Dakɔr deg 9 - BIBLE MBAÏ 1980

Ðà nah Pakï

¹ Bïraþe elta kï Moij kam dïlalot kï Sinai kam naht kïdasa lo þal kïkõjoo go teed døning Ejipt't kïtïga an:

² Ad Israelag ngomïn go ða nah Pakï kaglot'n gang.

³ Ndø kïkõkïlah gidaisøø lo nah'n non døji losølt a i ngomïn go ða nah Pakï kaglot'n gang, a ngomïn kïgo mberkïndagt kï tag tube kï øjïn døa.

⁴ Titbe Moij el Israelag kad ngomïn go ða nah Pakï,

⁵ na ngomïn go ða nah Pakï dø ndøt kïkõ kïlah gidaisøø lo nah kïdasa døji losølt kam dïlalot kï Sinai. Israelag ðan kïgo tagt tube'n Bïraþe el Moij.

⁶ Deg madg'n nõ îgïn telïn kïyerr kïta ødïn nin de mad ad asïn ða nah Pakï ndøt'n non al. Ndøt'n non la awïn ro Moijt kï Aarõ,

⁷ elïn anan: Jî kïyerr kïta j'ød nin de mad kïtøði øgjïn dø ðe kï kadkari loj kad Bïraþe kaglot'n gang a?

⁸ Moij turd an: I ngon kad m'oo nya'n Bïraþe a ndasï mbera,

⁹ na Bïraþe el Moij an:

¹⁰ El Israelag an: Îla de mad kusït, ke ku ngakasït, tel kïyerr kïta ød nin de mad, ke de mad aw kam þe mbaht kïsãi a ne, a ngomgo nah Pakï lo Bïraþe.

¹¹ Kam naht kïkõjoo kï ndø kïkïlah gidaisøø lo nah'n non ye a ngomïn go ða nah Pakï døji losølt, a san bïnã kïkanj berrkasï nat kï mbikámg kïkat.

¹² A nyan dana mbã kad loti døt al, a tetïn kïnga kïkïða al tø. A ngomïn go ða nah Pakï kïgo mberkïnda.

¹³ Îla de i kïkar, aw mbah al, na mbet ngomgo nah Pakï a ne, de'n non a ørrïna kø ku degt loa kïta ðe kï kadkari lon ad Bïraþe kaglot'n gang al. De'n non a to nyaba majal lon.

¹⁴ Îla mbah mad hølondït dansït, na ndig ngomgo ða nah Pakï lo Bïraþe a ne, a ngoma kïgo mberkïndagt kï tag tube kï øjïn dø ða nah Pakï. Mberkïnda i kïðabe kïtasï tujoo, kïta mbah, ke ngon ngeþe.

Kilndii aw nõ Israelagt

¹⁵ Ndøt'n ðan kujkub londï kïdõ oi ye kilndii ut dø lo hølondït ad i kujkub najkïma, na lokïsøle kil ndï þa dø kujkub londït tit horr be mbã loti kïsî.

¹⁶ I titbe kïndøgndøg, kilndii ut døa kada na kondø i tit horr be.

¹⁷ Lon kilndii þai dø lo hølondït't ye, Israelag awïn ho, na Israelag høn londï kam lot'n kilndii dubat.

¹⁸ Israelag awïn kïgo mberkïnda lo Bïraþe, høn londï kïgo mberkïnda lo Bïraþe tø, na lon kilndii ða dø kujkub londït a ne, Israelag ndïn londïdt.

¹⁹ Lon kilndii ða dõ dø kujkub londït ndø ngãi, a ne, Israelag ngomïn go mberkïnda lo Bïraþe, na awïn al.

²⁰ Lon kilndii ða dõ dø kujkub lo ndït ndo ngãi al a ne, høn londï kïgo mberkïnda lo Bïraþe na awïn kïgo mberkïnda lo Bïraþe tø ho.

²¹ Ndø madg lon kilndii ða dõ lokïsøle mbã loti kamla þai a ne, în tø a awïn ho Îla kilndii duba kada kïða kï ndø kïða kamla þai a ne, în tø a awïn ho.

²² Îla kilndii duba dø kujkub londït ndø joo, ke nah kïða, ke þal kïða a ne, Israelag a høn londï na a awïn al na lon kilndii þai ye în tø awïn ho.

²³ Høn londï kïgo mberkïnda lo Bïraþe, na awïn kïgo mberkïnda lo Bïraþe. Telïn rod go tat lo Bïraþe'n ndad mbera kïtakul Moij.