Daniel 9 - BIBLE MBAÏ 1980

Daniel elta kï Luwah kïta girrdeg lon

¹ Kam þalt kïdasa bang lo Darius ngon Asuerus kï girrkooj Medeg, lon ndana ngart dø kõþet lo Kaldeag ye,

² kam þalt kïdasa bang lo kõþe loa, mî Daniel m'nder girr maktubg kïkunjðang, taa ne, m'ger girr ta'n Bïraþe elta ngekelta kï tant Jeremi dø kør þalgt'n Jerusalem a in kï tuj nõ, ad i þal døtanãimïta.

³ Kamla m'sah ðob kelta kï Bïraþe Luwaht kï rotîm, nat kï køgro nyasa kï la kub høndo kï ndï kam buhorrt kï øj dø tørrndi.

⁴ Mî Daniel m'elta kï Bïraþe Luwah lom, m'tøø tam dø majalg lo girrdeg lom m'an: A. Bïraþe Luwah kïbo kï kïtootþool, i ngengom go kunkø loi kï ngekøj kamkë deg'n ndï tarïn, na ngomïn go mberkïndag loi.

⁵ Jî kï ða majal, kï ðagootal, kïlaðaj majal, kï tai ðøø tø. Jî kï tø roj kø go mberkïndagt loi kï tag kïgang loi.

⁶ Jî kï nel mbij kïdø tat lo þerg loi al ad i ngékelta kï tait, îgïn elïn ta ngarg loj kï mbaiþeg loj kï bøwjg kï deg tube kï døningt loj kam tøit.

⁷ Î Bïraþe, denesew i loi, na jî taa ne, takum kï rosøl i loj þone, kï lo deg kï døning Juda kï ngéndï Jerusalem, kï Israelag tube kï ngendï logt kï nderrbe kï ngéndï logt kïsãisãi kam døninggt tube, în i tuþad kø tit kïta nyaðad kïro al în ðan ndoorïn ne.

⁸ Bïraþe, rosøl i loj, rosøl i lo ngarg loj kï mbaiþeg loj, kï bøwjg kïta jî kï ða majal kï ndoorïn.

⁹ Na kõkam kï nyàgo majal kø i lo Bïraþe Luwah loj ke neni, jî ngétaai ðøø.

¹⁰ Kï tel roj go mberkïndat'n i ndaj mbera kïtakul þerg loi ngékelta kï tait.

¹¹ Israelag tube tøin dø ta loi, na tøn rod sãi kï ta loi, na mbet koo dø nyandoo loi. Kamla ndøl kï yokïnda'n i kïndang kam tat lo Moij, þer loi ye, son døjt, kïta jî kï ða majal kï ndoorïn.

¹² Luwah i tølkon tag'n el døjt kï dø ngekõþegt loj îgïn õnþe døjt. I ad tuj kïbobe tee døjt Jerusalem, nya kï titbe ða nya nja kïða ad de oo al þaitø.

¹³ Tujg'n non tee døjt tit'n ndangïn ne kam tat lo Moij, na jî kï kø Bïraþe Luwah loj kï rotîj al, kï nyàgo tøidøtag loj al, kï j'oo dø rota loi kï tîjt al tø.

¹⁴ Kïtø 'nten la Bïraþe i ðan go tujg'n non kete woi, kamla ada teen døjt, kïta Bïraþe Luwah loj i ngeða nya kïdenesew kam kïlaðan'gt tube, na jî kï tel roj go tat loi al.

¹⁵ Na tajigla Bïraþe Luwah loj, în i tee kï girrdeg loi kam døning Ejipt't kïtïga kï jii kïtag, in i ad tøi ko tit'n kon þone; jî kï ða majal, jî kï ðagootal.

¹⁶ Bïraþe, i øj'j ða denesew loi kï ndøg ndøg. I nya ta wong loi kï tøl søkïr dø Jerusalemt, kï þebo loi dø mbalbot loi kïjaþat. Kïtø majalg loj, kï kï lo bøwjg kï tel nyataj kïro degt tube'n gugïn døj.

