Mark 6 - BIBLE MBAÏ 1980

Deg kï Najaret't adïn kamd Jeju al

¹ Jeju þai lot'n non, aw Najaret't gog, þet'n tøg tit. Ngéndoog loa în nat sia.

² Lon ndø taakò asï ye, Jeju mba girr ndoo deg kam kuj kawnat lo juipg. Deg kï ngãi'n ndï oon dø ta loa ye, ta yad ad elïn anan: De'n ðan ngah nyandoo lon ye kokïða a? Terr'n adïna ye, i terr kï titbãi a? Nyag kï yaya'n ndï ða ye, tee kokïða a?

³ De'n ðan, i sarrbandi ye ale? Ngon Mari, ngonkõ Jak kï Jose kï Jud kï Simõ, ngankõa kïdëg tube ndan þe nat sej nëbe ale? Oon Jeju nya ga gigt kïtad, ndï adïna kamd al.

⁴ Jeju eld an: Ngekelta kï ta Luwaht a ngah køsïgon kï log tube, na kam þe koojat kï ku noojagt, kï deg kï kam kujt loa, a ngah køsïgon tit al.

⁵ Ad Jeju ða nyag kï yaya kam þet kï Najaret't al, na ndajïn dø ngérotogt madg la ad yootïn ye.

⁶ Ta ya Jeju dø kam kongkongt lod. Kamla Jeju lago nganþeg tube'n gugïn dø þebo kï Najaret wom a ndoo deg.

Jeju la ngombankïlag lon kïlah gidaijoo

⁷ Jeju kun ngombankïlag lon kïlah gidaijoo lad joo joo, ad'd tøg dø ndilgt kïyerr.

⁸ Na ndad mber an: Ot kunïn nya mad jisït kïta ðob, na gøl kïðabe tã. A unïn nyasa jisït al, ke þøl, ke nar kam nya dø þosït al.

⁹ I lan saag njasït, na ot kad i lan kub dø nat joo.

¹⁰ Jeju eld tø an: Lon i teen þebot mad, kuj kïðen a andïnt ye, i ndïnt ro degt'n høsïn kï rodt nõbe mbã kad i þain ne lot'n non.

¹¹ Na îla lot mad deg mbet høsïn kï rodt ho, oon dø ta losï al ho a ne, i ndøtïn lot'n non kø. Lon i ndï i þain lot'n non a ne, i ndan bu kï da njasït kø. Kïgo ðob 'nten la a øjïnd ne kad ðan nya kï majal ye.

¹² Ngéndoog þai awïn lan mber Hoita Kïmaj, elïn deg kad kï tørrïn ndid.

¹³ Ngéndoog tuþan ndil kïyerrg ngãibe, yootïn ngérotog ngãi ho, wurïnd kï yib.

Koi lo Jã kï ngeða baptem deg

¹⁴ Ngar Herod Antipas oo hoi Jeju kïta tø Jeju ko ngãibe. Deg madg ndï elïn anan: I Jã kï ngeða deg baptem la þai lo koit ye, kïta 'nten la ndin kï tøg kad ðan nyag kï yaya ye.

¹⁵ Na deg madg elïn tø anan: I Eli, kïmadg tø elïn anan: I ngekelta kï ta Luwaht ke kïkïða ku ngékelta kï ta Luwaht kï maði.

¹⁶ Lon Herod oo dø tag'n non ye, an: I Jã kï ngeða deg baptem kan m'gang døa nõ la þai lo koit ye.

¹⁷ Herod Antipas î kïþe kï døn la, la deg ad høn Jã, døna, na lana dangãit ye. Herod ða titbe kïta taa Herodiad kï në ngonkõ Pilip.

¹⁸ Kïtø Jã el Herod kï nja natnatbe an: I goðobat al kad i taa në ngonkõi.

¹⁹ Kïtø nya 'nten Herodiad høn Jã kamïnt, ndig kï'n tøla, na ngah ta ðob al.

²⁰ Kïtø Herod þool ndil Jã, na ger kad Jã i de kïdenesew ho, i de kïjaþat tø ho, ad Herod ngom Jã maj kam dangãit. Lon Herod a oo dø ta lo Jã ye, kama a daa ta paa; be kaa ne, roa nela ngãi kad oo dø ta loa.

²¹ Na ndø mad Herodiad ngah ta ðob kad'n tøl Jã. I ndø ðanah kooj Herod, ad Herod ða mburr nam kunïn kïbog, kï bïradøg, kï kïrãðøøg lon, kï deg kïbobog kï Galilet.

²² Ngon Herodiad kïdë and kam kujt, tee ndom ad ro Herod nela ngãi nat kï deg'n ndï san nya nat sia, ad ngar el ngon kïdë'n non, an: I ndïjem nya kï kami ndig, na mî m'a m'adi.

²³ Ngar un køn ada kï yokïnda an: Nya ði i ndïjem kaa ne, m'a m'adi, ke neni i ndïjem gaj kõþe lom kaa ne m'a m'adi.

²⁴ Ngon kïdë tee aw ngah kon ndïjea an: Ka m'kø ði a? Kõa tura an: I ndïje dø Jã kï ngeða baptem.

²⁵ Ngon kïdë kï mand aw kanangbe kï ngødg ro ngart ela an: M'ndig kad adïm tajigt ne dø Jã kï ngeða deg baptem kam bugurt.

