Dakɔr deg 23 - BIBLE MBAÏ 1980

¹ Balam el Balak an: I ða dïngïr tanãimïta nëbe adïm, i ðago bøw mangg tanãimïta kï bal batg tanãimïta adïm ho.

² Balak ða nya'n Balam el Balak kï Balam lan kadkari bøw mang kïða kï bal bat kïða dø dingïrt kïðen.

³ Balam el Balak an: I ða ta kadkarit loi kïlahorrt, na mî m'a m'aw kete maja Bïraþe a ðe ndødïm, na m'a m'eli nya'n þet a tee dø adïm. Aw dø doorlot mad kï døa todïla.

⁴ Luwah ndød Balam na Balam ela an: M'ða dïngïr tanãimïta na m'la kadkari bøw mang kïða kï bal bat kïða dø dingïrt kïðen.

⁵ Bïraþe nda ta ta Balamt el an: I tel kï ro Balakt, a el titbe.

⁶ Balam tel kï ro Balakt na oo Balak ða ta kadkarit lon kïlahorrt, î kï mbaiþeg lo Moab tube,

⁷ Kamla Balam elta lon kï terrta an: Balak ðe sem ko døning Aramt, Ngar kï Moab ðe sem ko dø mbalbogt kï loþakàdt. Elïm an: I ðe i ndøl Jakob, I ðe i la ta dø Israelt.

⁸ Titbãi hã m'a m'ndøl de'n Luwah ndøla al a? Titbãi m'a m'la ta dø det'n Bïraþe la ta døat al a?

⁹ Ã, ko tasom mbalbot m'ooa, Ko dø doorlot tø m'nøla, În deg kï londïd i tadang, A tïdand ku ndeg girrdegt al.

¹⁰ Nõ asï tïda buning lo Jakob a? Nõ asï da kør gaj Israel kïða ku kïsøøt a? Kï m'oi koi de kïdenesew, Kï døboim tit na kï døboia.

¹¹ Balak el Balam an: I ða sem ði a? M'kuni kad i ndøl madngétamg na oo, i ða i njang død.

¹² Balam tura an: Sumba kad m'oo go ta'n Bïraþe nda tamt kï m'el ale?

Balam njang dø Israel þaitø

¹³ Balak ela an: I ðe nat sem kam lot mad'n i asï kood tit. A oo nusïd na i asï kood tube al. Lot'n non la a i ndøldt adïm ye.

¹⁴ Ørr Balam aw sia kam ndøøt lo Sopim tasom mbalbo Pisga, ða dïngïr tanãimïta, na la kadkari bøw mang kïða kï bal bat kïða dø dingïrt kïðen.

¹⁵ Balam el Balak an: I ða ta kadkarit loi kïlahorrt ne na m'a m'aw kete m'ndød Bïraþe.

¹⁶ Bïraþe ðe ndød Balam nda ta taat el an: I tel kï ro Balakt, a el titbe.

¹⁷ Balam tel kï ro Balakt na oo Balak ða kad kadkarit lon kïlahorrt nat kï mbaiþeg lo Moab. Balak ndïjea an: Ta ði Bïraþe el a?

¹⁸ Balam elta lon kï terrta an: Balak, i þai dõ oo dø. Ngon Sipor, i nel mbii kï romt.

¹⁹ Luwah i de hã a eltakïbal al. I ngon de hã a mbel køn al tø. Nya'n eltaa, a ða ale? Nya'n la mbera a tøl kõna ale?

²⁰ Oo, Luwah ndam mber kad m'njang dø, Lon njang dø de a ne, m'asï kørr kø al bat.

²¹ M'oo majal'n a ða Jakob al, m'oo darondø mad kam Israelt al. Bïraþe Luwah loa i nat sia, yel tetðøø lo ngar i kudt.

²² Luwah tee sed kø Ejipt't, tøgd i tit tøg gaj døg be,

²³ yo mad kï asï ndoor Jakob goto Ndõtee mad kï asï ndoor Israel gotø ho. Lon kaglo asï a ne, a el Jakob kï Israel an: I nya'n Luwah ða.

²⁴ Oo, Israel þai tit kõ tubo, Ndaj ron kïdõ tit bøw tubo. A to ber al mbã kad sanyahøn Na ãi mosï nya'n tøla.

²⁵ Balak el Balam an: Îla i ndøld, al a ne, i njang død al bat tø ho.

²⁶ Balam tur Balak an: M'eli ale? M'a m'ða nya kïðen'n Bïraþe a el.

Balam njang dø Israel kïkõmïta

²⁷ Balak el Balam an: I ðe tajigla, m'a m'øri m'aw sei lot mad kïðang, maj a ne, Luwah kad i ndøld nu adïm.

²⁸ Balak ørr Balam aw sia tasom mbal Peort'n sumba nõ dïlalo.

²⁹ Balam el Balak an: I ða dïngïr tanãimïta nëbe adïm, na i ðago bøw mangg tanãimïta kï bal batg tanãimïta adïm ho.

³⁰ Balak ða nya'n Balam el na la kadkari bøw mang kïða kï bal bat kïða dø dingïrt kïðen.