¹⁷ Kïtø 'nten tajigla Luwah loj, oo dø ta'n þer loi ndï el sei, kï køg'n ndï køi kï rotîn. Kïtatøi Bïraþe, kï ad takumi øsï unj dø lot loi kïjaþat'n deg tujïna.

¹⁸ Luwah lom, i nel mbii oon dø ta lom. I tee kumi i nølïn þebo loj'n tuj, þebo'n kunïn tøi døt. I kïta nyaðaj kïdenesew hã ndï kï j'elïn sei ta kï rotîj al, na kïta tar loi kï kõkam loi kïbobe.

¹⁹ Bïraþe, oo dø kø loj. Bïraþe, i nyàgo majalg loj kø. Bïraþe, i nel mbii, kïtatøi Luwah lom, i ða nya mad kïtaj, ot ndï køk. Kïtø þebo loi, kï deg loi în kunïn tøi dødt.

Ta dø kaglogt kïdøtanãimïta

²⁰ Lon m'ndï m'elta kï Luwah þaitø ye, m'ndï m'tø tam dø majalt lom, kïdø majalt lo girrdeg lom Israel, m'ndï m'ad kø lom kï rotî aw nõ Bïraþe Luwaht kïta mbalbo kïjaþat lo Luwah lom.

²¹ Lon m'ndï m'elta kï Luwah þaitø ye, malaika Gabriel, in m'ooa kam nyakookamndilt kete nõ, þai kanangbe ðe romt, i døkàd la kadkarit kï lokïsøle.

²² Adïm m'ger girr nyag'n m'ger al, elïm an: În Daniel, m'ðe tajigla kïtakad kï m'adi nyager kïmaj kï goosï ger girrnya.

²³ Lon i mba girr kø kï rotîi ye, ta mad tee ko ro Bïraþet, kad m'ðe m'eli kïta Luwah tari ngãi. Kïtø 'nten maj kad i nel mbii oon dø ta kï øj dø nya'n oon dø nyakookamndilt non.

²⁴ Øjïn kaglog tanãimïta nja døtanãimïta dø girrdegt loi, kï dø þebot loi kïjaþat kïtakad tøidøtag tïgan, kïtakad girr majal gang, kïta la kadkari kïjakø kutïn dø ðagootal kïtakad and kïdenesew kï to kïnõt, kïtakad tølïn kon nyakookamndilt kï tag lo ngékelta kï ta Luwaht, kïtakad lo kïjaþat kïtaitøi î kï wur kï yib gog.

²⁵ Kïtø 'nten maj kad i ger nya 'nten, na i ger girra tø. Ndøt'n ta tee tait øj dø tel þeþert kï ða þebo Jerusalem gog, kam ndøt'n non, mbã kad kï wur, ad i mbaiþe'n Luwah køta a ðe ye. Kaglog tanãimïta, kaglo kïðen asï þal tanãimïta. Kamla kaglog mad asï þalg kïtanãimïta nja døkïbojidet gidaijoo a tøin: Deg'n awïn þert ye a telïn, a ðan natlog kï ndogbørrag gog na a i kaglot kïngang ngãi.

²⁶ Na go þalgt kïtanãimïta nja døkïbojidet gidaijoo'n non ye, a tølïn kï wur kø, nya loa a goto. Deg lo mbaiþe kï a ðe a nujïn þebo kï lo kïjaþat kø. Døboia a ðe tit kï mankõþe, ðøø a to mbã kïdøboit, na ta tee kad nujïna telïna gootþe.

²⁷ Na mbaiþe'n non a la køn nat kï koosïdeg kï yokïnda kaglog tanãimïta nja kïða, na ngawdan kaglog kïtanãimïta'n non a ne, a øg dø kadkari kïjakø kï kadkari kïla, na ngenujþe a ðe dø bøg kujt kïjaþat mbã døboia in gangïn dø ngenujþet'n non so døat.