Hambakuke 3 - Livulu lya Shukulu Kalunga

Lilombelo lya Hambakuke

¹ Eli likelyo lilombelo lya Hambakuke muka-kwimanena.

² Yove Shukulu Kalunga, njazivi lutsimo lwavije walingile, co njinazivi lyova. Linga lalo vyuma vije vyakama viwalingile. Kala na mema ku mbunge nameme uluvala.

³ Njambi alinakwija kutunda ku Endome, Njambi wakujela alinakwija kutunda ku malundu a Palane. Vumpau vwendi vwafwiki melu, co asi oshe anashulu nakumushangazala.

⁴ Alinakwija nakuvyazima kwa muhyato, ceke cilinakuvyazima mu livoko lyendi, mukemwo mwavanda nzili yendi.

⁵ Ikeye atuma mishongo kulutwe lwendi, co ashika kutsa ngeci kumukave.

⁶ Omo alikela, co kaye kajaja, omo akenga, co vanu voshe a kaye valijajela. Alingisa minkinda yalaja ngeci isanyozoke sanyu-sanyu, na malundu kumbwitama kwisi, malundu aje ikeye wendeleo ku san̄ulu.

⁷ Njamwene vanu va ku Kushani vali na lyova, na vanu va ku Mindyani valijajela.

⁸ Yove Shukulu Kalunga, kuma vindonga vikevyo vyakuluvalesele ndi? Indi mema a kalunga akewo akuzivisile litoto? Yove wendelele a mashelwa, co linkimba lya lishelwa likelyo lyapwile litemba lyove, omo walingisile vanu vove ngeci vafungulule vitozi vavo.

⁹ Yove walivwaeselele kupangesa vuta vwove vwa lusipa ngeci washe mikili yove. Muhyato wove watavwile asi.

¹⁰ Omo minkinda yakumwene, co yaningangele, mema etikile kutunda mu mashelwa. Mema a mwisi ya asi akumine, co mankimba awo akatukile kuya kwilu manene.

¹¹ Omo ceke ca mikili yove ije yetile vwasi, na omo kuvyakula kwa likunga lyove, co litangwa na ngonde vyemanene.

¹² Wendele ano asi nakuluvala, co na litoto lyove walyatangelele miyati ya vanu.

¹³ Waile mukwamena vanu vove, mukwamena mwene uje iwangwile, wawisile ntwama ya vaka-vuvi, co wanyongesele vaka-kumukava vendi voshe njwa.

¹⁴ Mikili yove yativile muka-kushika mbunga ya mashwalale vendi, omo vezile ngwe lihunzi mukutushandola, valisambele ngwe muvakalisamba vaje vakayandesa tuutu mu vushweke.

¹⁵ Walyatangelele mema a kalunga na tuvalu twove, co mema a kalunga asetele.

¹⁶ Njazivi vyoshe evi, co njijaja, mbunge yange itumbuka omwo lyova. Muvila wange ushinuka, co mendi ange ajaja mu mavuli. Njikasimpa nakuvandamena simbu ngeci yete, omo Njambi akanyanyamesa vaje vakatulwisa.

¹⁷ Nameme miti ya mikuyu kuyemine vushuka, co kukwesi vushuka vwima a mikolovozi ya vushuka vwa vinyu, nameme vimbuto vya olive vyai, na vimbuto kuvikemi mu mahya, nameme vimanga voshe vakatsa, co mu macakana a vingombe mwoshe mwangoco,

¹⁸ anga vene njikajolela nakuvwaelela muli Shukulu Kalunga, omwo Shukulu Kalunga Njambi, ikeye wapwa muka-kunjinyunga.

¹⁹ Shukulu Kalunga wa Akamwa ya Vyoshe ikeye muka-kunjana nzili. Ikeye muka-kuzambwisa mendi ange ngwe shonge, nakunjikwasa ngeci njishatuke a minkinda.