Mark 10 - BIBLE MBAÏ 1980

Jeju ndoo deg kad tuþan nëdg al

¹ Jeju þai nõbe, aw døningt kï Jude, kï gid bah Jurdët ko nu; koosïdeg tel kawïn na kï roat gog. Jeju mba girr ndood gog tit'n ndï ndoond maði nõ.

² Parisïg ndøtïn kï roat, ndïjena ta anan: I goðobat kad de tuþa nën e? Ndïjen ta titbe kad'n yan ne gum Jeju.

³ Jeju turd an: Mberkïnda'n Moij ndang adsï ye, el an ði a?

⁴ Turïna anan: Moij nya ta ðob ad de'n ndig tuþa nën a ne, kï ndang maktub tuþa ada.

⁵ Jeju turd an: Moij ndang mberkïnda 'nten adsï kïta ngarkamsï kï kongkong.

⁶ Na: lo yaþoodat nu, lon Luwah ndah døning ye, Luwah ða dekïdïngã kï dekïdë.

⁷ Kïtø 'nten dekïdïngã a nya bøwïn kï kon, kad'n tînyàn na kï nën;

⁸ în tujoo a telïn dãro kïkïða. Titbe labekïnõt în joo al ta, na în daro kïkïða.

⁹ Nya'n Luwah dønat ye, maj kad de tut al.

¹⁰ Lon tel ðen kam kujt gog, ngéndoog loa ndïjena tag ngãi þaitø.

¹¹ Jeju eld an: Îla de mad tuþa nën, na taa dekïdë mad kïðang a ne, ndï ðaa ngaw ta ða koon.

¹² Na îla dekïdë nya ngawn, na aw taa dekïdïngã mad kïðang a ne, dekïdë'n non ndï sah ngaw ta sah.

Jeju njang dø ngan kïðoig

¹³ Deg ðen kï ngan kïðoig ro Jejut kad ød'd kï jin. Na ngéndoog loa kølïn kï deg'n non ngãi.

¹⁴ Lon Jeju oo nya'n ngéndoog lon ðan ye, þawong ngãi ad eld an: I nyan ngan kïðoig ad'd ðen kï romt, ot køgïnd dø, kïta kõþe lo Luwah i lo deg kï titbe.

¹⁵ Rota m'ndï m'elsï kï tïga wakïsï: dekïðen taa kõþe lo Luwah tit lo ngan kïðoig al a ne, a and kamt al bat.

¹⁶ Kamla Jeju kui ngan kïðoig kï ront, na ndah jin dødt njangïn død tø.

Ta lo Jeju kï de kï ngenya

¹⁷ Kaglon Jeju ndig kï n'aw ye, de mad ðe kï ngød, øsï gojïn ber nõat, na ndïjea an: Ngendoo deg kïmaj. Ði sumba kad m'ða kï m'ngahn kumkajir kï mbãkïnõt a?

¹⁸ Jeju ndïjea an: Kïtøði i kunmïn de kïmaj a? De kïmaj goto, na Luwah kïðabe tã.

¹⁹ I ger mberkïndag: a i tøl de al. A i sah ngaw ke dekïdë al. A i þog al bat. A i manaj kï ngom dø madþeit al. Øsïgon bøwi kï kõi.

²⁰ De kï ngenya ela an: Ngendoo deg, m'tel rom go nyagt'n non tube lon mîn kï basam þaitø.

²¹ Jeju urr kumïn kï døat, ta õ kama kïtatøa, na ela an: Nya kïða la dui ye, aw i ðaw nyag loi tube, na ad nara ngéndog a ne, þet a i ngah nyamajg kï kam dørãt; kamla, i ðe i ndulo gom.

²² Na lon de kï ngenya oo ta 'nten ye, ða kamkil, ad takuma høndo, kïta nyangah loa i ngãi.

²³ Jeju nøl ngéndoog lon'n gugïn døn, na eld an: Ngang ngãi kïta ngényamajg kad andïn kam kõþet lo Luwah.

²⁴ Ta ya ngéndoog loa ngãi dø tat 'nten ad Jeju tel eld an: Nganïm, lo gang lam kïta deg'n ndï þan kul nyamajg lod kad andïn kõþet lo Luwah.

²⁵ Õ al kad lukum and ta bulo libirt tøi kad ngemaj and kam kõþet lo Luwah.

²⁶ Ta ya ngéndoog loa kï tøi takøl, ad ndïjena anan: Îla i titbe ye, nõ asï ngah kaj a?

²⁷ Jeju nøld mbet't kamla eld an: ko ro degt, nyan 'nten i root al, na ro Luwaht taa ne, nyag tube i root.

²⁸ Nõbe Pierr mbagirr kela kan: Oo, kï mbet nyag tube, kad kï ndulo goi.

