa ngolinde na mitambela aje vatungilile membo avo vikakupuka mu shaku na mu mambimbo.

⁷ Simbu yakunyanyamesa inete, simbu ije omo vanu vakatambula vije vinavapande. Omo cuma eci cikalingiwa, Isalele vakacizivuka! Mulinakwendeka ngweni, “Ou muka-kwimanena napu cikolokomba. Munalume ou wa Njambi nazaluka.” Yeni vanu mwanjizinda manene omwo vuvi vweni vunapu vwavungi manene.

⁸ Njambi nanjitumu kupwa muka-kwimanena wakunangula vanu vendi va Isalele. Oloni kwoshe kuje kunjiila, mweseka kunjitela nganjo ngwe nji kazila. Nameme mu Njuvo ya Shukulu Kalunga vanu vanapu vitozi va muka-kwimanena.

⁹ Vanapu vavavi manene mu vije valinakulinga, ngwe muje muvafwile ku Ngimbeya. Njambi akanuka vuvi vwavo nakuvanyanyamesa.

Tuyando tuje twezilile Isalele omwo ya vuvi vwavo

¹⁰ Shukulu Kalunga alinakwendeka ngwendi, “Omo njawanene Isalele akulivanga, capwile ngwe munu nawana mikolovozi ya vushuka vwa vinyu vumena mu mambo. Omo njamwene vakukulwila veni akulivanga, capwile ngwe kumona vushuka vwa mukuyu vwakulivanga kuhya akushangumuka kwa mwaka. Oloni omo vezile ku Munkinda wa Peole, co vashangumukile kulemesa Mbale, co vapwile va vunyengwe manene ngwe lalo vaje tumponya vavazemene.

¹¹ Vukama vwa Isalele vukapulwila kulyala ngwe kazila, co kukukasemuka lalo vana kuli vakevo, kukukakala lalo vanakazi va tufumba-kazi, naumo mwana ivakemita wai.

¹² Oloni nameme valela vana, anga njikavatambulavo naumo wai njikasezao wakuyoya. Omo njikajenjuka vanu ava, co vyuma vyavikalu vikalingiwa kuli vakevo.”

¹³ Shukulu Kalunga, njilinakumona vana vavo valinakuvayomba nakuvatsiya.

¹⁴ Vikajo njikulomba ngeci uvilinge kuli vanu ava? Pwisa vanakazi vavo mumba! Mavele avo ominine ngeci kesi vajamwese vana vavo!

Kusompa kwa Shukulu Kalunga ali Isalele

¹⁵ Shukulu Kalunga alinakwendeka ngwendi, “Vilinga vyavo vya vuvi vyoshe vyashangumukilile mu Ngilingale. Kuje vene kukekwo njashangumukilile kuvazinda. Omwo a vuvi vuje vuvanalingi, co njikavasheka mu lifuti lyange. Kunjikavazeme lalo nalumo lwai, vantwama vavo voshe vananjitengulukila.

¹⁶ Vanu va mu Isalele vanapu ngwe muti uje wakuma mizi, co kuwesi lalo nakwima vushuka. Kuvakakala lalo na vana, oloni nameme vakakala navo, co njikatsiya vana vavo vaje vavazema manene.”

Muka-kwimanena endeka ali Isalele

¹⁷ Njambi uje njilinakupangela akavyana vanu vendi, omwo vanavyana kumutolilila. Vakapwa vaka-kwendangana akati ka miyati ya vanu.