²⁶ Kam ngar il ngãi, na kïta yo'n nda nõ degt ta nyasat ye, asï kad mbet nya'n ngon kïdë ndïjea nõ al.

²⁷ Tajigt, Ngar la asïgar mad, ndaa mber an: Aw, i gang dø Jã kï ngeða baptem i ðen adïm.

²⁸ Asïgar aw gang dø Jã kam kuj dangãit, ðe kï døa kam bugurt ad ngon kïdë'n non, î tø taa telïn ad kon.

²⁹ Lon ngéndoog lo Jã oon hoia ye, ðe unïn ruma aw duwïn þenint.

Jeju ad nyasa deg dub mi.

³⁰ Ngombangkïlag tel kawïn na kï ro Jejut ørrïna hoi kïlag tube'n ðan nõ, kï nyag'n ndoon deg nõ.

³¹ Jeju eld an: I ðen gomt so kad jî kïþe kï ndï sãi takum degt, lot kï de gotot kad i taankò ngonsî. Kïtø koosïdeg ngãibe ndï ðen ho, ndï telïn ad Jeju kï ngéndoog lon ngahn kaglo sanya al.

³² Kïtø 'nten awïn kam toot kad'n ndïn lot mad kï de gotot.

³³ Na deg ngãibe oon god, ndï awïn, ad teen kï nganþeg, ãin ngød aw teen kete nõ Jejut kï ngéndoog lon.

³⁴ Lon Jeju ndï ðisï kam toot kï ber ye, oo koosïdeg, tit þut batg'n ngekuld goto, ad ta õ kama kïtad. Mba girr ndood nyag ngãibe.

³⁵ Na lon kàd ndï aw kï n'ud ye ngéndoog lo Jeju ndøt'n kï roat, na elïna anan: Kàd ndï ud na lo 'nten, i dïlalo kï de gotot.

³⁶ Ad koosïdeg awïn kï kam ndøøg kï nganþeg'n gugïn dø lo 'nten, nõbe a asïn kad ndugon nyasad tit.

³⁷ Na Jeju tur ngéndoog lon an: În kïþe kï døsï adïnd nyasa. Na elïna anan: I ndig kad j'aw kï ndugo bïnã kï løi kï asï nar þujoo la kad kï j'ad'd san yo?

³⁸ Jeju eld an: Bïna nduj kï løi i þai jisït a? Aw i nulïn oon. Na lon nøl oon ye, turïna anan: J'aw kï bïnã kï løi mi kïkanj joo.

³⁹ Kamla, Jeju el ngéndoog lon an: Elïn deg tube ad'd ndïn ber kï þutþut dø müt kï mbool.

⁴⁰ Deg ndïn ber kï þutaþuta, kïmadg þu þu, na kïmadg dømi dømi,

⁴¹ Jeju øi bïnã kï løi kïmi kïkanj joo. Un kumïn kï dõ dørãt, kamla ða mersi Luwah, hø bïnã kï løi tet ad ngéndoog lon kad luþon deg, na keg kanj kïjoo ad deg tube tø.

⁴² Deg tube san nya ndenïn.

⁴³ Øin bud bïnã kï løi kï bud kanj kï nãi, ðoosï keh kïlah gidaijoo.

⁴⁴ Deg tube'n san bïnã kï løi ye, în dub mi.

Jeju ndia dø mant

⁴⁵ Tentenbe Jeju øsï ngéndoog lon tõtõ, ad alïn kam toot, ndig kad awïn kete nont gid baht ko nu, ko kï þebo Besaidat. Kaglot'n non el koosïdeg kad tel awïn lo ndïdt gog.

⁴⁶ Lon Jeju el deg ad tel awïn þe ye, aw dø mbalt kad n'elta kï Luwah.

⁴⁷ Lon lo ndï dub ye, too ndï dan bahbot, na Jeju ða tïga døningt kïkïðanbe.

⁴⁸ Jeju oo ngéndoog lon nelïn too set, ad ørrïn røkï, kïta nel ndï la kï dødt kï tøgïn. Jeju aw rodt, i kàd kïmïta kï ta lotit, a ndia dø bahbot, ða kï'n tøid.

⁴⁹ Na lon ngéndoog loa oona a ndia dø baht ye, anan: I mã de mad, ad koon na mbiting.

⁵⁰ Kïtø în tube, lon oona ye, boolïn ad kamd gang ngalang. Na Jeju eld tajigt an: Iren kamsï, i mî. Ot þoolïn.

⁵¹ Kamla al kam toot godt, nel kaa ne duba ad ta ya ngéndoog loa kï dumbit.

⁵² Kïtø ngéndoog gerïn girr bïnã kï løi'n Jeju keg deg ad'd san al kïta kamd kongkong.

Jeju yoot ngemõig kï døning Jenejaret't

⁵³ Jeju kï ngéndoog lon gangïn bahbo teen kam døning Jenejaret't.

⁵⁴ Lon ðisïn kam toot ye, deg gerïn Jeju tajigt.

⁵⁵ Lan go log kï døning Jenejaret't tube, ad deg oon hoi Jeju kad ndit nõ.

⁵⁶ Kï log tube'n Jeju awt ye, ke kam nganþet, kï kam þebogt, kï kam gawg, deg ðen kï ngérotog kam sukïgt, na køna kad nya ta ðob ad ngérotog ødïn ta ji kub loa. Deg tube'n ødïna ye, yootïn dø mõigt lod.