²⁹ Jeju tur an: Rota la m'ndï m'elsï ye: Dekïðen nya kuj lon, ngankõn kïdïngã kï kïdë, kï kon, kï bøw'ï, kï nganïn, kï ndøøg lon kïtatøm kïta Hoita Kïmaj,

³⁰ de'n non a ngah nya døt nja þu tajigla kam koht'n ðan ad a ngah kujg, ngankõn kïdïngãg kï kïdëg kï bøwg, kï kõg, kï ngan'g, kï ndøøg nat kï darondo tø. Na kam koht'n a ðe a ngah kumkajir kï mbãkïnõt.

³¹ Na deg kïdasa ngãibe a telïn deg kï døboit. Na deg kï døboit ngãibe a telïn kïdasa.

Jeju elta dø koint kï þain lo koit

³² Jeju i døðobt kï deg'n a ndulon goa, ndï awïn kï Jerusalem. Jeju ndia nõdt kete, kam ngéndoog loa dad ta paa, îgïn în nat sia ye, þoolïn ho. Jeju tel kun ngombangkïlag lon kïkïlah gidaijoo kï ront gog kad'n n'eld ta. Mbagirrr keld ta dø nyat'n þet a tee dønt.

³³ Oon, ndï kï j'aw Jerusalemt: þet a lan Ngon de ji kïbogt lo ngéjamosïkadkari, kï ngéndang maktub, a gangïn ta koi døat, a lana ji girrdegt kï gerïn Luwah al.

³⁴ Deg'n non a gona, a tuwïn horr tad døat, a ndana kï ndeh, kamla a tølïna. Na go ndøt kïkõmïta a ne, a þai ku ngékoit.

Îla de mad ndig kï nî kïbo a ne, maj kad tel ngekïlaþer

³⁵ Kamla Jak kï Jã, ngan Jebede ndøt'n kï ro Jejut elïn anan: Ngendooj, kï ndig kad kï ndïjei nya mad na kï køi kad i ndig døt sej.

³⁶ Jeju eld an: Ði i ndigïn kad m'ða m'adsï a?

³⁷ Turïna anan: Lon a i ndï dø pong kõþet loi ye, kï køi kad adj ta ðob kad kï de mad ndï ko jikõit, na mad ndï ko jigelit ho.

³⁸ Jeju eld an: I gerïn nyan i ndï kø'n nõ al. Asïn kãi kop kõ kï ngaht'n þet m'a m'ãi nõ õ? Ke asïn ða baptem kamkõt kï ngah tit'n þet a ðamïn ne ye ho oo?

³⁹ Turïna anan: J'asï ða nya nõ. Jeju eld an: Rota, a ãin kam kopt'n þet m'a m'ãit nõ; na a ðasïn baptem kamkõt tit mî tø ho.

⁴⁰ Na ndï dø ji komt ke dø ji gelïmt, i ta lom al, kad m'ad de; na i Luwah la ðago log'n non kete woi, kïta deg'n þet a ad'd.

⁴¹ Lon ndeg ngéndoog kïkïlah oon dø ta 'nten ye, þan wong kï tïnga bil kï Jak kï Jã.

⁴² Na Jeju kund kï ront, kamla eld an: I gerïn maj, ta kad deg'n ndand kad õnþe dø girrdegt kïdangdang ye, ndï ðan ngar dødt kï lo ngetøgt, na kïbog lod ndï lan dø deg girr tøgdt tø.

⁴³ Na în taa ne, i titbe kusït al, îla de mad kusït ndig kad nî kïbo a ne, sumba kad tel ngon ngekïla losï.

⁴⁴ De'n ndig kï nî kïbo tøi kusït a ne, maj kad ða kïlaþer losï tube.

⁴⁵ Kïtø Ngon de ðe kam døningt kïtakad deg ðan kïlaþer adnïn al, na ðe kad kï'n ða kïlaþer n'ad deg ho, kï n'ad ron nyabadøt kad'n bandø deg ngãibe hø.

Jeju yoot mundo'n tøa i Bartime ad oo lo.

⁴⁶ Jeju kï ngéndoog lon aw teen Jerikot, kamla tel teen kam þe Jerikot, sed ngéndoog lon kï koosïdeg ye, mundø mad kï tøa i Bartime ngon Time, ndï bøg ðobt ndï kø nya.

⁴⁷ Lon oo dø kad i Jeju kï Najaret't la ndï tøi ye, ga tan kot kï ndin kïbo an: Jeju, Ngon Dabid oo kumtondo lom.

⁴⁸ Deg ngãibe ndángïna kad ndï tan mbo. Na mundo ða ko par par kï tøgïn an: Ngon Dabid, oo kumtondo lom.

⁴⁹ Jeju duba na el an: I kunïna so. Deg kunïn mundo na elïna anan: I høtøgibá. I þai dõ, ða kuni.

⁵⁰ Mundo tînyà kub lon kø, na þai rat aw kanang ro Jejut.

⁵¹ Jeju ndïjea an: Ði i ndig kad m'ða m'adi a? Mundo tura an: Ngendoodeg, m'ndig kad m'oo lo.

⁵² Jeju ela an: Aw lo loi; kadkam loi aji. Na mundo ngah koo lo, na ndulo go Jeju.