Mark 5 - BIBLE MBAÏ 1980

Jeju yoot de kï ngendïl kïyerr

¹ Jeju kï ngéndoog lon ten gid baht ko nu kam døningt lo deg kï Gerasa.

² Lon Jeju ðisï kam toot kï ber ye,

³ tentenbe de mad tee ko kï døþadgt, de kï asï døa kï jinjir goto.

⁴ Kïtø kï nja natnatbe døn jia kï njaa kï jinjir ho, lan kag njaat ho, na tuþa jinjir gang, na tïnda kag'n lan njaat tet ðel ðel; de kï asï høa girr tøgïnt ad ndï lokïðah goto.

⁵ Kï kaglo tube, ndø ho kàda ho ndaþe døþagt, kï mbïna mbalgt. Ndï ga køl, ndï rui ron kï doo kï gaj mbal.

⁶ Lon oo Jeju ko sãi ye, ãi ngød kï døat, ðe øsï gojïn ber nõat, na ko kï ndin kïbo an:

⁷ Jeju Ngon Luwah kï Ngetøitøi, ði gom nat sei a? Un køi kï yokïnda kam tø Luwaht kad a i ða sem nyakïto al.

⁸ Elta titbe kïta Jeju ndánga kï tøgïn an: Ndil kïyerr, i tee kø kam det'n ðan.

⁹ Jeju ndïjea an: Tøi i ði a? Tura an: Tøm i Lejion, ad i koosïg kïta jî ngãibe.

¹⁰ De kï ngendïl kïyerr kø kï rotîn kad tuþad døningt'n ðan al.

¹¹ Lot'n non baaba, þut boorg kï bïlan ngãibe ðan tit nõ, ða san nya nderrbe kad doorlot.

¹² Ndil kïyerrg køn Jeju kï rotîd anan: I laj kï ku boorgt'n ðan ðan, na adj ta ðob ad j'and kamdt.

¹³ Jeju nya ta ðob ad'd. Ndil kïyerrg teen kam det'n non a kï andïn kam boorgt kï asïn dub joo. Boorg hurïn ngød doorlot kï hoollot, ad tuson kam baht, na oin kam mant.

¹⁴ Ngéngom boorg ãi awïn þebogt kï nganþeg ørrïn hoi nya'n ða nya, ad deg tee ðen kï n'oon nya'n ða nya nõ.

¹⁵ Ðe teen ro Jejut, oon de'n maðï aw kï ndil kïyerrg ye, ndï ber, la kub ront, kuma tïja roi, ad þoolïn ho, ndadïn ho.

¹⁶ Îgïn oon nyag tube'n ða nya ye, ørrïn hoi nya'n ða de kï ngendïl kïyerrg, kï boorg nõ.

¹⁷ Taa ne, deg mbã girr kø Jeju kï rotîd kad nya døning lod kø.

¹⁸ Jeju al kam toot. De kï maði ndï kï ndil kïyerrg ye, ndïjea an: Îla i ndig loi a ne, ad m'aw sei.

¹⁹ Jeju ndig døt sia al, na ela an: I tel aw þe loi, kï ro noojigt, ørrd hoi nyag kïbobo'n Luwah ða kïtatøi ke titbãi oon kumi kï lotondot.

²⁰ De'n non tøi aw, mba girr la mber hoita nyag tube'n Jeju ða kïtatøa kam døningt kï þebog loa în kïlah, ad ta ya deg tube.

Jeju yoot dekïdë ho ad kumkajir ngon Jairus kïdë ho.

²¹ Lon Jeju tel gang bah gog gid ko mad ye, koosïdeg kawïn na kï døat. Jeju ða ta baht.

²² Kamla de mad, kïbo kam kuj kawnat lo juipg tøa i Jairus ðe ro Jejut, lon oo Jeju ye, so kï ber nõat,

²³ køa kï rotîn an: Ngonïm kïdë kïdu to takoit: M'køi kad aw i nda jii døat, kad yoot ho, kï ndï kï døn dõ ho.

²⁴ Jeju aw sia nat, koosïdeg ngãibe ndulon goa, deg rumbon na mbã rumbon ne Jeju.

²⁵ Ku koosïdegt nõ, dekïdë mad ðat nõ, mosï üa þal kïlah gidaijoo.

²⁶ Dekïdë'n non, ngahkõ ngãi ji ngékîgt ngãibe, tïnda nar lon tube tî, be kaa ne, roa to soot al bat, na mõi loa ndøt kï ketekete.

²⁷ Lon dekïdë'n non oo hoi Jeju ye, ðe and ku degt ða ko gid Jejut, kamla la jin ødïn kub loa.

²⁸ Kïtø gaa kamïnt an: Ke îla m'ød kub loa ta kød kaa ne, m'a m'yoot.

²⁹ Tajigt, lon la jin ødïn Jeju ye, mosï duba ta küa. Ad ger kam daront kad n'yoot dø mõit'n ðan nõ.

³⁰ Na Jeju ger kad tøg tee kam ront, ad tur ron kï ro koosïdegt ndïjed ta an: Nõ ød kub lom a?

³¹ Ngéndoog loa turïna anan: I ger maj, kad koosïdeg'n gugïn døi la ða rumboïn ye, ða titbãi hã an: Nõ ødi a?

³² Na Jeju nøl lo mbet't kï n'oo de'n ða nya nõ.

³³ Ad þool tøl dekïdë nõ søkïrr, roa ndad yat't, kïta ger nya'n ða nya nõ þet, tøi so ber kï nja Jejut, ela nya'n ða nõ je.

³⁴ Jeju ela an: Ngonïm kïdë, kadkam Luwah loi aji, aw kï kamkïsokïber, î kï yoot dø mõit'n ðai nõ.

³⁵ Na kaglot'n Jeju ða eltat, deg madg þain þe lo Jairus ðe elïna anan: Ngoni kïdë oi woi, kïtøði i ða i ndan ngendoo deg dïlalot a?

³⁶ Na Jeju nda kumïn go tagt lod al, na el kïbo lo kuj kawna lo Juipg an: Ot þool nya mad, na i ndahkami dø Luwaht kïðabe koon.

³⁷ Na Jeju nya de mad ad aw sen al, na Pierr kï Jak, kï Jã kï ngonkõ Jak tã.

³⁸ Aw teen þe lo Jairus, deg kïsen mbiting. Jeju oo deg ndï non ngãi, ndï udïn wi ngãibe tø.

³⁹ Jeju and kam kujt na eld an: Kïtøði i ndi kïsen ne titbe a? Kïtøði i ndï nõ ne titbe tø a? Ngon oi al, na to þi ta þi.

⁴⁰ Deg gon Jeju raka. Jeju ad deg tube teen kï tïga, un bøw ngon kï kõ ngon nat kï ngéndoog lon mïta; kamla and kam kujt'n ngon kïdë tot.

⁴¹ Jeju hø ji ngon kïdë unan kï dõ, na el an: Talita kumi. Girra i titbe Ngon kïdë m'ndï m'eli m'an i þai dõ.

⁴² Ngon kïdë þai dõ tajigt mba girr þaning kïta þala asï kïlah gidaijoo. Deg tube'n ðan loat nõ, ta yad biw.

⁴³ Na Jeju ndad mber kï tøgïn kï de mad elta dø nyat'n ða nya nõ al. Kamla eld an adïna nya ad sa.