Mark 8 - BIBLE MBAÏ 1980

Jeju ad nyasa deg dub søø

¹ Ndø mad, koosïdeg tel kawïn na kï nat tø. Na nyasa kad deg'n non san goto. Ye Jeju kun ngéndoog lon eld an:

² Ta õ kamm ngãi kïta koosïdeg'n ðan, kïta asï ndø mïta þone la în nat sem, na nya mad kad san goto.

³ Îla m'ad'd tel awïn þe kï þo kamdt a ne, kumd a il dø ðobt ad tøgd a goto, kïta kïmadg þain ko kï sãi.

⁴ Ngéndoog loa turïna anan: Ja kï ða titbãi kad j'ad nyasa koosïdeg'n ðan sa ndenin kï dïlalot nëbe a?

⁵ Jeju ndïjed an: În kï bïnã kï løi bãi jisït nõ. Ngéndoog turina anan: J'aw kï kuþir bïnã kï løi tanãimïta.

⁶ Kamla Jeju el koosïdeg kad ndïn ber døningt. Øi bïnãg kï løi tanãimïta, na ða mersi Luwah kamla hø tet ad ngéndoog kad kï luþon koosïdeg.

⁷ Awïn kï ngan kanj tëbe. Jeju ða mersi Luwah, kamla keg ngéndoog lon kad luþon.

⁸ Deg san, ndenin. Ngéndoog øin ndeg bud bïnã kï løi ye, ðoosï keh tanãimïta.

⁹ Deg tube asïn dub søø. Kamla Jeju nyad ad awïn þe.

¹⁰ Tajigt al kam toot sed ngéndoog lon awïn kam døning Dalmanutat.

Parisïg ndïjen Jeju kad ða nyakøj mad

¹¹ Parisïg ðen ro Jejut, mbã girr majïn ta kï Jeju, yan gum kad Jeju so kamt kïgo ðob tag kï ndïje dangdang, elïna anan i ða nyakøj mad takumjt ne ad j'oo, kad øj'jïn kad i Luwah la lai jeje ye.

¹² Jeju lako pü kï tøgïn, kamla el an: Kïtøði deg kï døkaglot kï þone ndïjen nyakøj a? Rota la m'ndï m'elsï ye: deg kï kaglot kï þone a oon nyakøj mad kïðang al.

¹³ Nõbe Jeju tînyà Parisïg, na tel al kam toot gog aw gang bah gid ko nu.

Ta lo berrkasï kï øj go nyandoo lo Parisïg kï kï lo deg lo Herod

¹⁴ Kam ngéndoog lo Jeju oi dø køi bïnã kï løi, na în kï bïnã kï løi kïðabe la kam toot ye.

¹⁵ Jeju ndad mber kï tøgïn an: Oon go rosï maj dø berrkasït lo Parisïg kï kï lo Herod.

¹⁶ Ad ngéndoog loa øjïn na ta kudt elïn anan: I kïta nyasa'n goto jijt la elïn ta 'nten ye.

¹⁷ Jeju oo ta gaad þet ad eld an: Kïtøði i ndï øjïn ne ta dø bïnã kï løit kï goto jisït a? Mbã tajigla goosï losï goto oo? A i gerïn girr nyandoo lom ye ale? În deg kï kurdøsï oi mbukï.

¹⁸ Awïn kï kum kïta koo lo, na i oon lo al, awïn kï mbisï kïta koo dø ta, na oon dø ta al, adïn kamsï gah døt al.

¹⁹ Lon m'keg bïnã kï løi kïmi kïta deg dub mi ye, ndeg buda kï nãi ye, ðoosï keh bãi a? Turïna anan: Ðoosï keh kïlah gidaijoo.

²⁰ Jeju eld tø an: Lon m'keg bïnã kï løi tanamïta m'ad deg dub søø san ye, buda n'nãi ye, øin ðoosï keh bãi a?

²¹ Turïna anan: I keh tanãimïta. Eld an: I gerïn girra al þaitø ø?

Jeju yoot mundo kï Besaidat

²² Jeju kï ngéndoog lon awïn Besaidat. Deg ðen kï mundø mad roat, ndïjena kad kï øda.

²³ Jeju hø ji mundo, ørra aw sia gid þet; kamla tiw hortan kumat, na nda jïn døat na ndïjea ta an: Oo nya mad e?

²⁴ Mundo tee kumïn na el an: M'oo deg, tit kï kagg be, na ða ndian.

²⁵ Jeju tel nda jin dø kum mundot gog þaitø, mundo oo lo kïðingg kï nont, yoot, oo nyag tube ar nyang.

²⁶ Jeju ela an: Aw þe loi, ot kaw kam þet.

Pierr elta da'n dø Jeju, an i Krist

²⁷ Jeju aw sed ngéndoog lon ngan þegt kï nderrbe kï kam døningt'n a kunïna Sejare kï Pilipt. Lon în dø ðobt ye, ndïje ngéndoog lon an: Deg ndï elïn anan: Mî nõ a?

²⁸ Ngéndoog loa turïna anan: Deg madg ndï elïn anan î Jã kï ngeða baptem deg, kïmadg ndï elïn anan î Eli, kïmadg tø ndï elïn anan: Î kïkïða ku ngekelta kï ta Luwaht.

²⁹ Jeju ndïjed an: Na în ye; i ndï elïn anan mî nõ a? Pierr tura an: Îla î Krist ye.

³⁰ Jeju ndad mber kï tøgïn kad kï elïn ta 'nten de mad al.

Jeju elta dø koint kï þain lo koit

³¹ Kamla Jeju mba girr ndoo ngéndoog lon an: Kari na Ngon de a ngahkõ ngãibe, kïbog lo juipg, ngéjanyamosïkadkari, kï ngéndoo deg mberkïnda a øsïna ta, a tølïna, na go ndøt kïmïta a ne, a þai lo koit.

³² Eld ta 'nten kï tïga wakïsï. Ye Pierr ørra køt ko kïða, mba girr køl sia ela an: Øt kelta titbe.

³³ Na Jeju mbel kumïn kï gog oo ngéndoog lon, na køl kï Pierr an: Sitan aw sãi. I tel kø gidïmt. Ta gaai i ta lo Luwah al, na i ta gaa lo deg.

³⁴ Kamla Jeju kun koosïdeg sed ngéndoog lon kï ront, na eld an: Îla de mad ndig kad'n ndulo gom a ne, maj kad ørr ta ron kø balang, kï un kag døsï lon, kamla kï n'ndulo gom ye.

³⁵ Kïtø de'n ndig kï n'aj ron døningt la a ne, a la ron kø na de'n la ron kø kïtatøm ho kïta Hoita Kïmaj a ne, a aj.

³⁶ Îla de ngah nyamajg kï døningt kïtaagbe, na nal kumkajir kï jeje ye, ndaa i ði a?

³⁷ Ði de a ad kï'n gan kot ndï kï dø dõ a?

³⁸ De'n hã roa ndï søla kïtatøm ho, kïta ta lom ho, ku degt kïmajal kï ðug gøligøli kï kaglot'n ðan a ne, mî Ngon de m'a m'la rosøl døat ho, lon m'a m'tel m'ðen kam kunjt kïðangereng lo Bøwm nat kï malaikag kïjaþat.