Hoziya 13 - Livulu lya Shukulu Kalunga

Kusompa kwa mamaneselelo kwa Isalele

¹ Ku myaka ya kunima, omo muyati wa Efalime vendekele, co miyati ikwavo ya Isalele vazivile lyova, co vakengele lika kuli Efalime. Oloni vanu va Efalime valingile vuvi akulemesa Mbale, a vyuma evi, co vakatsa.

² Oloni vacili nakutwalao kulinga vuvi, akulinga vifwa vya vutale nakuvilemesa, tumponya otu twa siliva vanatulingi na mana a vanu, na mavoko a vanu. Asinoni vendeka ngwavo, “Tukombeleleni n̄ombelo kuli vakevo!” Vatijo vanu vasa kukandelela kamponya, kamponya uje wa cifwa ca ngombe!

³ Ngecivene, vanu ava vakahwa vwasi ngwe mbundu ya mutondo, ngwe lime lije lipapumuka omo litangwa likya. Vakapwa ngwe lijungu lije lipekumuka na lihunzi kutunda ku lijungwilo, ngwe vwisi vutundilila mu mbengwa.

⁴ Shukulu Kalunga alinakwendeka ngwendi, “Yange Kalunga Njambi yeni, uje wamitundisile mu Ingito. Kesi mukakale lalo na Njambi weka kuvanga ange lika. Yange lika njapwa muyoyesi weni.

⁵ Njaminyungile mu mambo, muje mu lifuti lyakuma.

⁶ Oloni omo mwakovelele mu lifuti lyalivwa, mwalile nakukuta, co mwalyalesele nakunjivala.

⁷ Ngecivene, njikamilwisa ngwe ndumba. Njikamivandamena mu vingila vyeni ngwe ingwe.

⁸ Njikamilwisa ngwe mbeya uje nazimbalesa vana vendi, co njikamisanyozola. Njikamilwisa ngwe ndumba, nakumisanyozola vipuka-vipuka ngwe cikashama.

⁹ “Njikaminyongesa, yeni vanu va mu Isalele! Co iyajo akamikwasa?

¹⁰ Mwalombele mwene na vantwama, oloni vatijo vasa kwamena lifuti?

¹¹ Mukuluvala kwange njamyanene vimyene, co omo lalo njaluvalele manene njavatundisileko.

¹² “Vuvi vwa Isalele na mulonga wendi vili mu mukanda, co mukanda ou vanautulika mwamuvwa.

¹³ Co Isalele ali na simbu yakuyoya, oloni akuyimona cinapu ca vulema manene, cinapu ngwe mbututu uje ali muyehi nakusemuka, oloni kashaka kutunda mwimo!

¹⁴ Kunjikasa kwamena vanu ava kutunda ku vukalo vwa vatsi, nameme kuvovola ku nzili ya kutsa. Yove kutsa, nena mishongo yove, yove vukalo vwa vatsi, nena kunyongesa kwove. Kunjikazivila vanu ava mema ku mbunge.

¹⁵ Nameme Isalele alinakukula mwamuvwa ngwe shaku, njikatuma lihunzi lya ntwima lyakutunda mu mambo mu ngangela, co likomisa masima avo cau na tuvwelu-vwelu twavo. Likapekumuna vyuma vyoshe vya seo.

¹⁶ Samaliya vanapande kuyinyanyamesa akunjitengulukila. Vanu vendi vakatsila mu nzita, co vimbututu vakavamwashwila asi, co tufumba-kazi vakavatavula memo.”